Yoga Vasistha · Verses 6.54-2

catuḥpañcāśaḥ sargaḥ

śrībhagavānuvāca /
bhūya eva mahābāho śrṛṇu me paramaṃ vacaḥ /
yatte'haṃ prīyamāṇāya vakṣyāmi hitakāmyayā

mātrāsparśā hi kaunteya śītoṣṇasukhaduḥkhadāḥ /
āgamāpāyino nityāstāṃstitikṣasva bhārata

te tu naikātmanaścānye kvā'to duḥkhaṃ kva vā sukham /
anādyante'navayave kutaḥ pūraṇakhaṇḍane

saṃsthitā sparśamātrākhyā mātrāsparśabhramātmakaḥ /
samaduḥkhasukho dhīraḥ so'mṛtatvāya kalpate

sarvatvādātmanaścaite subhedāḥ saṃsthitā iva /
asadrūpāstvasadrūpaṃ kathaṃ soḍhuṃ na śakyate

manāgapi na vidyante sukhaduḥkhe tu sarvaśaḥ /
sarvatvādātmatattvasya sattā kathamanātmanaḥ

nāsato vidyate bhāvo nābhāvo vidyate sataḥ /
nāstyeva sukhaduḥkhādi paramātmāsti sarvagaḥ

sattvāsattvamatī tyaktvā caitayorjagadātmanoḥ /
tyaktvā na kiṃcinmadhye ca śeṣe baddhapado bhava

na hṛṣyati sukhairātmā duḥkhairglāyati no'rjuna /
dṛśyadṛkvetanātmāpi śarīrāntargato'pi san

jaḍaṃ cittādi duḥkhasya bhājanaṃ dehatāṃ gatam /
na caitasminkṣate kṣīṇe kiṃcidevātmanaḥ kṣatam

jaḍaṃ dehādi duḥkhāderyadidaṃ bhoktṛsaṃsthitam /
tanmāyābhramamevāṅga viddhyabodhavaśotthitam

na kiṃcideva dehādi na ca duḥkhādi vidyate /
ātmano yatpṛthagbhūtaṃ kiṃ kenāto'nubhūyate

yadidaṃ kathayāmyatra tenaivāto vinaśyati /
bhrāntirduḥkhamabodhotthā samyagbodhena bhārata

yathā rajjvāmahibhayaṃ bodhānnaśyatyabodhajam /
tathā dehādiduḥkhādi bodhānnaśyatyabodhajam

viṣvagviśvamajaṃ brahma na naśyati na jāyate /
iti satyaṃ paraṃ viddhi bodhaḥ parama eṣa saḥ

brahmāmbudhau taraṅgatvaṃ kiṃcidbhūtvā vilīyate /
brahmāvarte sphurasyadya brahmaivāsi nirāmayam

yāvatkālakriyādeśāstvamahaṃsainikā iva /
brahmaṇīva parispandā nātra staḥ sadasadbhramau

jahi mānaṃ madaṃ śokaṃ bhayamīhāṃ sukhāsukhe /
dvaitametadasadrūpamekaḥ sadrūpavānbhava

puruṣākṣauhiṇīnāṃ ca kṣayeṇānubhavātmanā /
brahmaṇā bṛhitaṃ śuddhaṃ brahma brahmamayaṃ kuru

asaṃvidansukhaṃ duḥkhaṃ lābhālābhau jayājayau /
śuddhaṃ brahmaikatāṃ gaccha brahmābdhistvaṃ hi bhārata

lābhālābhasamo bhūtvā bhūtvā nūnaṃ na kiṃcana /
khaṇḍavāta ivāspandī prakṛtaṃ kāryamācara

yatkaroṣi yadaśnāsi yajjuhoṣi dadāsi yat /
yatkariṣyasi kaunteya tadātmeti sthiro bhava

yanmayo yo bhavatyantaḥ sa tadāpnotyasaṃśayam /
brahmasatyamavāptuṃ tvaṃ brahmasatyamayo bhava

anapekṣaphalaṃ brahma bhūtvā brahmeti bhāvitam /
kriyate kevalaṃ karma brahmajñena yathāgatam

karmaṇyakarma yaḥ paśyatyakarmaṇi ca karma yaḥ /
sa buddhimānmanuṣyeṣu sa coktaḥ kṛtsnakarmakṛt

mā karmaphalaheturbhūrmā te saṅgo'stvakarmaṇi /
yogasthaḥ kuru karmāṇi saṅgaṃ tyaktvā dhanaṃjaya

karmāsaktimanāśritya tathā nāśritya mūḍhatām /
naiṣkarmyamapyanāśritya samastiṣṭha yathāsthitam

tyaktvā karmaphalāsaṅgaṃ nityatṛpto nirāśrayaḥ /
karmaṇyabhipravṛtto'pi naiva kiṃcitkaroti saḥ

āsaktimāhuḥ kartṛtvamakarturapi tadbhavet /
maurkhye sthite hi manasi tasmānmaurkhyaṃ parityajet

paraṃ tattvajñamāśritya nirāsaktermahātmanaḥ /
sarvakarmaratasyāpi kartṛtodeti na kvacit

akartṛtvādabhoktṛtvamabhoktṛtvātsamaikatā /
samaikatvādanantatvaṃ tato brahmatvamātatam

nānātāmalamutsṛjya paramātmaikatāṃ gataḥ /
kurvankāryamakāryaṃ ca naiva kartā tvamarjuna

yasya sarve samārambhāḥ kāmasaṃkalpavarjitāḥ /
jñānāgnidagdhakarmāṇaṃ tamāhuḥ paṇḍitaṃ budhāḥ

samaḥ saumyaḥ sthiraḥ svasthaḥ śāntaḥ savārthanispṛhaḥ /
yastiṣṭhati sa savyagro'pyalamavyagratāṃ gataḥ

nirdvandvo nityasattvastho niryogakṣema ātmavān /
yathāprāptānuvartī tvaṃ bhava bhūṣitabhūtalaḥ

karmendriyāṇi saṃyamya ya āste manasā smaran /
indriyārthānvimūḍhātmā mithyācāraḥ sa ucyate

yastvindriyāṇi manasā niyamyārabhate'rjuna /
karmendriyaiḥ karmayogamasaktaḥ sa viśiṣyate

āpūryamāṇamacalapratiṣṭhaṃ
samudramāpaḥ praviśanti yadvat /
tadvatkāmā yaṃ praviśanti sarve
sa śāntimāpnoti na kāmakāmī

ityārṣe śrīvāsiṣṭhamahārāmāyaṇe vālmī० de० mo० nirvāṇaprakaraṇe pū० arjunopākhyāne ātmajñānopadeśo nāma catuṣpañcāśaḥ sargaḥ