Scripture Library

Yoga Vasistha · Chapter 6.78

6.78.78

aṣṭasaptatitamaḥ sargaḥ

6.78.1

śrīvasiṣṭha uvāca /
vātavarṣahimotpātapātabhagne dharātale /
jaḍavego'gamadvṛddhiṃ kalāviva mahīpatiḥ

6.78.2

gaṅgāpravāhapatitadhārāpātavivardhitaḥ /
saritsahasraiḥ sahasā merumandarabhāsuraiḥ

6.78.3

ādityapathasaṃprāptakandaro jaḍamantharaḥ /
ekārṇavaḥ samucchūna āsīnmūrkha iveśvaraḥ

6.78.4

vipulāvartavṛttyāttavivṛttādrijarattṛṇaḥ /
sphurattuṅgataraṅgāgranigīrṇādityamaṇḍalaḥ

6.78.5

merumandarakailāsavindhyasahyajalecaraḥ /
galitāvanipaṅkāntarlīnavyālamṛṇālakaḥ

6.78.6

ardhadagdhadrumavanavyūhaśaivalasaṃkaṭaḥ /
trailokyabhasmasaṃsṛṣṭa āsītkardamakutsitaḥ

6.78.7

nabhaḥstambhavṛhaddhānottālabhāskarapuṣkaraḥ /
dhārājālamahāmbhodavilīnanalinīdalaḥ

6.78.8

ḍiṇḍīraparvataprāntanadadunmattavāridaḥ /
bhramadindrānilārkendupurapattanapūraṇaiḥ

6.78.9

kāṣṭhavatprohyamāṇograsurāsurajanotkaraḥ /
śanaiḥ kramocchūnatayā lihannādityamaṇḍalam

6.78.10

tarattāratarārāvadhārādharasamudbhavaiḥ /
budbudaiḥ parisaṃdigdhaprohyamāṇamahācalaḥ

6.78.11

bhramadbudbudaviśrāntabhrāntakalpāntavāridaḥ /
uttālaistairanādhāraiḥ paśyannaparavāridam

6.78.12

mahāpravāhavāryoghaghoṣaghuṃghumitāmbaraḥ /
ekapravāhamahitasavyomakulaparvataḥ

6.78.13

caṇḍavātakṛtāpūrvajalaughakulaparvataiḥ /
mahāghuraghurārāvaghargharogramahārayaḥ

6.78.14

brahmāṇḍakhaṇḍasaṃghaṭṭaparāvṛttibhiruddhataḥ /
kurvanyojanalakṣāṇi vitatānyunnatāni ca

6.78.15

tṛṇairiva taraṅgeṣu dolāndolanamadribhiḥ /
kurvadbhirupalāghātabhagnabhāskaramaṇḍalaḥ

6.78.16

śūnyabrahmāṇḍaviṣulajalaghātakulāyake /
nīlānacalakākolāñjahansalilajālakaiḥ

6.78.17

mṛtāmṛtamahadbhūtamajjanonmajjanākulān /
taraṃgamakarāvartapratibimbānvitāniva

6.78.18

mṛtaśiṣṭānpurabhraṣṭānphenādritaṭikoṭiṣu /
dadhajjalabalaśrāntāṃstridaśānmaśakāniva

6.78.19

vipulādyatanākāśavipulānambubududān /
sadvasrasaṃkhyānkalayaṃllocanānīva vāsavaḥ

6.78.20

śaradvyomasamābhgegairvaladbhirbudgudekṣaṇaiḥ /
paśyanniva nadīdhārānbheghānātāmrapūrakān

6.78.21

puṣkarāvartakābhrāṇāṃ bahubhirvīcimaṇḍalaiḥ /
kurvannāliṅganānīva sapakṣādrivadutthitaiḥ

6.78.22

trijagadgrāsasaṃtṛptaḥ pragāyanniva ghargharaiḥ /
svairnṛtyanniva cogrādrikaṭakairvīcidordrumaiḥ

6.78.23

nadīdhārādharairūrdhve madhye dagdhairdharādharaiḥ /
adho dharādharairnāgairadharaḥ paṅkagairvṛtaḥ

6.78.24

dhārātripathagāpūrairnipatadbhirnirantaram /
magnonmagno hyamānādriśṛṅgaḍiṇḍīrabudbudaḥ

6.78.25

uhyamānadalatsvargakhaṇḍakrandannabhaścaraḥ /
vahadvidyādharīvṛndapadminīsundarāntaraḥ

6.78.26

ekārṇavapayaḥpūrairghargharārāvaraṃhasi /
trailokyakhaṇḍasaṃhāre prohyamāṇe mahāmbhasi

6.78.27

nāsītkaścitparitrātā hantā'vīcivaśo'pi ca /
śaknoti kaḥ paritrātuṃ kālena kavalīkṛtam

6.78.28

nākāśamāsīnna diganta āsī-
dadho'pi nāsīnna tadūrdhvamāsīt /
bhūtaṃ na āsīnna ca sarga āsī-
dāsītparaṃ kevalameva vāri

6.78.78

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe u० pā० ekārṇavavarṇanaṃ nāmāṣṭasaptatitamaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0