Scripture Library

Yoga Vasistha · Chapter 6.46

6.46.1

śrīvasiṣṭha uvāca /
paramārthaphale jñāte muktau pariṇatiṃ gate /
bodho'pyasadbhavatyāśu paramārtho manomṛgaḥ

6.46.2

kvāpi sā mṛgatā yāti prakṣīṇasnehadīpavat /
paramārthadaśaivāste tatrānantāvabhāsinī

6.46.4

dhyānadrumaphalaprāptau bodhatāmāgataṃ manaḥ /
vajrasārāṃ sthitiṃ dhatte chinnapakṣa ivācalaḥ //
manastā kvāpi saṃyāti tiṣṭhatyacchaiva bodhatā /
nirbādhā nirvibhāgā ca sarvā'kharvātmikā satī

6.46.5

suviviktatayā cittasattā bodhatayoditā /
anādyantā bhavatyacchaprakāśaphaladāyinī

6.46.6

svayameva tatastatra nirastasakalaiṣaṇam /
anādyantamanāyāsaṃ dhyānamevāvaśiṣyate

6.46.7

yāvannādhigataṃ brahma na viśrāntaṃ pare pade /
tāvattanmananatvena na dhyānamavagamyate

6.46.8

paramārthaikatāmenya na jāne kva mano gatam /
kva vāsanā kva karmāṇi kva harṣāmarṣasaṃvidaḥ

6.46.9

kevalaṃ dṛśyate yogī gato dhyānaikaniṣṭhatām /
sthito vajrasamādhāne vipakṣa iva parvataḥ

6.46.10

virasākhilabhogasya praśāntendriyasaṃvidaḥ /
nīrasāśeṣadṛśyasya svātmārāmasya yoginaḥ

6.46.11

krameṇa vigaladvṛtterbalādviśrāntimīyuṣaḥ /
arthāyātaṃ samādhānaṃ kena nāma vicāryate

6.46.12

tāvadviṣayavairasyaṃ bhāvayantyucitāśayāḥ /
na paśyantyeva tānyāvadbhogāṃścitranaro yathā

6.46.13

apaśyañjāgatānarthānnirvāsanatayātmavān /
balādvajrasamādhāne tvanyeneva niveśyate/

6.46.14

prāvṛṣīva nadīpūro yaḥ samādhirupasthitaḥ /
balādeva tamāyātaṃ bhūyaścalati no manaḥ

6.46.15

sarvārthaśītalatvena balāddhyāne yadā''gatam /
jñānādviṣayavairasya sa samādhirhi netaraḥ

6.46.16

dṛḍhaṃ viṣayavairasyameva dhyānamudāhṛtam /
tadeva paripākena vajrasāraṃ bhavatyalam

6.46.17

tadetadbhogavaitṛṣṇyaṃ dhyānamaṅkuritaṃ hi tat /
tadeva pīṭhabandhena baddhaṃ bhavati bandhuram

6.46.18

samyagjñānaṃ samucchūnaṃ sadaivojjhi'tavāsanam /
dhyānaṃ bhavati nirvāṇamānandapadamāgatam

6.46.19

asti cedbhogavaitṛṣṇyaṃ kimanyaddhyānadurdhiyā /
nāsti cedbhogavaitṛṣṇyaṃ kimanyaddhyānadurdhiyā

6.46.20

dṛśyasvadanamuktasya samyagjñānavato muneḥ /
nirvikalpaṃ samādhānamavirāmaṃ pravartate

6.46.21

yasmai na svadate dṛśyaṃ sa saṃbuddha iti smṛtaḥ /
na svadante yadā bhogāḥ samyagbodhastathoditaḥ

6.46.22

yasya svabhāvaviśrāntiḥ kathaṃ tasyāsti bhogitā /
asvabhāvo hi bhogitvaṃ tatkṣaye tatkathaṃ kutaḥ

6.46.23

śrutapāṭhajapānteṣu samādhinirato bhavet /
samādhivirataḥ śrāntaḥ śrutapāṭhajapāñchrayet

6.46.24

nirvāṇamāmīta nirastakhedaṃ samastaśaṅkāstamayābhirāmam /
suṣuptasaumyaṃ samaśāntacittaṃ śaraddhanābhogaviśuddhamantaḥ

6.46.46

ityārṣe śrīvāsiṣṭhamahārāmāyaṇe vālmīkīye de० mo० nirvāṇaprakaraṇe uttarārdhe sāmyāvabodhano nāma ṣaṭcatvāriṃśaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0