Yoga Vasistha · Verses 6.36-2

ṣaṭatriṃśaḥ sargaḥ

īśvara uvāca /
tataścidrūpamevaikaṃ sarvasattāntarāsthitam /
svānubhūtimayaṃ śuddhaṃ devaṃ rudreśvaraṃ viduḥ

bījaṃ samastabījānāṃ sāraṃ saṃsārasaṃsṛteḥ /
karmaṇāṃ paramaṃ karma ciddhātuṃ viddhi nirmalam

kāraṇaṃ kāraṇaughānāmakāraṇamanāvilam /
bhāvanaṃ bhāvanaughānāmabhāvyamabhavātmakam

cetanaṃ cetanaughānāṃ cetanātmani cetanam /
svaṃ cetyacetanaṃ cetyaparamaṃ bhūribhāvanam

ālokālokamamalamanālokyamalokajam /
ālokaṃ bījabījaughaṃ ciddhanaṃ vimalaṃ viduḥ

asatyaṃ sanmayaṃ śāntaṃ satyāsatyavivarjitam /
mahāsattādisattānte cinmātraṃ viddhi netarat

svayaṃ bhavati rāgātmā rañjako rañjanaṃ rajaḥ /
svayamākāśamapyāśu kuḍyaṃ bhavati maṇḍitam

asmiṃściccetasi sphāre jaganmarumarīcayaḥ /
sphuritāḥ prasphuriṣyanti prasphuranti ca koṭayaḥ

svasattāmātrasaṃpannaṃ padamasminsvatejasi /
na kiṃcana ca saṃpannamanyadauṣṇyādivānale

garbhīkṛtamahāmeruṃ paramāṇusamaṃ viduḥ /
ācchāditamahāmeruṃ paramāṇusamaṃ viduḥ

garbhīkṛtamahākalpo nimeṣo'sāvudāhṛtaḥ /
ākrāntakalpenānena na saṃtyaktā nimeṣatā //

bālāgrakādapyaṇunā vyāptānenākhilā mahī /
saptābdhivasanāpyurvī nāsyāntamadhigacchati

akurvanneva saṃsāraracanāṃ kartṛtāṃ gataḥ /
kurvanneva mahākarma na karotyeva kiṃcana

dravyamapyeṣa nirdravyo nirdravyo'pi hi dravyavān /
akāyo'pi mahākāyo mahākāyo'pyakāyavān

adyāpyeṣa sadā prātaḥ prātarapyadyatāṃ gataḥ /
na vādyamadya na prātastvadya prātaśca vā sadā

bhiṃḍiṃ bhiṃḍiṃ khile mattā purupicchilisālagham /
viviccalitsadālokā lāso guluguluḥ śilī

ityādyanarthakaṃ vākyaṃ tathā satyaṃ sa eva ca /
na tadasti na yatsatyaṃ na tadasti na yattvasau

yasminsarvaṃ yataḥ sarvaṃ yaḥ sarvaṃ sarvataśca yaḥ /
yaśca sarvamayo nityaṃ tasmai sarvātmane namaḥ

yatrāntarālagahanena vilāsavatyā
helāvilolaghanasarjitayāmalena /
mallena pallavadalāmalamālitānāṃ
lakṣmīlatā'viralitā valiteva muṣṭiḥ

ityārṣe śrīvāsiṣṭhamahārāmāyaṇe vālmīkīye deva० mokṣopāyeṣu nirvāṇaprakaraṇe pū० parameśvaravarṇanaṃ nāma ṣaṭatriṃśaḥ sargaḥ