Yoga Vasistha · Verses 6.5-2

pañcamaḥ sargaḥ

śrīrāma uvāca /
aho ahaṃ gataścittvaṃ bhavadvākyārthabhāvanāt /
śāntaṃ jagajjālamidamagrasthamapi nātha me

parāmantaḥ prayāto'smi paramātmani nirvṛtim /
dīrghāvagrahasaṃtaptaṃ vṛṣṭyeva vasudhātalam

śāmyāmi śītalākāraḥ sukhaṃ tiṣṭhāmi kevalam /
prasādamanuyāto'haṃ saro nirvāraṇaṃ yathā

samyakprasannamakhilaṃ diṅmaṇḍalamidaṃ mune /
yathābhūtaṃ prapaśyāmi nirnīhāramivādhunā

jāto'smi gatasaṃdehaḥ śāntāśāmṛgatṛṣṇikaḥ /
rāganīrāganirmukto mṛṣṭajaṅgalaśītalaḥ

ātmanaivāntarānandaṃ tatprāpto'smyantavarjitam /
rasāyanarasāsvādo yatra nātha tṛṇāyate

adyāhaṃ prakṛtistho'smi svastho'smi mudito'smi ca /
lokārāmo'smi rāmo'smi namo mahyaṃ namostu te

te saṃśayāstāḥ kalanāḥ sarvamastaṃ gataṃ mama /
rātrivetālasaṃsāraḥ prabhāta iva bhāskare

nirmale hṛdi vistīrṇe saṃpanne himaśītale /
mano nirvṛtimāyātaṃ sarasī śaradīva me

kalaṅka ātmanaḥ kasmātkathaṃ cetyādisaṃśayaḥ /
nūnaṃ nirmūlatāṃ yāto mṛgāṅkāgre yathā tamaḥ

sarvamātmaiva sarvatra sarvadā bhāvitākṛtiḥ /
idamanyadidaṃ cānyadityasatkalanā kutaḥ

ko'bhavaṃ prāgahaṃ tādṛktṛṣṇānigaḍayantritaḥ /
antarātmānameveti vihasāmi vikāsavān

ā idānīṃ smṛtaṃ samyagyathaiṣa sakalo'smyasau /
yastvadvāgamṛtāpūrasnātenāyamahaṃ sthitaḥ

aho nu vitatāṃ bhūmimadhirūḍho'smi pāvanīm /
ihastha eva yatrārko na pātālamiva sthitaḥ

mahyaṃ sattāmupetāya bhāvābhāvabhavārṇavāt /
namo nityaṃ namasyāya jayāmyātmātmanātmani

anubhavavaśato hṛdabjakośe
sphuṭamalitāṃ samupāgatena nātha /
tava varavacaseha vītaśokāṃ
ciramuditāṃ ca daśāmupāgato'smi

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० rāghavaviśrāntivarṇanaṃ nāma pañcamaḥ sargaḥ