Yoga Vasistha · Verses 6.63-2

triṣaṣṭitamaḥ sargaḥ

śrīvasiṣṭha uvāca /
sa kadāciddadarśātha rudraṃ rudrapure khagaḥ /
vairiñcanalinīnālalīlālābhena līlayā

tatra buddhirabhūttasya rudro'hamiti niścitā /
pratibimbavadādarśe drāgityeva hi bimbitā

rudrabhūtavapustatra tanuṃ tatyāja tāmasau /
gandhaḥ pavanatāṃ gacchankusumastabakaṃ yathā

sa rudro rudrabhavane vijahāra yathecchayā /
taistaiḥ śivapurācārairgaṇakoṭigariṣṭhayā

rudrastvanuttamajñānavilāsaikatayā tayā /
svapnaśeṣaṃ ca vṛttāntamapaśyatprāktanaṃ dhiyā

nirāvaraṇavijñānavapuḥ sa bhagavāṃstadā /
uvāca svayamekānte svasvapnaśatavismitaḥ

aho tu citrā māyeyaṃ tatā viśvavimohinī /
asatyaivāpi sadrūpā marubhūmiṣu vārivat

iti prathamamājñātaṃ cidyo'haṃ cittatāṃ gataḥ /
sarvasaṃpannasarvajñagaganādivibhāvanāt

yadṛcchayā sthito jīvo bhūtatanmātrarañjitaḥ /
kasmiṃścidabhavatsarge bhikṣurakṣubhito'bhitaḥ

tenāvayavabandhena bahiḥ svairavihāriṇī /
līlā'vilulitākārā yadā ramyeti bhāvataḥ

sarvabhāvopamardena tadabhyāsavaśāttadā /
tāmeva so'nvabhūdbhikṣustyaktvānyaṃ mananodayam

camatkṛtiścetasi yā rūḍhā saiva vijṛmbhate /
vallī tyajati naidāghī pītamapyambu mādhavam

sa bhikṣurjīvaṭo bhūtvā janturjaraṭhavāsanaḥ /
teṣu deheṣu babhrāma randhreṣviva pipīlikā

ātmani dvijabhaktatvātso'paśyaddvijatāmatha /
bhāvābhāvaviparyāse balavāneva vardhate

sāmantatāmavāpāsau vipraḥ saṃtatacintitām /
sātatyena rasaḥ patiḥ phalatāmeti pādape

rājyārthaṃ dharmakāryāṇāṃ kartṛtvātso'bhavannṛpaḥ /
sakāmukatayā rājā surastrītvamavāpa ha

lolā locanalobhena sā mṛgī rasaśālinī /
babhūva vāsanāmohaścāho duḥkhāya jantuṣu

mṛgī sā bata cittasthā babhūva vipine latā /
avaśyaṃbhāvi lavanaṃ latikā'nubabhūva ha

antaḥsaṃjñācirābhyastaṃ bhramaratvamathātmani /
sā'paśyatsāvamardena tadā tadbhāvabhāvitā

savāraṇakhurakṣodamanubhūyātha bhāvitam /
bhūyobhūyaḥ prababhrāma mahāsaṃsṛtisaṃbhramān

saṃsāraśataparyante rudraḥ so'hamahaṃ sthitaḥ /
asminsaṃsārasaṃrambhe svamanomātrasaṃbhrame

evamatyantacitrāsu saṃsārāraṇyabhūmiṣu /
bahvīṣvahamatibhrāntastvaśūnyāsviva bhūriśaḥ

kasmiṃścidabhavaṃ sarge tvahaṃ jīvaṭanāmakaḥ /
kasmiṃścidbrāhmaṇaśreṣṭhaḥ kasmiṃścidvasudhādhipaḥ

haṃsaḥ padmavane bhūtvā vindhyakacche ca vāraṇaḥ /
hariṇo dehayantrādau daśāmahamimāṃ gataḥ

atra varṣasahasrāṇi caturyugaśatāni ca /
samatītānyanantāni dinartucaritāni ca

mama prathamameva prākcalitasya parātpadāt /
tattvajñānitayā rūḍho bhikṣutve yogyatākramaḥ

