Yoga Vasistha · Verses 6.90-2

śikhidhvaja uvāca /
maṇisādhakavindhyebhabandhanādyamarātmaja /
sūcitaṃ yatkathājālaṃ punarme prakaṭīkuru

cūḍālovāca /
vākyārthadṛṣṭerniṣpattyā hṛdgṛhe cittabhittiṣu /
śṛṇu svayaṃ kathāṃ citrāṃ citramunmīlayāmi te

yo'sau śāstrārthakuśalastattvajñāne tvapaṇḍitaḥ /
ratnasaṃsādhakaḥ proktaḥ sa tvameva mahīpate

tajjño bhavasi śāstreṣu ravirmerutaṭeṣviva /
tattvajñāne tu viśrānto na tvaṃ dṛṣadivāmbhasi

viddhi cintāmaṇiṃ sādho sarvatyāgamakṛtrimam /
tamantaṃ sarvaduḥkhānāṃ tvaṃ sādhayasi śuddhadhīḥ

sarvatyāgena śuddhena sarvamāsādyate'nagha /
sarvatyāgo hi sāmrājyaṃ kiṃ cintāmaṇito bhavet

siddhaḥ sarvaparityāgaḥ sādho saṃsādhyatastava /
kharvīkṛtajagadbhūtirvidyāsvātmodayastathā

saṃtyaktaṃ bhavatā rājyaṃ sadāradhanabāndhavam /
brahmaṇeva jagatsargavyāpāraḥ svaniśāgame

svadeśasyātidūrasthamāgato'si mamāśramam /
bhuvo'ntamiva viśrāntyai vainateyaḥ sakacchapaḥ

kevalaṃ sarvasaṃtyāge śeṣitāhaṃmatistvayā /
mṛṣṭākhilakalaṅkena svasattevānilena khe

manomātre hṛdastyakte jagadāyāti pūrṇatām /
tyāgātyāgavikalpaistvaṃ khamambhodairivāvṛtaḥ

nāyaṃ sa paramānandaḥ sarvatyāgo mahodayaḥ /
ko'pyuccairanya evāsau cirasādhyo mahāniti

cintayeti gate vṛddhiṃ saṃkalpagrahaṇe śanaiḥ /
vātyayeva vanaspande tyāgaḥ proḍḍīya te gataḥ

tyāgitā syātkutastasya cintāmapyāvṛṇoti yaḥ /
pavanaspandayuktasya niḥspandatvaṃ kutastaroḥ

cintaiva cittamityāhuḥ saṃkalpetaranāmakam /
tasyāmeva sphurantyāṃ tu cittaṃ tyaktaṃ kathaṃ bhavet

citte cintāgṛhīte tu trijagajjālake kṣaṇāt /
kathamāsādyate sādho sarvatyāgo nirañjanaḥ

saṃkalpagrahaṇenāntastyāgaḥ proḍḍīya te gataḥ /
śabdasaṃśravaṇenāṅga yathā grāmavihaṃgamaḥ

niścintatvaṃ paraṃ sarvaṃ tyāga ādāya te gataḥ /
āmantryāpūjito jantuḥ sa duḥkhaṃ na karoti kim

sarvatyāgamaṇāvevaṃ gate kamalalocana /
tapaḥkācamaṇirdṛṣṭastvayā saṃkalpacakṣuṣā

tvayā tasmiṃstapasyeva duḥkhe dṛṣṭibhramodite /
grāhyaikabhāvanā baddhā jalendau śaśino yathā

avāsanamanāsaktyā kṛtānantā savāsanā /
ādyantamadhyaviṣamā duḥkhāyaiva tapaḥkriyā

amitānandamutsṛjya susādhyaṃ yaḥ pravartate /
mite vastuni duḥsādhye svātmahā sa śaṭhaḥ smṛtaḥ

sarvatyāgaṃ samārabhya na caiṣa sādhitastvayā /
tathā duḥkhaikatājñānabaddhena vanasadmani

rājyabandhādviniṣkramya prasaraduḥkhapūritāt /
vanavāsābhidhaiḥ sādho baddho'si dṛṣṭabandhanaiḥ

dviguṇā eva te cintāḥ śītavātātapādayaḥ /
bandhanādadhikaṃ manye vanavāsamajānatām

cintāmaṇirmayā prāpta ityalaṃ buddhavānasi /
na labdhavānbhavānsādho sphaṭikasyāpi khaṇḍikām

ityetadaṅga maṇiyatnakathāsamānaṃ
samyaṅmayā prakathitaṃ tava padmanetra /
tadbodhyamevamamalaṃ svayameva buddhvā
yadvetsi tatpariṇatiṃ naya cittakośe

ityārṣe śrīvāsiṣṭhamahārāmāyaṇe vā० de० mokṣo० nirvāṇa० pū० cū० cintāmaṇisādhakavṛttāntavivaraṇaṃ nāma navatitamaḥ sargaḥ