Yoga Vasistha · Verses 6.74-2

śrīrāma uvāca /
yathā cittacamatkṛtyā rājño gaṅgāvatāraṇam /
bhagīrathasya saṃpannaṃ tanme kathaya bho prabho

śrīvasiṣṭha uvāca /
āsīdbhagīratho nāma rājā paramadhārmikaḥ /
bhuvaḥ samudrayuktāyā maṇḍalītilakopamaḥ

saṃkalpānantaraṃ prāptā yathābhimatamarthinaḥ /
candraprasannavadanādasmāccintāmaṇeriva

sādhūnāṃ yo vyavasthārthaṃ dhanānyavirataṃ dadau /
tṛṇamātramupādatte kvaciccintāmaṇiryathā

vajrasāramiva protamujvalannemi yo'bhinat /
adho maṇirayoyantraṃ sarvadurjanaceṣṭitam

adhūmavahnidehaśrīḥ śrānto'pi dainyamapyalam /
tamo'harannṛṇāṃ naiśaṃ dyumaṇirveśmanāmiva

kirannagnikaṇāsāramabhitaḥ svapratāpajam / /
madhyāhnasūryakāntāgniriva jvalati yo'riṣu

mṛduśītalasaṃsparśo yaḥ samāhlādayanmanaḥ /
sujñānāṃ dravati snigdhasyendorindumaṇiryathā

jagadyajñopavītasya svargapātālavāhinaḥ /
gaṅgāvāhasya yenāsyāṃ tṛtīyaḥ pūrito guṇaḥ

agastyaśoṣito'mbhodhirgaṅgāpūreṇa pūritaḥ /
yena duṣpūrabhūto'pi mahāsārtho'rthināmiva

gaṅgāsopānapaddhatyā yena pātālavāsinaḥ /
yojitā brahmaṇo loke bāndhavā lokabandhunā

brahmāṇaṃ śaṃkaraṃ jahnuṃ tapasārādhayaṃśca yaḥ /
bhūyobhūyo yayau khedamaśūnyādhyavasāyinaḥ

yauvane vartamānasya tasya bhūmipaterapi /
pravicārayato lokayātrāṃ paryākulāmimām

suvirāgacamatkāravicārakaṇikodabhūt /
vayasyapi ca tāruṇye daivādvallī marāviva

ekānte cintayāmāsa mahīpatirasāviti /
jagadyātrāmimāṃ nityamasamañjasamākulam

punardinaṃ punaḥ śyāmā dānādānaśataṃ punaḥ /
tadeva bhuktavirasaṃ lakṣyate karma kurvatām

yena prāptena loke'sminna prāpyamavaśiṣyate /
tatkṛtaṃ sukṛtaṃ manye śeṣaṃ karma viṣūcikā

punaḥpunaḥ paryuṣitaṃ karma kurvanna lajjate /
mūḍhbuddhirabuddhistu kaḥ kuryātkila bālavat

athaikadodvignamanāḥ kadācittritalaṃ gurum /
ekāntaṃ saṃsṛterbhītaḥ samapṛcchadbhagīrathaḥ

bhagīratha uvāca /
antaḥśūnyāsu suciraṃ bhramatsaṃsāravṛttiṣu /
araṇyānīṣu caitāsu bhṛśaṃ khinnā vayaṃ vibho

jarāmaraṇamohādirūpāṇāṃ bhavakāriṇām /
bhagavansarvaduḥkhānāṃ kathamantaḥ prajāyate

tritala uvāca /
cirasāmyātmanotthena nirvibhāgavilāsinā /
rājan jñeyāvabodhena pūrṇena bharitātmanā

kṣīyante sarvaduḥkhāni truṭyanti granthayo'bhitaḥ /
saṃśayāḥ samatāṃ yānti sarvakarmāṇi cānagha

jñeyaṃ vidurathātmānaṃ saṃśuddhaṃ jñaptirūpiṇam /
sa ca sarvagato nityaṃ nāstameti na codayam

bhagīratha uvāca /
cinmātraṃ nirguṇaṃ śāntamasti nirmalamacyutam /
dehādi netaratkiṃciditi vedmi munīśvara

kiṃ tatra pratipattirme sphuṭatāmeti netarā /
etāvanmātrasaṃvittiḥ syāmahaṃ bhagavankatham

tritala uvāca /
jñānena jñeyaniṣṭhatvameti ceto hṛdambare /
tataḥ sarvavapurbhūtvā bhūyo jīvo na jāyate

asaktiranabhiṣvaṅgaḥ putradāragṛhādiṣu /
nityaṃ ca samacittatvamiṣṭāniṣṭopapattiṣu

ātmano'nanyayogena tadbhāvanamanāratam /
viviktadeśasevitvamaratirjanasaṃsadi

adhyātmajñānanityatvaṃ tattvajñānārthadarśanam /
etajjñānamiti proktamajñānaṃ tadato'nyathā

rāgadveṣakṣayākāraṃ saṃsāravyādhibheṣajam /
ahaṃbhāvopaśāntau tu rājan jñānamavāpyate

bhagīratha uvāca /
śarīre'smiṃścirārūḍho girau taruriva svake /
ahaṃbhāvo mahābhāga vada me tyajyate katham

tritala uvāca /
pauruṣeṇa prayatnena tyaktvā bhogaughabhāvanām /
gatvā vikasitāṃ sattāmahaṃkāro vilīyate

yantraṇāpañjaraṃ yāvadbhagnaṃ lajjādinākhilam /
akiṃcanatvaśeṣeṇa sphuṭā tāvadahaṃkṛtiḥ

sarvametaddhiyā tyaktvā yadi tiṣṭhasi niścalaḥ /
tadahaṃkāravilaye tvameva paramaṃ padam

śāntāśeṣaviśeṣaṇo vigatabhīḥ saṃtyaktasarvaiṣaṇo
gatvānūnamakiṃcanatvamariṣu tyaktvā samagrāṃ śriyam /
śāntāhaṃkṛtirastadehakalanasteṣveva bhikṣāmaṭa
nmāmapyujjhitavānalaṃ yadibhavasyuccaistvamuccairasi

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० bhagīrathopadeśo nāma catuḥsaptatitamaḥ sargaḥ