Scripture Library

Yoga Vasistha · Chapter 6.90

6.90.90

navatitamaḥ sargaḥ

6.90.1

śrīrāma uvāca /
anantaraṃ vada brahmañjaganti bhavatā tadā /
bhūmaṇḍalānāṃ hṛdaye kvaciddṛṣṭāni naiva vā

6.90.2

śrīvasiṣṭha uvāca /
parātmajāgratsvapnorvīmaṇḍalaughātmanā mayā /
tato'nubhūtaṃ hṛdaye dṛṣṭaṃ ca parayā dṛśā

6.90.3

yāvattathaiva sarvatra jagajjālamavāsthitam /
sarvaṃ dṛśyamayaṃ śāntamapi dvaitamayātmakam

6.90.4

jaganti santi sarvatra sarvatra brahma saṃsthitam /
sarvaṃ śūnyaṃ paraṃ śāntaṃ sarvamārambhamantharam

6.90.5

sarvatraivāsti pṛthvyādi sthūlaṃ tacca na kiṃcana /
cidvyomaiva yathā svapnapuraṃ paramajātavat

6.90.6

neha nānāsti no nānā na nāstitvaṃ na cāstitā /
ahamityeva naivāsti yatra tatra kuto'sti kim

6.90.7

anubhūtamapīdaṃ sadahamityādirūpakam /
nāstyeva yadi vāpyasti tadbrahmājamanāmayam

6.90.8

yatsvapnapuramevedaṃ sargādāveva cinnabhaḥ /
astitānāstite tatra kīdṛśe kva kutaḥ sthite

6.90.9

yathāhaṃ dṛṣṭavāṃstāni jagantyavanirūpadhṛk /
tathā mayā jalībhūya dṛṣṭaṃ tādṛśameva tat

6.90.6.2.90.10

vāridhāraṇayā vāri bhūtvā jaḍamivājaḍam /
samudramandireṣvantaściraṃ gulagulāyitam

6.90.11

tṛṇavṛkṣalatāgulmavallīnāṃ stambhanāḍiṣu /
mṛdvalakṣitamārūḍhaṃ tavāṅgeṣviva yūkayā

6.90.12

sarvotthānopamāstambhe tacchede valayopamā /
mṛdvyā karṇāhigatyeva racanā prakṛtodare

6.90.13

vallītamālatālādipallaveṣu phaleṣu ca /
viśramya puṣṭayā''kṛtyā rekhāviracanaṃ kṛtam

6.90.14

mukhenāviśya hṛdayamṛtuvaidhuryadhāriṇā /
hṛtā vidhuritā bhuktā lūnā deheṣu dhātavaḥ

6.90.1

suptaṃ pallavatalpeṣu prāleyakaṇarūpiṇā /
tulyakālamaśeṣeṣu dikṣu sarvāsvakhedinā

6.90.16

nānāhradanadīgehagrāhiṇā'viratādhvanā /
viśrāntaṃ setusuhṛdaḥ prasādena kvacitkvacit

6.90.17

vidā'vidanusaṃdhānājjaḍena tadanāśrayāt /
jaḍāśayeṣūllasitaṃ jalenāvartavartinā

6.90.18

mayā duṣkṛtinevordhvaśilāsvasthena bhūbhṛtām /
svāvartavartinā śvabhrapāteṣu śatadhā gatam

6.90.19

dhūmarūpeṇa nirgatya dārubhyo gaganārṇave /
kaṇaratnena nīlarkṣamaṇyantarvartinā sthitam

6.90.6.2.90.20

viśrāntamabhrapīṭheṣu vidyudvanitayā saha /
bhinnendranīlanīlena śeṣāṅgeṣviva śauriṇā

6.90.21

paramāṇumaye sarge piṇḍarūpeṣvalakṣitam /
sthitamantaḥpadārtheṣu brahmaṇaivākhilātmanā

6.90.22

prāpya jihvāṇubhiḥ saṅgamanubhūtiḥ kṛtottamā /
yāmātmano na dehasya manye jñānasya kevalam

6.90.23

na mayā na ca dehena nānyenāsvāditātma yat /
tadantarvivṛtaṃ cetyamajñānāya tadapyasat

6.90.24

sarvarturasarūpeṇa nānāmodāni dikṣvalam /
bhuktāni puṣpajālāni procchiṣṭaṃ dadatālaye

6.90.25

caturdaśaprakārāṇāṃ bhūtānāmaṅgasandhiṣu /
uṣitaṃ cetaneneva jaḍenāpyajaḍātmanā

6.90.26

sīkarotkararūpeṇa rathamāruhya mārutam /
āmodeneva vihitaṃ vimalavyomavīthiṣu

6.90.27

rāma tasyāmavasthāyāṃ paramāṇukaṇaṃ prati /
anubhūtamaśeṣeṇa yathāsthitamidaṃ jagat

6.90.28

ajaḍena jaḍeneva samayā jālayā tayā /
antaḥsarvapadārthānāṃ jñātājñātena saṃsthitam

6.90.29

jagatāṃ tatra lakṣāṇi nāśotpātaśatāni ca /
mayā dṛṣṭāni rūḍhāni kadalīdalapīṭhavat

6.90.6.2.90.30

evaṃ jagaccājagadvā sākāraṃ vā nirākṛti /
cinmātragaganaṃ sarvamākāśādhikanirmalam

6.90.31

na kiṃcanatvaṃ ca na kiṃcanedaṃ
śuddhaḥ paro bodha idaṃ vibhāti /
sa cāpi no kiṃcana nāpi śūnya-
mākāśamevāsi vikāsamāsva

6.90.90

ityārṣe śrīvāsiṣṭhamahārāmāyaṇe vā० de० mo० nirvāṇaprakaraṇe u० pāṣā० jalajagadvarṇanaṃ nāma navatitamaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0