Yoga Vasistha · Verses 6.51-2

ekapañcāśaḥ sargaḥ

śrīvasiṣṭha uvāca /
na punarbhavataḥ pūrvaṃ saṃpannāścakṣurādayaḥ /
yathā kamalajasyaitatsarvameva tvayā śrutam

brahmapuryaṣṭakasyādāvarthasaṃvidyathoditā /
puryaṣṭakasya sarvasya tathaivodeti sarvadā

viddhi puryaṣṭakaṃ jīvo yo garbhasthendriyodayaḥ /
yadyathā bhāvayatyāśu tattathā paripaśyati

indriyāṇīndriyārthākhyaṃ viddhi saṃvedanaṃ svakam /
saṃpannaṃ ca yathā tatte proktamādyamanaḥsthitau

śuddhā saṃvitsaṃbhavantī saṃvedanamaninditam /
tato'haṃvedanānantajīvapuryaṣṭakānvitā

na tvekatvādanantatvādavedyatvādanāmaye /
abhāvatvādanekatvādaśūnyatvātparā sthitā

cetyādibuddhyā tatkiṃcinna manastāṃ ca gacchati /
na ca jīvatvamāyāti na ca puryaṣṭakātmikā

na vidyādivilāso'sti sosti nāstīva yaḥ sadā /
paramātmeti kathito manaḥṣaṣṭhendriyātigaḥ

tasmātsaṃpadyate jīvaścinmūrtirmananātmakaḥ /
bhramaḥ kevalamityādya upadeśāya gīyate

yataḥ kutaścitsaṃpanne tvavidyāmaya āmaye /
upadeśyopadeśena pravilīne vicāraṇāt

praśāntasakalākāraṃ jñānaṃ tatrāvaśiṣyate /
yatrākāśamapi sthūlamaṇāviva mahācalaḥ

yatrodyadācāramapi sadapyasadiva sthitam /
jagajjānviṣayāṃstyaktvā kāye tvaṃ tiṣṭha nirmale

asanmayamavidyāyā rūpameva tadeva hi /
yadvīkṣitā satī nūnaṃ naśyatyeva na dṛśyate

ālokitaṃ nāma kathamavastu kila labhyate /
prayatnenāpi saṃprāptaṃ mṛgatṛṣṇāmbukairiva

asadeva sadevāsadajñānādasya satyatā /
jñānādyathāsthitaṃ vastu dṛśyate naśyati bhramaḥ

avidyāyā vicāro'yaṃ jīvapuryaṣṭakādikā /
apyatyantamasatyāyāḥ kalpanā kalpitātmanaḥ

tasyāsta upadeśāya seyaṃ jīvādikalpanā /
kṛtā śāstraiḥ prabodhāya tāṃ tvamekamanāḥ śrṛṇu

jīvatvamiva saṃprāptā puryaṣṭakapadasthitā /
kalā kalaṅkakalitā citirābodhanonmukhī

yadyathā bhāvayatyāśu tattathānubhavatyalam /
satyo bhavatvasatyo vā bālena niśi yakṣakaḥ

pañcatanmātrakalanāṃ saṃbhāvayati sattayā /
tatrātmani tathā randhrānprapaśyati tathoditān

ebhya eva samutpannaṃ bahiḥsthaṃ bhūtapañcakam /
paśyatyananyadanyābhaṃ śākhāśatamivāṅakuraḥ

idamantaridaṃ bāhyamiti niścayavāṃstataḥ /
jīvo bhāvaṃ yathādatte tattathā draḍhayatyatha

raśmijālamivendoryadātmanaḥ pratibhāsanam /
bāhyasparśatayā tena tadevāśūrarīkṛtam

maricasyeva yattaikṣṇyaṃ śūnyatvamiva khasya yat /
ātmano vedanaṃ yacca tadevānyadiva sthitam

atraiva niścayaṃ baddhvā niyamaḥ sudṛḍhīkṛtaḥ /
anenetthamanenetthaṃ bhāvyamityavakhaṇḍitam

svabhāvetaranāmāsau svasaṃkalpamayātmakaḥ /
kaścitkadācidbhavati svabhāvenaiva nānyathā

