Yoga Vasistha · Verses 6.91-2

cūḍālovāca /
idānīṃ rājaśārdūla vastusaṃpratipattaye /
śṛṇu vindhyebhavṛttāntavivṛtiṃ smayakāriṇīm

yo'sau vindhyavane hastī so'sminbhūmitale bhavān /
yau vairāgyavivekau tau dvau tasya daśanau sitau

yaścāsau vāraṇākrāntitatparo hastipaḥ sthitaḥ /
tadajñānaṃ tavākrāntitatparaṃ tava duḥkhadam

atiśakto'pyaśaktena duḥkhādduḥkhaṃ bhayādbhayam /
hastī hastipakeneva rājanmaurkhyeṇa nīyase

yallohavajrasāreṇa vāraṇaḥ pariyantritaḥ /
tadāśāpāśajālena bhavānāpadamāvṛtaḥ

āśā hi loharajjubhyo viṣamā vipulā dṛḍhā /
kālena kṣīyate lohaṃ tṛṣṇā tu parivardhate

yaddvandvaṃ prekṣate vairī gajamārādalakṣitaḥ /
prekṣate tvāṃ tadajñānaṃ krīḍārthaṃ baddhamekakam

yadbabhañja gajaḥ śatroḥ śṛṅkhalājālabandhanam /
tattatyāja bhavānbhogabhūmiṃ rājyamakaṇṭakam

kadācitsukaraṃ śastraśṛṅkhalābandhabhedanam /
na tvasya manasaḥ sādho bhogāśāvinivāraṇam

yadibhe pāṭayatyuccairbandhaṃ hastipako'patat /
tvayi tyajati tadrājyamajñānaṃ patitaṃ kṛtam

yadā viraktaḥ puruṣo bhogāśāṃ tyaktumicchati /
tadā prakampate'jñānaṃ chedye vṛkṣe piśācavat

yadā vivekī puruṣo bhogānsaṃtyajya tiṣṭhati /
tadā palāyate'jñānaṃ chinne vṛkṣe piśācavat

bhogaughe nūnamunmukte patatyajñānasaṃsthitiḥ /
pādape krakacacchinne kulāyastadgato yathā

yadā vanaṃ prayātastvaṃ tadā'jñānaṃ kṣataṃ tvayā /
patitaṃ sanna nihataṃ manastyāgamahāsinā

tena bhūyaḥ samutthāya smṛtvā paribhavaṃ kṛtam /
tapaḥprapañcakhāte'smingahane tvaṃ niyojitaḥ

tadaivāghātayiṣyastvaṃ yadyajñānaṃ tathāgatam /
rājyatyāgavidhau tattvāṃ nāhaniṣyatkṣayaṃ gatam

yatkhātavalayastena vairiṇā hastinaḥ kṛtaḥ /
tattapoduḥkhamakhilamajñānena tavārpitam

yā tasya rājarājaśrīrgajārernṛpasattama /
sā tvavajñānanṛpateścintābhyantaracāriṇī

tvaṃ gajendrastvayaṃ sādho dīrghe vane'gajo'pi san /
ajñānavairiṇā tena nikṣiptastarasāmitaḥ

yatkhātavalayo bālalatābhiravaguṇṭhitaḥ /
āvṛtaṃ tattapoduḥkhamīṣatsajjanavṛttimiḥ

ityadyāpi tapaḥkhāte duḥkhe hyasminsudāruṇe /
sthito'si pātālatale nṛpa baddho yathā baliḥ

gajastvamāśā nigaḍāni vairī
moho nikhātaḥ punarugrabandhaḥ /
mahītalaṃ vindhya udanta itthaṃ
tvadīya uktaḥ kuru yatkaroṣi

ityārṣe śrīvāsiṣṭhamahārāmāyaṇe vālmī० de० mo० nirvāṇapra० pū० cū० hastikākhyānatātparyavivaraṇaṃ nāmaikanavatitamaḥ sargaḥ //९