Yoga Vasistha · Chapter 6.35

pañcatriṃśaḥ sargaḥ

śrīvasiṣṭha uvāca /
deśāddeśāntaraṃ dūraṃ prāptāyāḥ saṃvidaḥ kṣaṇāt /
yadrūpamamalaṃ madhye paraṃ tadrūmātmanaḥ

gacchanśrṛṇvanspṛśañjighrannunmiṣannimiṣanhasan /
nūnaṃ nirāmayatvāya nityametanmayo bhava

tata eva nirābhāsātsatyānnirvāsanaiṣaṇāt /
yathāsthitaṃ yathācāramacalā'maraśailavat

etadrūpamavidyāyāḥ prekṣitā yanna labhyate /
prekṣitā labhyate cetsā tadvidyaiva parābhavat

avidyāsaṃbhavāccetyacittve saṃbhavataḥ kva kim /
cetyate kathamevāntaḥ śāntireva baloditā

satyaṃ brahma jagaccaikaṃ sthitamekamanekavat /
sarvaṃ vā'sarvavadbhāti śuddhaṃ cāśuddhavattatam

aśūnyaṃ śūnyamiva ca śūnyaṃ vā'śūnyavatsphuṭam /
sphāramasphāramiva tadasphāraṃ sphārasannibham

avikāraṃ vikārīva samaṃ śāntamaśāntavat /
sadevāsadivādṛśyaṃ tadevātadivoditam

avibhāgaṃ vibhāgīva nirjāḍyaṃ jaḍavadgatam /
acetyaṃ cetyabhāvīva niraṃśaṃ sāṃśaśobhanam

anahaṃ so'hamiva tadanāśamiva nāśavat /
akalaṅkaṃ kalaṅkīva nirvedyaṃ vedyavāhivat

āloki dhvāntaghanavannavavacca purātanam /
paramāṇorapi tanu garbhīkṛtajagadgaṇam

sarvātmakamapi tyaktadṛṣṭaṃ kaṣṭena bhūyasā /
ajālamapi jālāḍhyaṃ cāśeṣavadanekadhā

nirmāyamapi māyāṃśumaṇḍalāmalabhāskaram /
brahma viddhi vidāṃnāthamapāmiva mahodadhim

jagadratnamahākośaṃ tulāyāṃ tūlakāllaghu /
māyāmarīciśaśinamapi nekṣaṇagocaram

anantamapi niṣpāraṃ na ca kvacidapi sthitam /
ākāśe vanavinyāsanaganirmāṇatatparam

aṇīyasāmaṇīyāṃsaṃ sthaviṣṭhaṃ ca sthavīyasām /
garīyasāṃ gariṣṭhaṃ ca śreṣṭhaṃ ca śreyasāmapi

akartṛkarmakaraṇamakāraṇamakārakam /
antaḥśūnyatayaivaitaccirāya paripūritam

jagatsamudgakamapi nityaṃ śūnyamaraṇyavat /
anantaśailakaṭhinamapyākāśalavānmṛdu

pratyekaṃ pratyahaṃ prāyaḥ purāṇaṃ pelavaṃ navam /
ālokamandhakārābhaṃ tamastvālokamātatam

pratyakṣamapi durlakṣyaṃ parokṣamapi cāgragam /
cidrūpameva ca jaḍaṃ jaḍameva cidātmakam

ahamevānahaṃbhāvamanahaṃ vā'hameva ca /
anyadeva tadevāhamahamevānyadeva tat

asya pūrṇārṇavasyāntarime tribhuvanormayaḥ /
sphuranta iva tiṣṭhanti svabhāvadravatātmakāḥ

bibharti sarvamaṅgasthaṃ tuṣāramiva śuklatām /
bhāti sarvastvanenaiva tuṣāreṇeva śuklatā

adeśakālāvayavo'pyeṣa devo divāniśam /
asajjagattanotīva yathā vāritaraṅgakam

etasminvikasantīmā vipulākāśakānane /
jagajjaraṭhamañjaryaḥ prasaratpatrapañcakāḥ

eṣa svapratibimbasya svayamālokanecchayā /
atyantanirmalākāraḥ svayaṃ mukuratāṃ gataḥ

vyomavṛkṣaphalasyāsya svecchāvayava ujjvalā /
sargopalambha udyacca camatkurvanti saṃvidi

antasthena bahiṣṭhena nānānānātayātmani /
eṣa so'ntarbahirbhāti bhāvābhāvavibhāvayā

etadrūpā padārthaśrīretasminnetadicchayā /
camatkarotyetadarthaṃ jihveva svāsyakoṭare

asyāmbhaso dravatvaṃ yattadidaṃ jagaducyate /
saṃvitsyādūpalambhāṅgaṃ bhuvanāvartavṛttimat

śāmyatyatra padārthaśrīḥ sarvāsāmeva bhāsvati /
etasmādeva codeti svāloka iva tejasaḥ

idameva jagatsarvaṃ śuklatvaṃ tuhine yathā /
ata etāḥ pravartante vida indorivāṃśavaḥ

etasmādraṅgato'naṅgājjagaccitramidaṃ sthitam /
viddhyabhāvavikārādiśāntametanmayaṃ tatam

asmādvanataroretāḥ svarūḍhā gaganāṅgaṇe /
dṛśyaśākhāḥ pravartante jagajjālagulucchakāḥ

vyayodayavatī nūnamatra dṛśyataraṅgiṇī /
nānātānantakusumā vahatyavicalācale

asminvyomātmake raṅge bhuvanābhinayabhramaiḥ /
mṛtyatyaviratārambhaṃ vārairniyatinartakī

jagatkoṭimahākalpakalponmeṣanimeṣaṇaḥ /
vitāne nāṭyate bhūyo janyate kālabālakaḥ

udyatsvapi jagatsveṣa śāntamevāvatiṣṭhate /
aniccha eva mukuraḥ pratibimbaśateṣviva

bhūtānāṃ vartamānānāṃ sargāṇāṃ saṃbhaviṣyatām /
eṣo'kāraṇakaṃ bījaṃ sargāṇāmiva kāraṇam

asyonmeṣo jagallakṣmīrnimeṣaḥ pralayāgamaḥ /
anunmeṣanimeṣo'sāvātmanyevāvatiṣṭhate

udyantyamūni subahūni mahāmahānti
sargāgamapralayajanmadaśā jaganti /
sarvāṇi tānyayamapārasvarūpa eva
praspandanāni marudeva yathāsva śāntam

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe u० parabrahmasvarūpavarṇanaṃ nāma pañcatriṃśaḥ sargaḥ