Yoga Vasistha · Chapter 6.5

śrīvasiṣṭha uvāca /
svabhāvaṃ svaṃ vijityādāvindriyāṇāṃ sacetasām /
pravartate viveke yaḥ sarvaṃ tasyāśu sidhyati

svabhāvamātraṃ yenāntarna jitaṃ dagdhabuddhinā /
tasyottamapadaprāptiḥ sikatātailadurlabhā

śuddhe'lpo'pyupadeśo hi nirmale tailabinduvat /
lagatyuttānacitteṣu nādarśa iva mauktikam

atraivodāharantīmamitihāsaṃ purātanam /
mama pūrvaṃ bhuśuṇḍena kathitaṃ merumūrdhani

purā bhuśuṇḍaḥ kasmiṃścitpṛṣṭa āsītkathāntare /
mayā kadācidekānte meroḥ śikharakoṭare

mugdhabuddhimanātmajñaṃ kaṃ tvaṃ sucirajīvitam /
smarasīti mayā pṛṣṭenoktaṃ tenedamaṅga me

bhuśuṇḍa uvāca /
āsīdvidyādharaḥ pūrvamanātmajñaḥ sukheditaḥ /
lokālokāntaraśṛṅge śuṣka āryo vicāravān

tapasā bahurūpeṇa yamena niyamena ca /
akṣīṇāyuratiṣṭhatsa purā kalpacatuṣṭayam

tataścaturthe kalpānte vivekastasya codabhūt /
vidūrasyeva vaidūryamaucityājjaladodayāt

punarmṛtiḥ punarjanma jarā meti vibhāvayan /
lajje'haṃ tatkimekaṃ syātsthiramityavamṛśya saḥ

māmājagāma saṃpraṣṭumaṣṭādaśamayīṃ purīm /
svāmupohya viraktātmā saṃsārārasatāṃ gataḥ

sa matsamīpamāgatya kṛtodāranamaskṛtiḥ /
matpūjito'vasarata uvācedamaninditam

vidyādhara uvāca /
mṛdūni paritāpīni dṛṣaddṛḍhabalāni ca /
chede bhede ca dakṣāṇi svaśastrāṇīndriyāṇi ca

paryākulāni malināni vipatpradāni
duḥkhormimanti guṇakānanapāvakatvāt /
hārdāndhakāragahanāni tamomayāni
jitvendriyāṇi sukhameti ca kiṃ mamārthaiḥ

ityārṣe śrīvāsiṣṭhamahārāmāyaṇe vālmīkāye de० mo० nirvāṇaprakaraṇe u० vidyādharopākhyāne vidyādharapraśno nāma pañcamaḥ sargaḥ