ātmanaivedamakhilaṃ saṃpannaṃ dvaitamadvayam /
khaṇḍo madhuraseneva mṛdeva ca mahāghaṭaḥ

saṃniveśavikārādideśakālādisaṃbhavāt /
saṃbhavatyatra natvīśe deśakālādyasaṃbhavāt

itaḥ puṣpamitaḥ patramahamityudito yathā /
khaṇḍe svātmani naḥ sattāraso'dvitve dvitāṃ vahan

itaḥ paṭa itaḥ kuḍyamahamityāditastathā /
sarvātmanātmani brahma viddhi tvaṃ dvitvamāharat

adyāṅkuro'hamadyārkarugahaṃ tvadya vāridaḥ /
yatheti tiṣṭhatyambhodastathātmā sadasadvapuḥ

iti bhāvyamanenedamitthaṃ sarveśvare tatam /
kramaṃ khaṇḍayituṃ loke kasya nāmāsti śaktatā

ādarśasvaccha ākāśe naiva svaḥ pratibimbati /
vyatirekāsaṃbhavataḥ kacatyeva hi kevalam

brahmaṇi tvātmanātmaiva sthitaḥ kacati bimbati /
dvaitībhavatyadeho'pi cinmayatvātsvabhāvataḥ

yadyathaivātmakacanaṃ vetti taṃ bhavatātmanā /
asatyamapi tanneha vyabhicārī kadācana

hematvakaṭakatve dve satyāsatyasvarūpiṇī /
hemni bhāṇḍagate yadvaccittvācittve tathātmani

sarvagatvācciteścittvaṃ nityaṃ manasi vidyate /
hematvaṃ kaṭakasyeva jaḍabhāvaḥ sthito'nyadā

cittvajāḍyātmakaṃ cittaṃ dṛṣṭaṃ bhāvayati svayam /
yathā yadaiva yadbhāvaṃ tathā bhavati tattadā

kāle kāle citā jīvastvanyonyo bhavati svayam /
bhāvitākāravānantarvāsanākalikodayāt

svapne dṛṣṭo yathā grāmo yāti sattānyatekṣaṇāt /
dehāddehaṃ tathā yāti deho'yaṃ pratibhātmakaḥ

pratibhāso yathā svapne naraḥ kuḍyaṃ paṭo bhavet /
bhavatyasatyamevedaṃ dehāntaramidaṃ svataḥ

asatyameva mriyate tvasatyaṃ jāyate punaḥ /
jīvaḥ svapratibhāsena svapnavatsvānyarūpavat

kālenaitādṛśaṃ rūpamidaṃ nānyatvameti vai /
prakṛtaṃ niścayārūḍhaṃ bhramantyete bhavaḥ svataḥ

vastu dṛṣṭamadṛṣṭaṃ ca svapne samanubhūyate /
jīvasvapne jagadrūpaṃ viddhi vedyavidāṃ vara

ajāgratdṛṣṭidṛṣṭo yaḥ svābhidhānādineritaḥ /
na svapno vidyate tasmādacchātmā citimātrakam

adyāpūrvābhidhaṃ svapne yathā paśyati nānyathā /
agradṛṣṭaṃ tathaivārthaṃ cetanaṃ citprapaśyati

prāktanī vāsanādyāpi pauruṣeṇāvajīyate /
hyaḥkukarmādya yatnena prayāti hi sukarmatām

mokṣādṛte na śāmyanti jīvatāṃ cakṣurādayaḥ /
unmajjanti nimajjanti kevalaṃ deśakālataḥ

citaḥ svakalanāttasya dehogra iva tiṣṭhati /
pañcātmābhāvito'satyo mahāyakṣaḥ śiśoriva

