Yoga Vasistha · Verses 6.75-2

pañcasaptatitamaḥ sargaḥ

śrīvasiṣṭha uvāca /
atha tasya gurorvaktrādityākarṇya bhagīrathaḥ /
manasyāhitakartavyaḥ svavyāpāraparo'bhavat

tataḥ katipayeṣveva vāsareṣu gateṣu saḥ /
agniṣṭomamakhaṃ cakre sarvatyāgekasiddhaye

gobhūmyaśvahiraṇyādi dadau dhanamaśeṣataḥ /
dvijebhyo nijabandhubhyo guṇyaguṇyavicārayan

divasatrayamātreṇa sarvameva parityajan /
asumātrāvaśeṣo'sāvāsīdrājā bhagīrathaḥ

atha sarvārthariktaṃ tatkhinnaprakṛtipaurakam /
sīmāntine tṛṇamiva rājyaṃ svamaraye dadau

ākrānte dviṣatā rājye muniḥ sadmani maṇḍale /
adhovāsovaśeṣo'sau nirjagāma svamaṇḍalāt

yatra na jñāyate nāmnā yatra na jñāyate mukhāt /
tatra grāmeṣvaraṇyeṣu dūreṣūvāsa dhairyavān

ityalpenaiva kālena praśāntasakalaiṣaṇaḥ /
parameṇa śamenāsāvāpa viśrāntimātmani

bhramandvīpāni bhūpīṭhe kadācitkālayogataḥ /
avaśaḥ śatruṇākrāntaṃ svameva prāpa tatpuram

nānāgārāṃśca tatrāsau pravāhapatitāṃśca tān /
paurāṃśca mantriṇaścaiva śamī bhikṣāmayācata

vividuste nṛpaṃ paurā mantriṇaśca bhagīratham /
pūjayāmāsuratha taṃ saviṣādāḥ saparyayā

prabho rājyaṃ gṛhāṇeti prārthito'pyariṇā muniḥ /
nādatte'nādṛtāśeṣastṛṇamapyaśanādṛte

katiciddivasāṃstatra nītvā'nyatra jagāma saḥ /
bhagīratho'yaṃ hā kaṣṭamiti lokena śocitaḥ

athānyatropaśāntātmā pariviśrāntadhīḥ sukhī /
ātmārāmaṃ kadācittu sa prāpa tritalaṃ gurum

svameva svāgataṃ kṛtvā tena sārdhaṃ bhagīrathaḥ /
kaṃcitkālamuvāsādrau vane grāme pure jane

samatāmupayātau tau guruśiṣyau samau sthitau /
kalayāmāsatuḥ svasthau vinodaṃ dehadhāraṇam

kimayaṃ dhāryate dehaḥ kiṃ vānenojjhitena naḥ /
yathākramaṃ yathācāraṃ tiṣṭhatveṣa yathāsthitam

iti niścitya tiṣṭhantau tau vanādvanagāminau /
anānandaṃ parānandaṃ nāsukhaṃ na ca madhyamam

dhanāni vājivibhavādyaiśvaryaṃ cāṣṭadhoditam /
siddhairapyarpitaṃ tuṣṭairmenāte jarjaraṃ tṛṇam

svakarmaṇaiva deho'yaṃ yāvatsattvamanicchayā /
dhāraṇīya iti svena karmaṇaivātha tasthatuḥ

abhinanandaturāgatamuttamau
nijasamācaraṇakramajaṃ munī /
sukhamasaukhyamabhīpsitavarjitau
samasame'tisamau śaminau svataḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० bhagīrathanirvāṇaṃ nāma pañcasaptatitamaḥ sarga