યોગવાસિષ્ઠ · શ્લોક 6.5-2

પઞ્ચમઃ સર્ગઃ

શ્રીરામ ઉવાચ ।
અહો અહં ગતશ્ચિત્ત્વં ભવદ્વાક્યાર્થભાવનાત્ ।
શાન્તં જગજ્જાલમિદમગ્રસ્થમપિ નાથ મે

પરામન્તઃ પ્રયાતોઽસ્મિ પરમાત્મનિ નિર્વૃતિમ્ ।
દીર્ઘાવગ્રહસંતપ્તં વૃષ્ટ્યેવ વસુધાતલમ્

શામ્યામિ શીતલાકારઃ સુખં તિષ્ઠામિ કેવલમ્ ।
પ્રસાદમનુયાતોઽહં સરો નિર્વારણં યથા

સમ્યક્પ્રસન્નમખિલં દિઙ્મણ્ડલમિદં મુને ।
યથાભૂતં પ્રપશ્યામિ નિર્નીહારમિવાધુના

જાતોઽસ્મિ ગતસંદેહઃ શાન્તાશામૃગતૃષ્ણિકઃ ।
રાગનીરાગનિર્મુક્તો મૃષ્ટજઙ્ગલશીતલઃ

આત્મનૈવાન્તરાનન્દં તત્પ્રાપ્તોઽસ્મ્યન્તવર્જિતમ્ ।
રસાયનરસાસ્વાદો યત્ર નાથ તૃણાયતે

અદ્યાહં પ્રકૃતિસ્થોઽસ્મિ સ્વસ્થોઽસ્મિ મુદિતોઽસ્મિ ચ ।
લોકારામોઽસ્મિ રામોઽસ્મિ નમો મહ્યં નમોસ્તુ તે

તે સંશયાસ્તાઃ કલનાઃ સર્વમસ્તં ગતં મમ ।
રાત્રિવેતાલસંસારઃ પ્રભાત ઇવ ભાસ્કરે

નિર્મલે હૃદિ વિસ્તીર્ણે સંપન્ને હિમશીતલે ।
મનો નિર્વૃતિમાયાતં સરસી શરદીવ મે

કલઙ્ક આત્મનઃ કસ્માત્કથં ચેત્યાદિસંશયઃ ।
નૂનં નિર્મૂલતાં યાતો મૃગાઙ્કાગ્રે યથા તમઃ

સર્વમાત્મૈવ સર્વત્ર સર્વદા ભાવિતાકૃતિઃ ।
ઇદમન્યદિદં ચાન્યદિત્યસત્કલના કુતઃ

કોઽભવં પ્રાગહં તાદૃક્તૃષ્ણાનિગડયન્ત્રિતઃ ।
અન્તરાત્માનમેવેતિ વિહસામિ વિકાસવાન્

આ ઇદાનીં સ્મૃતં સમ્યગ્યથૈષ સકલોઽસ્મ્યસૌ ।
યસ્ત્વદ્વાગમૃતાપૂરસ્નાતેનાયમહં સ્થિતઃ

અહો નુ વિતતાં ભૂમિમધિરૂઢોઽસ્મિ પાવનીમ્ ।
ઇહસ્થ એવ યત્રાર્કો ન પાતાલમિવ સ્થિતઃ

મહ્યં સત્તામુપેતાય ભાવાભાવભવાર્ણવાત્ ।
નમો નિત્યં નમસ્યાય જયામ્યાત્માત્મનાત્મનિ

અનુભવવશતો હૃદબ્જકોશે
સ્ફુટમલિતાં સમુપાગતેન નાથ ।
તવ વરવચસેહ વીતશોકાં
ચિરમુદિતાં ચ દશામુપાગતોઽસ્મિ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મોક્ષોપાયેષુ નિર્વાણપ્રકરણે પૂ૦ રાઘવવિશ્રાન્તિવર્ણનં નામ પઞ્ચમઃ સર્ગઃ