bhūyobhūyo'pyatikramya gataśca brahmahaṃsatām /
sa eva prāktano'bhyāsaḥ phalitaḥ saṃgamodayāt

dṛḍhābhyāso ya evāsya jīvasyodetyavighnataḥ /
so'tyantamarasenāpi tamevāśvanudhāvati

kākatālīyayogena kadācitsādhusaṃgamāt /
aśubho bhāvanābhyāso jīvasya vinivartate

saṃgatyadhigataṃ caiṣa kevalaṃ svodayaṃ prati /
prāktano vāsanābhyāso hāturudyamamīkṣate

yaccehābhyasyate'jasraṃ yacca dehāntare'pi ca /
jāgratsvapneṣvasadapi tatsadityanubhūyate

tattadarthakriyākāri duḥkhāya ca sukhāya ca /
udeti bhāvanaṃ tasmādbhāvanābhāvanaṃ jayaḥ

bhāvanaiva svamātmānaṃ deho'yamiti paśyati /
asattāmātravistāraṃ gulmakatvamivāṅkuraḥ

bhāvanā prekṣyamāṇaiṣā na kiṃcidiha śiṣyate /
na ca vidyata eveti tadbhrameṇālamastu naḥ

bhramasya jāgatasyāsya jātasyākāśavarṇavat /
asaṃvedanamātraikaṃ mārjanāyālamastu naḥ

asanmayīsvarūpaiṣā paraṃ sattaiva lālanī /
vartate cedvinodāya kiṃcitsā na kariṣyati

tattānsarvānsvasaṃsārānutthāyālokayāmyaham /
samyagālokadānena tebhya ekīkaromyaham

iti saṃcintya rudro'sau taṃ sargaṃ prajagāma ha /
yatra bhikṣurvihārasthaḥ suptaḥ śava iva sthitaḥ

bodhayitvātha taṃ bhikṣuṃ cetasā cetanena ca /
yojayāmāsa sasmāra bhikṣurapyātmano bhramam

rudramātmānamālokya jīvaṭādimayaṃ tathā /
bodhādavismayārho'pi sa bhikṣurvismayaṃ yayau

atha rudrastathā bhikṣurdvāvevotthāya jagmatuḥ /
kvāpi jīvaṭasaṃsāraṃ cidākāśaikakoṇagam

tatra tadbhavanaṃ gatvā taddvīpaṃ tacca maṇḍalam /
viṣayaṃ tatpuraṃ tacca taṃ ca pāṇāvasigraham

suptaṃ dadṛśaturnaṣṭasaṃjñaṃ jīvaṭakaṃ śavam /
sthāpayitvā vapurbhāvaṃ prabhāntaṃ bhavabhūmiṣu

taṃ prabodhya niyojyāśu cetasā cetanena ca /
ekarūpāstrirūpāste rudrajīvaṭabhikṣukāḥ

bodhavanto'pyabuddhābhā vismitā apyavismitāḥ /
babhustūṣṇīṃsthitāścitrakṛtākārā iva kṣaṇam

atha jagmuśca te sarve kvacidvyomani saṃsthitam /
viprasaṃsāramārabdhaṃ paribhūtasaghuṃghumam

te tatra bhuvanaṃ gatvā tadvīpaṃ tacca maṇḍalam /
viṣayaṃ tacca taṃ grāmaṃ prāpustaṃ brāhmaṇālayam

vipraṃ te dadṛśuḥ suptaṃ kalatravalitaṃ gṛhe /
kaṇṭhe gṛhītaṃ brāhmaṇyā bahirjīvamiva sthitam

taṃ prabodhya niyojyāśu cetasā cetanena ca /
tatsthāste bahavo'pyanye savismayavivismayāḥ

atha jagmuścidākāśakacitaṃ cetitaṃ citeḥ /
sāmantaṃ nṛpasaṃsāraṃ bhramaṇābhogasundaram

tataste bhuvanaṃ prāptāstaddvīpaṃ tacca maṇḍalam /
sāmantaṃ dadṛśurmattaṃ suptaṃ paryaṅkapaṅkaje

