Yoga Vasistha · Chapter 6.30

triṃśaḥ sargaḥ

śrīvasiṣṭha uvāca /
ahaṃtaiva parā'vidyā nirvāṇapadarodhinī /
tayaivānviṣyate mūḍhaistadityunmattaceṣṭitam

ahaṃtaivālamajñānādajñatvasya nidarśanam /
na hi tajjñasya śāntasya mamāhamiti vidyate

ahaṃtāmalamutsṛjya nirvāṇaḥ khamivāmalaḥ /
sadehamapadehaṃ vā jñastiṣṭhati gatajvaraḥ

na tathā śaradākāśaṃ na tathā stimito'rṇavaḥ /
pūrṇendumadhyaṃ na tathā yathā jñaḥ parirājate

citrasaṃgarayuddhasya sainyasyākṣubdhatā yathā /
tathaiva samatā jñasya vyavahāravatopi ca

nirvāṇaikatayā jñasya vāsanaiva na vāsanā /
lekhādāmopamā tvabdherūrmyādi na jaletarat

tarattaraṅgo jaladhirjalameva yathākhilam /
dṛśyocchūnamapi brahma tathā brahmaiva netarat

antarastaṃgato'kṣubdho bahirastaṃgataḥ śamī /
vidyate codito yasya sa mukta iti kathyate

ahaṃtvasargarūpeṇa saṃvitsaṃvinmaye pare /
sphuratyambhombhasīvāto nānāteyaṃ kimātmikā

dhūmasya sphurato vyomni yathā gajarathādayaḥ /
vyūhā dhūmānna te bhinnāstathā sargāḥ pare pade

saṃvidbhrāntivicāreṇa bhrāntyalābhavilāsinaḥ /
vijayadhvaṃ viṣādaṃ mā''gatā jñāstajjñatā hi vaḥ

aṅkuro'nubhavatyantarvṛkṣapatraphalaṃ yathā /
tathā jagadahaṃtve jñaḥ svātmā svātmakhamapyalam

rūpālokamanaḥsattā jvālārciṣviva daṇḍatā /
satyopi ca na santyetā bhrānteścittābalā iva

yathā sukhaṃ yathārambhaṃ yathā nāśaṃ yathodayam /
yathā deśaṃ yathā kālamajarāḥ śāntamāsyatām

iṣṭāniṣṭopalambheṣu śānto vyavaharannapi /
śavavannānyatāmantarnirvāṇo'nubhavatyalam

amanovāsanāhaṃtā dhatte yacca jagacciram /
jīvato'jīvataścaiva cijjīvaḥ sa paraṃ padam

sattaiva jaḍavāhena duḥkhabhārāya kevalam /
nṛṇāṃ pāśāvabaddhānāṃ potakānāmivārṇave

mokṣasattā śrayati taṃ nājñānānubhavādiva /
mṛtena yatkila prāpyaṃ jīvanprāpnoti tatkatham

yadyatsaṃkalpayate tattatsaṃkalpādeva nāśabhāk /
na saṃbhavati yatraitattatsatyaṃ padamakṣayam

nānyo na cāhamasmīti bhāvanānnirbhayo bhava /
satyaṃ yuktaṃ bhavatyetadviṣamapyamṛtaṃ yathā

jaḍaṃ dehādi cittāntaṃ vicārya sakalaṃ vapuḥ /
labhyate nāhamasmīti tasmānnāsmīti satyatā

śāntāśeṣaviśeṣāṇāmahaṃtāntāvicāraṇāt /
kevalaṃ muktatodeti na tu kiṃcidvinaśyati

bhogatyāgavicārātmapauruṣānnānyadatra hi /
upayujyata ityajñāḥ svātmaivāśu praṇamyatām

nirvāsanaṃ mananamevamudāharanti
mokṣaṃ vinā bhavati tanna ca jātu bodhāt /
sanno jagadbhrama itīha paraḥ prabodho
na pratyayo'tra yadataḥ sucirāya bandhaḥ

jagadahamasadityupetya samya-
gjanadhanadāraśarīranirvyapekṣaḥ /
bhavati hi sa ca cetanasvarūpaḥ
parimitakhaṃ khalu nānyathāsti muktiḥ

ityārṣe śrīvāsiṣṭhamahārāmāyaṇe vā० de० mo० nirvāṇaprakaraṇe uttarārdhe paramārthopanyāsayogo nāma triṃśaḥ sargaḥ