manobuddhirahaṃkārastathā tanmātrapañcakam /
iti puryaṣṭakaṃ proktaṃ deho'sāvātivāhikaḥ

amūrta eva cittātmā khatvamasyātipīnatā /
vātatāsya mahāgulmo dehatāsya sumerutā

virajastvakrameṇaiva niravasthastu muktibhāk /
suṣuptataikāvasthāsya jaḍāḥ kroḍīkṛtā yayā

svapnanāmnī tathāvasthā dehapratyayaśālinī /
āmokṣaṃ bhramatīhāyamiti sthāvarajaṃgamaiḥ

kadāciddhi suṣuptasthaḥ kadācitsvapnavatsthitaḥ /
ātivāhikadeho'yaṃ sarvasyaivāvatiṣṭhate

yadā suṣuptabhāvastho bhāviduḥsvapnavedhitaḥ /
tadā kālānalasamastiṣṭhatyanuditākṛtiḥ

sthāvarādyāsvavasthāsu kalpavṛkṣadaśāsu ca /
bhavatyeva suṣuptastho ghanamohaśilāghanaḥ

suṣuptatāsya jaḍatā svapnottheyaṃ hi saṃsṛtiḥ /
yaḥ prabodho'sya sā muktistajjāgradyā tu turyatā

jīvaprabodhānmuktirhi prabodhātparamātmatām /
so'bhyeti kṣālitamalaṃ tāmraṃ kanakatāmiva

jīvaprabodhānmuktiryā sā ceha dvividhocyate /
ekā jīvanmuktateti dvitīyā dehamuktatā

jīvanmuktirhi turyatvaṃ turyātītaṃ padaṃ tataḥ /
bodho jīvaḥ prabodho'yaṃ sa ca buddhiprayatnataḥ

jñātapramāṇo jīvontaryo jānātīha tanmayaḥ /
paśyatīmaṃ bhayaṃ caiva sudīrghasvapnavibhramam

mithyoditaḥ svahṛdaye svastha eva śilīkṛte /
jīvānāmantare tvanyanna kiṃciccitkalāṃ vinā

tāmevānyatayā paśyanmudhaiva pariśocati /
jīvāṇorantare tvanyanna kiṃcitparamādṛte

yatra tatra jagaddṛṣṭamaho māyāvijṛmbhitam /
sthālyantaḥ kathadambūnāṃ yathā nānā bhramodayaḥ

jīvāṇūnāṃ tathaivāntarmithyāsaṃsaraṇodayaḥ /
bandhosya vāsanābandho mokṣaḥ syādvāsanālayaḥ

vāsanānto'sya sauṣuptī svapne visphurati sthitiḥ /
ghanavāsanamoho'yaṃ jīvaḥ sthāvaratādibhāk

madhyasthavāsanastiryakpuruṣastanuvāsanaḥ /
yadāntarjīvitenānto bahirjātā ghaṭādayaḥ

jīvaikyādubhayoḥ sattā grāhyagrāhakayostadā /
ātmānātmasamālīḍho bahirantaryadā citā

tadā grāhyagrahaṇadhīrmṛgatṛṣṇeva sodayā /
neha saṃtyajyate kiṃcinneha kiṃcinna gṛhyate

bāhyāntarakalākāraścidātmaikaḥ prakāśate /
trijagacciccamatkārastvalaṃ bhedavikalpanaiḥ /
śobhitāḥ smaściti cirātsabāhyāntarna vidyate

abdhiryathā jalamapāstasamastabhedaḥ
khādacchameva sakalaṃ dravamekaśuddham /
sarvaṃ tathedamapahastitabhedajāta-
mādyaṃ paraṃ padamanāmayameva buddham

ityārṣe śrīvāsiṣṭhamahārāmāyaṇe vālmīkīye deva० mokṣopāyeṣu nirvāṇaprakaraṇe pū० indriyārthopalambhavicāro nāmaikapañcāśaḥ sargaḥ