Yoga Vasistha · Verses 6.73-2

trisaptatitamaḥ sargaḥ

śrīvasiṣṭha uvāca /
iti rājamukhācchrutvā vetālaḥ śāntimāyayau /
bhāvitātmatayā tatra vicārocitayā dhiyā

upaśāntamanā bhūtvā matvaikāntamaninditam /
babhūvāvicaladhyānī vismṛtya viṣamāṃ kṣudhām

etadrāma mayoktaṃ te vetālapraśnajālakam /
evaṃkrameṇa cidaṇau tenedaṃ saṃsthitaṃ jagat

cidaṇoḥ kośagaṃ viśvaṃ vicāreṇa vilīyate /
kāyo vetālakasyeva śiṣyate yatpadaṃ tu tat

saṃhṛtya sarvataścittaṃ stimitenāntarātmanā /
svabhāvāpatitaṃ kurvanniricchaṃ tiṣṭha śāntadhīḥ

ākāśaviśadaṃ kṛtvā manasaiva mano mune /
tiṣṭhaikaśamaśāntātmā sarvatra samadarśanaḥ

sthirabuddhirasaṃmūḍho yathāprāptānuvartinaḥ /
rājño bhagīrathasyeva duḥsādhyamapi siddhyati

saṃpūrṇaśāntamanasaḥ paritṛptavṛtte-
rnityaṃ same sukhamayātmani tiṣṭhato'ntaḥ /
siddhyanti durlabhatarā api vāñchitārthā
gaṅgāvatāra iva sāgarakhātavastu

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० vetālākhyānaṃ nāma trisaptatitamaḥ sargaḥ