યોગવાસિષ્ઠ · શ્લોક 6.72-2

દ્વિસપ્તતિતમઃ સર્ગઃ

રાજોવાચ ।
કાલસત્તા નભઃસત્તા સ્પન્દસત્તા ચ ચિન્મયી ।
શુદ્ધચેતનસત્તા ચ સર્વમિત્યાદિ પાવનમ્

પરમાત્મમહાવાયૌ રજઃ સ્ફુરતિ ચઞ્ચલમ્ ।
કુસુમાઙ્ગ ઇવામોદસ્તદતદ્રૂપકં સ્વતઃ

જગદાખ્યે મહાસ્વપ્ને સ્વપ્નાત્સ્વપ્નાન્તરં વ્રજત્ ।
રૂપં ત્યજતિ નો શાન્તં બ્રહ્મશાન્તત્વબૃંહણમ્

રમ્ભાસ્તમ્ભો યથા પત્રમાત્રમેવાન્તરાન્તરમ્ ।
અન્તરન્તસ્તથેદં હિ વિશ્વં બ્રહ્મ વિવર્ત્યપિ

સદ્બ્રહ્માત્માદિભિઃ શબ્દૈર્યદેતાભિર્વિગીયતે ।
શૂન્યમવ્યપદેશં તે ન તત્કિંચિચ્ચ કિંચન

યા યા વિભાવ્યતે સત્તા સા સાનુભવનિર્મિતાન્ ।
રમ્ભાસ્તમ્ભવદેતાવચ્ચિન્માત્રમમલં તતમ્

સૂક્ષ્મત્વાદપ્યલભ્યત્વાત્પરમાત્મા પરોઽણુકઃ ।
અનન્તત્વાદસાવેવ પ્રાપ્તો મેર્વાદિમૂલતામ્

અણોરપ્યત્યનન્તસ્ય પુંસોઽસ્ય જગદાદ્યપિ ।
પરમાણુવદાભાતિ પ્રતીતત્વાદરૂપવત્

પરોઽણુરેષોઽલભ્યત્વાત્પૂરકત્વાન્મહાગિરિઃ ।
સર્વાવયવરૂપોઽપિ નિરસ્તાવયવઃ પુમાન્

અસ્ય વૈ જ્ઞપ્તિમાત્રસ્ય મજ્જામાત્રં જગત્ત્રયી ।
વિજ્ઞાનમાત્રમધ્યં હિ સાધો વિદ્ધિ જગત્ત્રયમ્

વિજ્ઞાનમાત્રકલનાકલિતં જગન્તિ
શાન્તસ્વભાવસુકુમારમનન્તરૂપમ્ ।
વેતાલબાલક પદં તદલઙ્ઘનીય-
મેવં સ્વયં સમનુભાવય શાન્તમાસ્સ્વ

ઇત્યાર્ષે શ્રીવાસિષ્ઠમહારામાયણે વાલ્મીકીયે ૩૦ મોક્ષોપાયેષુ નિર્વાણપ્રકરણે પૂ૦ વેતાલપ્રશ્નભેદો નામ દ્વિસપ્તતિતમઃ સર્ગઃ