Yoga Vasistha · Chapter 6.68

aṣṭaṣaṣṭitamaḥ sargaḥ

vidyādharyuvāca /
tataḥ prācīnamabhyāsaṃ bodhadhāraṇayāmale /
kurvaḥ prakaṭatāṃ tena jagadeṣyati śailagam

śrīvasiṣṭha uvāca /
yuktiyukte tayetyukte vidyādharyā dharorasi /
baddhapadmāsano'thāhaṃ samādhābudito'bhavam

sarvārthabhāvanātyāge cinmātraikāntabhāvitaḥ /
atyajaṃ tamahaṃ pūrvakathārthakalanāmalam

atha cidvyomatāṃ prāptaḥ parāṃ dṛṣṭimahaṃ gataḥ /
śaratsamayasaṃprāptau vyoma nirmalatāmiva /

tataḥ satyāvadhānaikaghanābhyāsena dehake /
mamādhibhautikabhrāntirnūnamastamupāgatā /

udayāstamayonmuktā satatodayamayyapi /
mahācidvyomatāsvacchā proditeva tadābhavat

atha paśyāmyahaṃ yāvatsvasyaivāmalatejasā /
vastutastu na cākāśaṃ nopalaḥ parameva tat /

paramārthaghanaṃ svacchaṃ tattathā bhāti tādṛśam /
tathābhāvanayā hyātmā madīyo dṛṣṭavāṃstathā

yathā svapne sumahatī dṛṣṭā gehagatā śilā /
vyomaiva kevalaṃ tadvatsuśuddhaṃ cinnabhaḥśilā

svayaṃ svapnānvito'nyasya svapnapuṃstvaṃ gato naraḥ /
svapne'jñānaprabuddhasya yādṛktādṛksvarūpataḥ

svapnasthānāṃ śiraśchinnaṃ yeṣāṃ te saṃsṛtau sthitāḥ /
kālena jñānalābhena vinā kurvantu kiṃ kila

yodhaḥ kālena bhavati mahāmohavatāmapi /
yasmānna kiṃcanāpyasti brahmatattvādṛte'kṣayam

atastacciddhanaṃ svacchaṃ brahmākāśaṃ śilākṛti /
dṛṣṭaṃ mayā tathā tatra na tu pṛthvyādi satkvacit

bhūtānāmādisarge yacchuddhaṃ yatpāramārthikam /
vapustadeva hyeteṣāṃ dhyānalabhyamavasthitam

brāhmaṃ vapurhi bhūtānāmātmīyaṃ yatpurātanam /
tadevādya manorājyaṃ saṃkalpa iti kathyate

sattātivāhiko dehastatparaṃ paramārthataḥ /
pratyakṣaṃ paramaṃ yattattadādyaṃ kacanaṃ citaḥ

udyatprathamamadhyakṣaṃ jīvasya prathamaṃ vapuḥ /
manaḥ pratyakṣamityuktaṃ tattenādyaiva durdhiyā

yogipratyakṣamityuktaṃ manaḥpratyakṣamityapi /
tatsvameva cito rūpaṃ gatamevānyatāṃ mudhā

idamadyatanaṃ nāma pratyakṣamasadutthitam /
asatpratyakṣameveti viddhi pratyakṣamaṅga tat

aho nu citrā māyeyaṃ prākpratyakṣe parokṣatā /
nirṇītāsmiṃstvanadhyakṣe pratyakṣakalanāgatā

ātivāhikadehatvaṃ pratyakṣaṃ prathamoditam /
satyaṃ sarvagataṃ viddhi māyaiva tvādhibhautikam ०

anubhūtāpi nāstyeva hemnaḥ kaṭakatā yathā /
tathātivāhikasyādhibhautikatvaṃ na vidyate

bhramamabhramatāṃ yātamabhramaṃ bhramatāṃ gatam /
vetti jīvo vicāreṇa vināho nu vimūḍhatā

ādhibhautikadeho'yaṃ vicāreṇa na labhyate /
ātivāhikadehastu kila lokadvaye'kṣayaḥ

ādhibhautikacidrūḍhā hyātivāhikadehake /
marau marīcikāsveva yathā mithyaiva vāridhīḥ

jātādhibhautikī saṃvidātivāhikacitkrame /
dehadṛṣṭivaśātprauḍhā sthāṇau puruṣadhīriva

śuktau rajatatā tāpe jalatendau yathā dvitā /
ādhibhautikatā tadvanmāyayaivātivāhike

yadasattatkṛtaṃ satyaṃ yatsatyaṃ tadasatkatam /
aho nu mohamāhātmyaṃ jīvasyāsyāvicārajam

yogipratyakṣamevāsti kiṃcidasti tu mānasam /
yasmāllokadvayācārastābhyāmeva prasidhyati

ādyaṃ pratyakṣamutsṛjya yaḥ satye'sminkṛtasthitiḥ /
pratyakṣe mṛgatṛṣṇāmbu pītvā sa sukhamāsthitaḥ

yatsukhaṃ duḥkhamevāhuḥ kṣaṇanāśānubhūtibhiḥ /
akṛtrimamanādyantaṃ yatsukhaṃ tatsukhaṃ viduḥ

pratyakṣeṇaivamadhyakṣaṃ pratyakṣaṃ pravicāryatām /
yadādyaṃ tatsadadhyakṣaṃ tatpratyakṣeṇa dṛśyatām

lokatrayānubhavadaṃ tyaktvā pratyakṣamaihikam /
māyātmakaṃ yo gṛhṇāti nāsti mūḍhatamastataḥ

ātivāhikamevaiṣāṃ bhūtānāṃ vidyate vapuḥ /
atrādhibhautikavyāptirasatyaiva piśācikā

ajātasaṃkalpamayaṃ pratyakṣaṃ satkathaṃ bhavet /
svayameva na yatsatyaṃ tatsyātkāryakaraṃ katham

yatra pratyakṣamevāsadanyatkiṃ tatra sadbhavet /
kva tatsatyaṃ bhavedvastu yadasiddhena sādhyate

pratyakṣa eva bhāvatve naṣṭe kvevānumādayaḥ/
uhyante vāraṇā yatra tatrorṇāyuṣu kā kathā

ataḥ pramāṇasaṃsiddhaṃ dṛśyaṃ nāstyeva kutracit /
ananyadidamastīva tattadbrahmaghanaṃ ghanam

svapne draṣṭuḥ khamevādrirgṛhe nānyasya vai yathā /
tathā tadbhāvanavatorāvayoḥ sā śilaiva cit

ayaṃ śaila idaṃ vyoma jagadetadidaṃ tvaham /
iti cinmaya ātmāntaḥ khaṃ camatkurute svayam

paśyatyetatprabuddhātmā nāprabuddhaḥ kadācana /
śrotuḥ kathārthasaṃvittirnāśroturbhavati kvacit

aprabuddhamiti bhrāntireveyaṃ satyatāṃ gatā /
kṣībasya susthirā eva nṛtyanti taruparvatāḥ

sarvatrāpratihatamekarūpabodhaṃ
pratyakṣaṃ śivamanubudhya citsvarūpam /
pratyakṣāntaramiha pelavaṃ śrayante
ye mūḍhāstṛṇatanubhiḥ śaṭhairalaṃ taiḥ

ityārṣe śrīkasiṣṭhamahārāmāyaṇe vālmīkīye de०mo० ni०u०pā० pramāṇāpratisiddhyā dṛśyānupapattivarṇanaṃ nāmāṣṭaṣaṣṭitamaḥ sargaḥ