યોગવાસિષ્ઠ · શ્લોક 6.36-2

ષટત્રિંશઃ સર્ગઃ

ઈશ્વર ઉવાચ ।
તતશ્ચિદ્રૂપમેવૈકં સર્વસત્તાન્તરાસ્થિતમ્ ।
સ્વાનુભૂતિમયં શુદ્ધં દેવં રુદ્રેશ્વરં વિદુઃ

બીજં સમસ્તબીજાનાં સારં સંસારસંસૃતેઃ ।
કર્મણાં પરમં કર્મ ચિદ્ધાતું વિદ્ધિ નિર્મલમ્

કારણં કારણૌઘાનામકારણમનાવિલમ્ ।
ભાવનં ભાવનૌઘાનામભાવ્યમભવાત્મકમ્

ચેતનં ચેતનૌઘાનાં ચેતનાત્મનિ ચેતનમ્ ।
સ્વં ચેત્યચેતનં ચેત્યપરમં ભૂરિભાવનમ્

આલોકાલોકમમલમનાલોક્યમલોકજમ્ ।
આલોકં બીજબીજૌઘં ચિદ્ધનં વિમલં વિદુઃ

અસત્યં સન્મયં શાન્તં સત્યાસત્યવિવર્જિતમ્ ।
મહાસત્તાદિસત્તાન્તે ચિન્માત્રં વિદ્ધિ નેતરત્

સ્વયં ભવતિ રાગાત્મા રઞ્જકો રઞ્જનં રજઃ ।
સ્વયમાકાશમપ્યાશુ કુડ્યં ભવતિ મણ્ડિતમ્

અસ્મિંશ્ચિચ્ચેતસિ સ્ફારે જગન્મરુમરીચયઃ ।
સ્ફુરિતાઃ પ્રસ્ફુરિષ્યન્તિ પ્રસ્ફુરન્તિ ચ કોટયઃ

સ્વસત્તામાત્રસંપન્નં પદમસ્મિન્સ્વતેજસિ ।
ન કિંચન ચ સંપન્નમન્યદૌષ્ણ્યાદિવાનલે

ગર્ભીકૃતમહામેરું પરમાણુસમં વિદુઃ ।
આચ્છાદિતમહામેરું પરમાણુસમં વિદુઃ

ગર્ભીકૃતમહાકલ્પો નિમેષોઽસાવુદાહૃતઃ ।
આક્રાન્તકલ્પેનાનેન ન સંત્યક્તા નિમેષતા ॥

બાલાગ્રકાદપ્યણુના વ્યાપ્તાનેનાખિલા મહી ।
સપ્તાબ્ધિવસનાપ્યુર્વી નાસ્યાન્તમધિગચ્છતિ

અકુર્વન્નેવ સંસારરચનાં કર્તૃતાં ગતઃ ।
કુર્વન્નેવ મહાકર્મ ન કરોત્યેવ કિંચન

દ્રવ્યમપ્યેષ નિર્દ્રવ્યો નિર્દ્રવ્યોઽપિ હિ દ્રવ્યવાન્ ।
અકાયોઽપિ મહાકાયો મહાકાયોઽપ્યકાયવાન્

અદ્યાપ્યેષ સદા પ્રાતઃ પ્રાતરપ્યદ્યતાં ગતઃ ।
ન વાદ્યમદ્ય ન પ્રાતસ્ત્વદ્ય પ્રાતશ્ચ વા સદા

ભિંડિં ભિંડિં ખિલે મત્તા પુરુપિચ્છિલિસાલઘમ્ ।
વિવિચ્ચલિત્સદાલોકા લાસો ગુલુગુલુઃ શિલી

ઇત્યાદ્યનર્થકં વાક્યં તથા સત્યં સ એવ ચ ।
ન તદસ્તિ ન યત્સત્યં ન તદસ્તિ ન યત્ત્વસૌ

યસ્મિન્સર્વં યતઃ સર્વં યઃ સર્વં સર્વતશ્ચ યઃ ।
યશ્ચ સર્વમયો નિત્યં તસ્મૈ સર્વાત્મને નમઃ

યત્રાન્તરાલગહનેન વિલાસવત્યા
હેલાવિલોલઘનસર્જિતયામલેન ।
મલ્લેન પલ્લવદલામલમાલિતાનાં
લક્ષ્મીલતાઽવિરલિતા વલિતેવ મુષ્ટિઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દેવ૦ મોક્ષોપાયેષુ નિર્વાણપ્રકરણે પૂ૦ પરમેશ્વરવર્ણનં નામ ષટત્રિંશઃ સર્ગઃ