Yoga Vasistha · Verses 6.72-2

dvisaptatitamaḥ sargaḥ

rājovāca /
kālasattā nabhaḥsattā spandasattā ca cinmayī /
śuddhacetanasattā ca sarvamityādi pāvanam

paramātmamahāvāyau rajaḥ sphurati cañcalam /
kusumāṅga ivāmodastadatadrūpakaṃ svataḥ

jagadākhye mahāsvapne svapnātsvapnāntaraṃ vrajat /
rūpaṃ tyajati no śāntaṃ brahmaśāntatvabṛṃhaṇam

rambhāstambho yathā patramātramevāntarāntaram /
antarantastathedaṃ hi viśvaṃ brahma vivartyapi

sadbrahmātmādibhiḥ śabdairyadetābhirvigīyate /
śūnyamavyapadeśaṃ te na tatkiṃcicca kiṃcana

yā yā vibhāvyate sattā sā sānubhavanirmitān /
rambhāstambhavadetāvaccinmātramamalaṃ tatam

sūkṣmatvādapyalabhyatvātparamātmā paro'ṇukaḥ /
anantatvādasāveva prāpto mervādimūlatām

aṇorapyatyanantasya puṃso'sya jagadādyapi /
paramāṇuvadābhāti pratītatvādarūpavat

paro'ṇureṣo'labhyatvātpūrakatvānmahāgiriḥ /
sarvāvayavarūpo'pi nirastāvayavaḥ pumān

asya vai jñaptimātrasya majjāmātraṃ jagattrayī /
vijñānamātramadhyaṃ hi sādho viddhi jagattrayam

vijñānamātrakalanākalitaṃ jaganti
śāntasvabhāvasukumāramanantarūpam /
vetālabālaka padaṃ tadalaṅghanīya-
mevaṃ svayaṃ samanubhāvaya śāntamāssva

ityārṣe śrīvāsiṣṭhamahārāmāyaṇe vālmīkīye ३० mokṣopāyeṣu nirvāṇaprakaraṇe pū० vetālapraśnabhedo nāma dvisaptatitamaḥ sargaḥ