Yoga Vasistha · Chapter 6.88

aṣṭāśītitamaḥ sargaḥ

śrīvasiṣṭha uvāca /
bhūpīṭhena satā tatra mayā tadanu mānava /
anubhūtaṃ nadanadīsvasaṃvedanasaṃsthiteḥ

kvacinmaraṇasākrandanārīkaruṇavedanam /
kvaciduttāṇḍavastraiṇamahotsavamahāsukham

kvaciddurvāradurbhikṣadurākrandaṃ durīhitam /
kvacitsakalasasyaughasaṃpannaghanasauhṛdam

kvacidagnimahādāhadagdhadehogravedanam /
kvacijjalaplavālūnapurapattanakhaṇḍakam

kvaciccapalasāmantakṛtaluṇṭhanamaṇḍalam /
kvaciduddāmadaurātmyarakṣaḥpaiśācamaṇḍalam

kvacijjalāśayollāsavellanotpulakāgrakam /
kandarodaraniṣkrāntavātavellitavāridam

saṃvidbodhonnamatsvāṅgakeśotthāṅkuralomakam /
vārivāhanavikṣobhanatonnatalasattalam

saśṛṅgabhairavaśvabhrapurādrivanapattanam /
saṃvinmaṇḍalasaṃcālalekhāṅkamṛdukampanam

kvacitsāmantasaṃkṣubdhasainyasaṃharaṇaṃ raṇe /
kvacitsaumyasukhāsīnasarvasāmantamaṇḍalam

araṇyaṃ kvacidāśūnyamullasadvātajhaṃkṛti /
jaṃgalaṃ kvacidālūnavyuptasaṃpannasasyakam

haṃsakāraṇḍavākīrṇasaraḥ phullāmbujaṃ kvacit /
kvacinmarusthalasthūlastambhanārjunamārutam

kvacinnadanadīvāhahelānikaṣaghargharam /
kvacidaṅkurakāryāṅgasiktabījasya jṛmbhaṇam

kvacidantastu kīṭāsyamṛduspandanavedanam /
māṃ tvamevāśu buddhveha trāyasvetīva bodhanam

śākhāparikarābhogaṃ mṛdbhāgāṅganipīḍanaiḥ /
mūlajālamavaṣṭabhya kvacidviṭapadhāriṇam

anyonyamalamākramya diktaṭāṅganipīḍanaiḥ /
kvacidadrya(?)sthinibiḍairarṇavollāsavellitam

śuṣkapallavasaṃkocanibiḍāṅganipīḍanam /
amarṣaṇaiḥ karairārkaiḥ svarasākarṣaṇaṃ kvacit

śṛṅgamandiramātaṅgaprahārāśanibhūruhām /
nibiḍāṅgotkaṭasthairyaparuṣāpatanaṃ kvacit

nimīlitaikṣaṇānandatanūnāmasamākramam /
kvacitsūkṣmatarollekhamaṅkurollāsanaṃ navam

makṣikāyaukamaśakanivāsasadṛśaṃ kvacit /
kuḍyaleśakubhṛṅgārihalahelānikarṣaṇam

śītaṃ śītaviśīrṇāṅgajarjaratvagvikīrṇavat /
pāṣāṇībhūtasalilaṃ kvacitparuṣamārutam

uddālībhūtamṛdvaṅgamajjadantaḥkṛmivrajam /
kvacidudbhavadaṅgādimūlaṃ jalanimajjanam

śanairantarnilīnāmbukṛtāhlādaṃ bahiśca ra-
-sonnāmāṅkuraromaughaṃ kvacidvarṣavijṛmbhitam

tanutarapavanavikampitakomalanalinīdalāstaraṇaiḥ /
viharaṇamiva me vihitaṃ sarobhiraṅgeṣu nirvāṇam //
ityārṣe śrīvāsiṣṭhamahā० vālmī० de० mo० nirvāṇaprakaraṇe u० pāṣā० bhūmaṇḍalagataviśeṣavarṇanaṃ nāmāṣṭāśītitamaḥ sargaḥ //८