Yoga Vasistha · Verses 6.88-2

aṣṭāśītitamaḥ sargaḥ

cūḍālovāca /
asti kaścitpumān śrīmān sthānaṃ nityaviruddhayoḥ /
guṇalakṣmyoraśeṣeṇa yathābdhirvāḍavāmbunoḥ

kalāvānastrakuśalo vyavahāravicakṣaṇaḥ /
sarvasaṃkalpasīmānto na tu jānāti tatpadam

anantayatnasaṃsādhye sa cintāmaṇisādhane /
pravṛtto vāḍavo vahnirabdhisaṃśoṣaṇe yathā

tasya yatnena mahatā kālenādhyavasāyinaḥ /
siddhaścintāmaṇiḥ kiṃvā na siddhyatyudyatātmanām

pravṛttimudyamaṃ prajñāṃ prayuṃkte cedakhedavān /
akiṃcano'pi śaktatvaṃ samavāpnotyavighnataḥ

maṇimagre sthitaprāyaṃ hastaprāpyaṃ dadarśa saḥ /
merāvudayaśrṛṅgastho munirindumivoditam

babhūva maṇirājendre na tu niścayavānasau /
rājye drāgiti saṃprāpte sudīna iva pāmaraḥ

idaṃ saṃcintayāmāsa manasā smayaśālinā /
saṃprāptopekṣayā dīrghaduḥkhasaṃbhramaśālinā

ayaṃ maṇirmaṇirnāyaṃ maṇiścettadbhavenna saḥ /
spṛśāmi na spṛśāmyenaṃ kadācitsparśato vrajet

naitāvataiva kālena maṇīndraḥ kila siddhyati /
yatnena jīvitāntena siddhyatītyāgamakramaḥ

kṛpaṇaḥ kūṇitenākṣṇā lolālātalatopamam /
ratnālokaṃ prapaśyāmi dvicandratvamiva bhramāt

kuta etāvatī sphītā bhāgyasaṃpanmamāgatā /
adhunaiva yadāpnomi maṇīndraṃ sarvasiddhidam

kecideva mahāntaste mahābhāgyā bhavanti hi /
yeṣāmalpena kālena bhavantyabhimukhāḥ śriyaḥ

ahamalpatapāḥ sādhuvarāko mānuṣaḥ kila /
siddhayaḥ kathamāyānti māmabhāgyaikabhājanam

evaṃ vikalpasaṃkalpaiściramajñaḥ parāmṛśan /
na maṇigrahaṇe yatnamakārṣīnmaurkhyamohitaḥ

na yadā yena labdhavyaṃ na tatprāpnotyasau tadā /
cintāmaṇiravāpto'pi durdhiyā helayojjhitaḥ

iti tasminsthite yāto maṇiruḍḍīya siddhayaḥ /
tyajanti hyavamantāraṃ śaro guṇamivojjhitaḥ

hatvā prājñapadaṃ puṃsaḥ saṃyānti kila siddhayaḥ /
āgatāḥ saṃprayacchanti sarvaṃ yāntyasahatyalam

pumānbhūyaḥ kriyāyatnaṃ cakre ratnendrasādhane /
nodvijante svakāryeṣu janā adhyavasāyinaḥ

dadarśātha kacadrūpaṃ kācakhaṇḍamakhaṇḍitam /
hasadbhirvañcakaiḥ siddhaiḥ puraskṛtamalakṣitaiḥ

ayaṃ cintāmaṇiriti mūḍhastasminsa vastutām /
bubudhe mohito hyajño mṛdaṃ hemeti paśyati

aṣṭau ṣaṣṭhaṃ dviṣaṃ mitraṃ rajjuṃ sarpaṃ sthalaṃ jalam /
candrau dvau kurute cittagato moho'mṛtaṃ viṣam

taṃ dagdhamaṇimādāya prāktanīṃ ca śriyaṃ jahau /
sarvaṃ citāmaṇerasmātprāpyate kiṃ dhanairiha

deśo'yamasukho rūkṣo janaiḥ pāpibhirāvṛtaḥ /
kiṃ tadgehaṃ gataprāyaṃ kiṃ nāma mama bandhavaḥ

dūraṃ gatvā yathākāmaṃ sukhaṃ tiṣṭhāmi saṃpadā /
ityādāya maṇiṃ mūḍhaḥ śūnyakānanamāyayau

tatra kācakaṇenāsau tena tāmāpadaṃ yayau /
kajjalādreriva nibhā maurkhyasyaivāṅga yā samā

duḥkhāni maurkhyavibhavena bhavanti yāni
naivāpado na ca jarāmaraṇena tāni /
sarvāpadāṃ śirasi tiṣṭhati maurkhyamekaṃ
kṛṣṇaṃ janasya vapuṣāmiva keśajālam

ityārṣe śrīvāsiṣṭhamahārāmāyaṇe vā० de० mokṣo० nirvāṇaprakaraṇe pū० cūḍā- maṇikācopākhyānaṃ nāmāṣṭāśītitamaḥ sargaḥ