Yoga Vasistha · Chapter 6.7

bhuśuṇḍa uvāca /
tatastasya mayā brahmaṃstacchrutvā pāvanaṃ vacaḥ /
idamuktaṃ yathāpṛṣṭaṃ suspaṣṭapadayā girā

sādhu vidyādharādhīśa diṣṭyā buddho'si bhūtaye /
bhavāndhakūpakuharāccireṇotthānamicchasi

pāvanīyaṃ tava matī rājate ghanarūpiṇī /
vivekenānaleneva kanakadravasaṃtatiḥ

upadeśagirāmarthamādatte hārihelayā /
mukure nirmale dravyamayatnenaiva bimbati

yadidaṃ vacmi tatsarvamomityādātumarhasi /
asmābhiściramanviṣṭaṃ nātra kāryā vicāraṇā

yatkiṃcitsvadate'ntaste budhyasvābodhamutsṛjan /
nāsi tvaṃ ciramapyantaḥ prekṣito'pi na labhyase

nāhaṃtvamasti na jagaditi niścayinastava /
sarvamasti śivaṃ tacca na duḥkhāya sukhāya te

kimajñatvājjagajjātaṃ jagato'tha kimajñatā /
vicāryāpīti no vidma ekatvādalametayoḥ

mṛgatṛṣṇāmbuvadviśvamavastutvātsadapyasat /
yaścedaṃ bhāti tadbrahma na kiṃcitkiṃcideva vā

mṛgatṛṣṇāmbuvadviśvaṃ nāsti tvamathavāsti ca /
pratibhāso'pi nāstyatra tadabhāvādataḥ śivam

viśvabījamahaṃtvaṃ tvaṃ viddhi tasmāddhi jāyate /
sādryabdhyurvīnadīśādijagajjaraṭhapādapaḥ

ahaṃtvabījādaṇuto jāyate'sau jagaddrumaḥ /
tasyendriyarasāḍhyāni mūlāni bhuvanāni hi

tārakājālakalikā ṛkṣaughaḥ korakotkaraḥ /
vāsanāgucchavisarāḥ pūrṇacandraḥ phalālayaḥ

svargādayo bṛhadvargā mahāviṭapakoṭarāḥ /
merumandarasahyādigirayaḥ patrarājayaḥ

saptābdhayo'grasutayaḥ pātālaṃ mūlakoṭaram /
yugāni ghuṇavṛndāni parvāṇi guṇapaṅktayaḥ

ajñānamutpattimahī narā vihagakoṭayaḥ /
upalambho bṛhatstambho davo nirvāṇanirvṛtiḥ

rūpālokamanaskārā vividhāmodavṛttayaḥ /
vanaṃ vipulamākāśaṃ śuktijālaṃ mukhatvacaḥ

vicitraśākhā ṛtava upaśākhā diśo daśa /
saṃvidrasamahāpūro vātaspando nivartanaḥ

candrārkarucayo lolā majjanonmajjanonmukhāḥ /
ramyāḥ kusumamañjaryastimiraṃ bhramarabhramaḥ

pātālamāśāgaṇamantarikṣa-
māpūrya tiṣṭhatyasadeva sadvat /
tasyānahantāgnihate'hamartha-
bīje punarnāsti sato'pi rohaḥ

ityārṣe śrīvāsiṣṭhamahārāmāyaṇe vā० de० mokṣo० nirvāṇaprakaraṇe utta० vidyādharopākhyāne jagadvṛkṣabījavarṇanaṃ nāma saptamaḥ sargaḥ