Yoga Vasistha · Verses 6.61-2

ekaṣaṣṭitamaḥ sargaḥ

śrīrāma uvāca /
yathāsmākaṃ mune svapnapurapattanamaṇḍalam /
tathaiva padmajādīnāṃ yadi dehaparigrahaḥ

tathaivedaṃ ca saṃjātaṃ yadi sarvamasanmayam /
tadasmākaṃ dṛḍhataraḥ pratyayaḥ kathamutthitaḥ

śrīvasiṣṭha uvāca /
asmatsargavadābhāti pūrvasargaḥ prajāpateḥ /
ājīvapratibhāsātmā vidyate na tu vāstavaḥ

sarvagatvācciteḥ sarvaṃ jīvaḥ sarvatra saṃsṛtiḥ /
sā cāsamyagdarśanotthā samyagdarśananāśinī

svapnābhaḥ pratibhāso'sya ya eṣa samupasthitaḥ /
ahaṃtāpratyayaikātmā sa evātidṛḍhaṃ sthitaḥ

svapne kṣipravināśitvaṃ yathā puṃsā na dṛśyate /
sarvasvapne tathaivaitadbrahmaṇāmiha lakṣyate

svapno'yaṃ puruṣasyāsya pratibhāsasya yo bhavet /
rāmā'smadādisarvātmā bhavettādṛśa eva ca

yatsvapnapuruṣājjātaṃ tatsvapnapuruṣātmakam /
bhavatītyanubhūtaṃ hi yadbījaṃ tatphalaṃ yathā

asatyameva tadviddhi yadasatyena sādhyate /
asatye'rthe samarthe'pi na yuktaṃ bhāvanaṃ ghanam

yena tena parityājyamasadbhāvanabhāvanam /
dṛḍhapratyayitaṃ svapnapuruṣādyatsamutthitam

bhavatyātmani sargādi dṛḍhapratyayameva tat /
nimeṣamātraḥ pauro'yaṃ sargasvapnaḥ puraḥ sthitaḥ

tasminnimeṣa evāsminkalpatā parikalpyate /
sudīrghasvapnakhaṇḍo'yaṃ yathodeti prajāpateḥ

sargākhyaḥ sarvabhūtānāṃ pratyekamuditastathā /
cittattvasyaiva bhāvena sargavargaparamparā

sphuratyambho dravatvena yathāvartavivartanaiḥ /
yathā svapnātmikaiveyaṃ sargalakṣmīrna vāstavī

tadā saṃbhavatīdaṃ vai tatpadaṃ pralayaṃ gatam /
yadyathā yādṛśaṃ dṛṣṭaṃ tattādṛgvidyate tathā

na hi paryanuyoktavyāḥ svapnavibhramarītayaḥ /
na tadasti jagatyasminyanna saṃbhavati bhrame

vicitrāstriṣu lokeṣu dṛśyante vastudṛṣṭayaḥ /
jalamadhye jvalatyagniryathābdhau vaḍavānalaḥ

nagarāṇyambare santi yathā vaimānikāśrayāḥ /
śilāsvabjāni jāyante hemādrāviva pādapāḥ

ekānte sarvapuṇyāni santi kalpatarau yathā /
śilāḥ phalanti phalivadyathā ratnagulucchakāḥ

śilāntaḥ prāṇinaḥ santi bhekā iva śilāntare /
dṛṣado vāri niryāti candrakāntopalādiva

nimeṣeṇa ghaṭo yāti paṭatāṃ svāpasaṃvidi /
asatyamapi budhyeta svapne svamaraṇaṃ yathā

ākasmikaṃ jalaṃ vyomni dhriyate bhūtagaṃ yathā /
vitānamiva khe vāri tiṣṭhati svarṇadī yathā

uḍḍīyante śilāḥ sthūlāḥ pakṣavanto yathādrayaḥ /
śilāntaḥ prāpyate sarvaṃ nanu cintāmaṇeriva

cintitāni phalantyāśu devodyānāntareṣviva /
tānyeva na phalantyāśu mokṣādīnāṃ ca rāghava

acetano'pi kurute karma yantrapumāniva /
evamādyāstathānye ca vicitrārambhavibhramāḥ

dṛṣṭāḥ śambaragandharvavilāsairapyasaṃbhavāḥ /
deśakālakriyādravyaratnasaṃcaraṇīyajāḥ

arthā gandharvajanitā anantāḥ satyasaṃbhavāḥ /
asaṃbhavaḥ saṃbhavo'yamapi bhāvyupapadyate

saṃbhavo'saṃbhavaḥ samyak siddhaye svapnavibhramaḥ /
na tadasti na yatsatyaṃ na tadasti na yanmṛṣā

sarvaṃ sarveṇa sarvatra svapne sargābhidhānake /
svapne nimagnadhīrjantuḥ paśyati sthiratāṃ yathā

sargasvapne magnabuddhiḥ paśyati sthiratāṃ tathā /
bhramādbhramāntaraṃ gacchansvapnātsvapnāntaraṃ vrajan /
atisthirapratyayabhāgiha jīvo vimuhyati

śvabhrāntaraṃ śvabhranipātadoṣāt
saṃprāpnuvanmugdhamṛgaḥ prayāti /
mohaṃ yathā pātamayaikarūpaṃ
jīvastathā saṃsṛtipātramūḍhaḥ

ityārṣe śrīvāsiṣṭhamahārāmāyaṇe deva० mokṣo० nirvāṇaprakaraṇe pūrvārdhe jagatsvapnakathanaṃ nāmaikaṣaṣṭitamaḥ sargaḥ