hemāvadātaṃ hemāṃgyā nihitaṃ kucakoṭare /
bhramaryevānvitaṃ padmakośasuptaṃ madhuvratam

kāntābhirabhyāvalitaṃ mañjarībhiriva drumam /
dīpajālakamadhyasthaṃ ratnaugha iva kāñcanam

taṃ prabodhya niyojyāśu cetasā cetanena ca /
tatsthāste bahavo'pyeke savismayavivismayāḥ

atha te rājasaṃsāraṃ jagmustatra vibodhya tam /
cetasaivamathānyāsu bhremuḥ saṃsārabhūmiṣu

prāpya tāṃ brahmahaṃsehāṃ rudratāṃ sarva eva te /
samājagmurvirejuśca rudrāṇāmuttamaṃ śatam

ekasaṃvidbhinnatanu citraceṣṭitaveṣṭitam /
ekarūpamanekābhaṃ rūpaṃ tatpārameśvaram

rudrāṇāṃ tacchatamatha nirāvaraṇacinmayam /
sarvasaṃsārasaṃbandhi sthitaṃ sarvajagatsthitam

śatarudraśatānīha santi rāma mahānti hi /
etadekādaśaṃ viddhi saṃsāraṃ pratisaṃsthitam

yo yo'bhitaḥ sa jīvasya saṃsāraḥ samudeti hi /
tatrāprabuddhā jīvaughāḥ paśyanti na parasparam

milanti hi manobuddhāstaraṅgā iva vāridhau /
aprabuddhāstu tanmātraniṣṭhā loṣṭavadāsthitāḥ

yathā dravatvādvīcyambu tvanyonyaṃ saṃmilatyalam /
tathā prabuddhā jīvaughā mithaścittvānmilantyalam

pratyekamudite caite saṃsāre jīvarāśayaḥ /
ciddhātoḥ sarvagatvena tvasatyāḥ satyavatsthitāḥ

yadyadākhanyate bhūmestattannāma yathā nabhaḥ /
sarvagāyāściteryadyaduhyate tattathaiva cit

sarvaprapañcabhūtāni yathānubhavasīha hi /
tatheha sarvabhūtātma cittvaṃ sarvatra vidyate

yacchālabhañjikā vṛkṣe śaile śvabhre gate'ntakam /
prekṣyate tadvadekātmā tathā citi jagatsthitam

avedane pare śuddhe vedanaṃ yajjagatsthitam /
akāraṇamacaitanyaṃ śūnyatvena yathā nabhaḥ

vidyate vedanaṃ dṛśyabandho mokṣastvavedanam /
yadeva ruciraṃ te syāttadevāśu dṛḍhīkuru

sargāsargau bandhamokṣau vedanāvedanātmakau /
abhinnau bodhanāccobhau yathecchasi tathā kuru

asaṃvittestu yannāsti tannāśe kā kadarthanā /
tūṣṇīṃbhāvena yatprāpyaṃ prāptamevāśu viddhi tat

yadvai vedanamātrātma tadaṃgāvedanakṣayam /
tadvedanaṃ vedanāyā yadiṣṭaṃ tatsamācaret

vīciryathāmbhasaḥ spando jagaccaiva tathā citau /
etāvanmātra evātra bhedo yadraghunandana

deśakālasvarūpeṣu satsu vīcyāditāmbhasi /
jagadādau tu deśādyā asanto jagatīkṣitāḥ

ābhāsvaraṃ trijagadityatibhāti bhāsva-
tsvaṃ vedanaṃ vidanameva citeḥ svarūpam /
vāci sthitaṃ bhavati caitadupoha bheda-
kliṣṭaṃ praśāntavacanastu śivaḥ parātmā

saṃvedanaṃ sarvaṃ itīha śabdā-
darthādabhinnau na kadācidetau /
vīcyambhasī dve iti nocitokti-
yasyājñatāyāṃ tvidameva yuktam

ityārṣe śrīvāsiṣṭhamahārāmāyaṇe vālmī० de० mo० nirvāṇaprakaraṇe pū० jīvaṭopākhyāne svapnaśatarudrīyakathanaṃ nāma triṣaṣṭitamaḥ sargaḥ