Yoga Vasistha · Verses 6.37-2

saptatriṃśaḥ sargaḥ

īśvara uvāca /
ityādikānāṃ śabdānāmarthaśrīḥ satyarūpiṇi /
tasminsarveśvare sarvasattāmaṇisamudgake

kā nāma vimalābhāsāstasminparamacinmaṇau /
na kacanti vicinvanti vicitrāṇi jaganti yāḥ

eṣā bījakaṇāntasthā citsattā svavapurmayam /
labdhvā mṛtkālavāryādi karotyaṅkuramodanam

phenāvartavivartāntarvartinī rasarūpiṇī /
kaṭhinendriyasaṃbandhe karoti spandamambhasām

eṣā kusumaguccheṣu rasarūpeṇa saṃsthitā /
kacati ghrāṇarandhreṣu karoti pariphullatām

śilāṅgasthā śilāṅgābhāmasatīṃ satyatāpadam /
sargādhāradaśāṃ dhatte girīndraḥ sthitilīlayā

pavanaspandakośātmarūpiṇīva tvagindriyam /
saṃsādhayatyātmasutaṃ pitevātmatayānayā

aśeṣasārasaṃpiṇḍamadhyātmānaṃ svasiddhaye /
bhāvayitvā nakiṃcittvamiva khatvaṃ karotyalam

svasattāpratibimbābhamākāśamukurodare /
dhatte kalpanimeṣāṅkaṃ kālākhyamamalaṃ vapuḥ

āmahāpañcameśānaṃ pariṇāmamayā ime /
idamitthamidaṃ neti niyatirbhavati svayam

sākṣiṇi sphāra ābhāse gṛhe dīpa iva kriyāḥ /
satye tasminprakāśante jagaccitraparamparāḥ

paramākāśanagaranāṭyamaṇḍapabhūmiṣu /
svaśaktivṛttaṃ saṃsāraṃ paśyantī sākṣivatsthitā

śrīvasiṣṭha uvāca /
śivasyāsya jagannātha śaktayaḥ kāḥ kathaṃ sthitāḥ /
sākṣitā kā ca kiṃ tāsāṃ vṛttaṃ syātkiyadeva tate

īśvara uvāca /
aprameyasya śāntasya śivasya paramātmanaḥ /
saumya cinmātrarūpasya sarvasyānākṛterapi

icchāsattā vyomasattā kālasattā tathaiva ca /
tathā niyatisattā ca mahāsattā ca suvrata

jñānaśaktiḥ kriyāśaktiḥ kartṛtā'kartṛtāpi ca /
ityādikānāṃ śaktīnāmanto nāsti śivātmanaḥ

śrīvasiṣṭha uvāca /
śaktayaḥ kuta evaitā bahutvaṃ kathamāsu ca /
udayaśca kathaṃ deva bhedābhedaśca kīdṛśaḥ

īśvara uvāca /
śivasyānantarūpasya saiṣā cinmātratātmanaḥ /
eṣā hi śaktirityuktā tasmādbhinnā manāgapi

jñatvakartṛtvabhoktṛtvasākṣitvādivibhāvanāt /
śaktayo vividhaṃ rūpaṃ dhārayanti bahūdakam

evaṃ jagati nṛtyanti brahmāṇḍe nṛtyamaṇḍape /
kālena nartakeneva krameṇa pariśikṣitāḥ

yaiṣā paraparābhāsā saiṣā niyatirucyate /
kriyātha kṛtiricchā vā kāletyādikṛtābhidhā

āmahārudraparyantamidamitthamiti sthiteḥ /
ātṛṇāpadmajaspandaṃ niyamānniyatiḥ smṛtā

niyatirnityamudvegavarjitā'parimārjitā /
eṣā nṛtyati vai nṛtyaṃ jagajjālakanāṭakam

nānārasavilāsāḍhyaṃ vivartābhinayānvitam /
kalpakṣaṇahatānekapuṣkarāvartaghargharam

sarvartukusumākīrṇaṃ dhārāgolakamandiram /
bhūyobhūyaḥ patadvarṣabhūrisvedajalotkaram

payodapallavālolanīlāmbarakṛtabhramam /
pūrṇaṃ saṃśuddhasaptābdhiratnaughavalayākulam

yāmapakṣadinaprekṣākaṭākṣodbhāsitāmbaram /
majjanonmajjanavyagrakulādrikulaśekharam

bhramacchaśimaṇiprotagaṅgāmuktāphalatrayam /
saṃdṛṣṭādṛṣṭasaṃdhyābhravilolakarapallavam

anārataraṇallolalokālaṃkārakomalam /
bhūribhūtalapātālanabhastalapadakramam

magnonmagnamahānekatārāgharmakaṇotkaram /
candrārkakuṇḍalaspandasmitasphuṭanabhomukham

kalpitānekabrahmāṇḍakapāṭakavitānakam /
luṭhallokāntaravyūhadhvananmuktāṅkapallavam /
sukhaduḥkhadaśādoṣabhāvābhāvarasāntaram

asminvikāravalite niyatervilāse
saṃsāranāmni ciranāṭakanāṭyasāre /
sākṣī sadoditavapuḥ parameśvaro'ya-
mekaḥ sthito na ca tayā na ca tena bhinnaḥ

ityārṣe śrīvāsiṣṭhamahārāmāyaṇe vālmīkīye de० mo० nirvāṇaprakaraṇe pū० niyatinṛtyaṃ nāma saptatriṃśaḥ sargaḥ