યોગવાસિષ્ઠ · શ્લોક 6.73-2

ત્રિસપ્તતિતમઃ સર્ગઃ

શ્રીવસિષ્ઠ ઉવાચ ।
ઇતિ રાજમુખાચ્છ્રુત્વા વેતાલઃ શાન્તિમાયયૌ ।
ભાવિતાત્મતયા તત્ર વિચારોચિતયા ધિયા

ઉપશાન્તમના ભૂત્વા મત્વૈકાન્તમનિન્દિતમ્ ।
બભૂવાવિચલધ્યાની વિસ્મૃત્ય વિષમાં ક્ષુધામ્

એતદ્રામ મયોક્તં તે વેતાલપ્રશ્નજાલકમ્ ।
એવંક્રમેણ ચિદણૌ તેનેદં સંસ્થિતં જગત્

ચિદણોઃ કોશગં વિશ્વં વિચારેણ વિલીયતે ।
કાયો વેતાલકસ્યેવ શિષ્યતે યત્પદં તુ તત્

સંહૃત્ય સર્વતશ્ચિત્તં સ્તિમિતેનાન્તરાત્મના ।
સ્વભાવાપતિતં કુર્વન્નિરિચ્છં તિષ્ઠ શાન્તધીઃ

આકાશવિશદં કૃત્વા મનસૈવ મનો મુને ।
તિષ્ઠૈકશમશાન્તાત્મા સર્વત્ર સમદર્શનઃ

સ્થિરબુદ્ધિરસંમૂઢો યથાપ્રાપ્તાનુવર્તિનઃ ।
રાજ્ઞો ભગીરથસ્યેવ દુઃસાધ્યમપિ સિદ્ધ્યતિ

સંપૂર્ણશાન્તમનસઃ પરિતૃપ્તવૃત્તે-
ર્નિત્યં સમે સુખમયાત્મનિ તિષ્ઠતોઽન્તઃ ।
સિદ્ધ્યન્તિ દુર્લભતરા અપિ વાઞ્છિતાર્થા
ગઙ્ગાવતાર ઇવ સાગરખાતવસ્તુ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષુ નિર્વાણપ્રકરણે પૂ૦ વેતાલાખ્યાનં નામ ત્રિસપ્તતિતમઃ સર્ગઃ