Yoga Vasistha · Chapter 6.212

dvādaśādhikadviśatatamaḥ sargaḥ

śrīvasiṣṭha uvāca /
cittvādbrahmakhamevāhamiti vettīva yastvayam /
tadeva parameṣṭhitvaṃ tasyodaramidaṃ jagat

evaṃ sthite na ca brahmā na ca jātaṃ jagatsthitam /
sthitaṃ yathāsthitamajaṃ paraṃ brahmaiva pūrvavat

saṃvittau tu jagadrūpaṃ bhāsate'pyevameva tat /
mṛgatṛṣṇeva mithyaiva dṛśyamānamapi tvasat

ataḥprabhṛti śūnyeyaṃ bhrāntirabhyuditā navā /
kutaḥ keva kila bhrāntirbrahmaiva tadanāmayam

jagadbrahmajalāvarto dvitvaikatve kilātra ke /
kvāvartapayasordvitvaṃ dvitvābhāvātkva caikatā

tadbrahma ghanamāśāntaṃ cittvāccetatyahaṃ vidat /
nijaṃ śūnyatvamantasthaṃ vyomeva vitatāntaram

pavanaḥ spandanamiva hutāśana ivoṣṇatām /
svaśaityamiva pūrṇenduḥ sattāmartha ivātmanaḥ

śrīrāma uvāca /
etadbrahmankadā nāma tanna cetitavanmune /
nirāvṛtamanādyantaṃ kimidānīṃ pracetati

śrīvasiṣṭha uvāca /
evametatsadaivaitadahamādyapi cetati /
na hyanāderajasyāsya kāpyapekṣā svasaṃvidā

sargāsarganabhorūpaṃ brahma sarvatra sarvadā /
na kadācididaṃ nedaṃ jñātaṃ nedaṃ ca kiṃcana

pavanaspandanaṃ candraśaityaṃ śūnyatvamambaram /
brahmāhaṃtvamananyātma na kadācinna cetati

sarvadaivedṛśī sattā na kadācidanīdṛśī /
jagadyasmādanādyantaṃ brahmātmaiva nirāmayam

kevalaṃ tvamabuddhatvācchabdaśravaṇavedhitaḥ /
advaye brahmabodhe'smindvitāmabhyupagacchasi

na kaścitkiṃcideveha na kadācinna cetati /
na kaścicca tadanyātmā na kadācicca cetati

idaṃ tribhuvanābhāsamīdṛśaṃ bhāti sarvadā /
śāntaṃ rāma samaṃ brahma neha nānāsti kiṃcana

na kadācana jāyante nabhasaḥ pādapādrayaḥ /
brahmaṇaśca jayantīti matvā śāntiṃ parāṃ vraja

upadeśyopadeśārthaṃ saṃdehāvasare'lpadhīḥ /
yāvanna buddhastāvattvaṃ bhedamabhyupagacchasi

bodhasya tu vibuddhasya na śāstrādi na śabdadhīḥ /
na bhedabuddhirno bhedaḥ kimapyeṣa prajāpateḥ

śrīrāma uvāca /
buddhametanmayā brahmanprakṛtaṃ tadudāhara /
vaco madavabodhārthaṃ yadudāhṛtavānasi

kiṃ tasmiṃścetite'haṃtve pade saṃpadyate pare /
buddhavānasi śuśrūṣurnāhaṃ tṛptimupaimi hi

śrīvasiṣṭha uvāca /
ahaṃtve satyathaitasminvyomasattā pravartate /
diksattā kālasattā ca bhedasattābhyudeti ca

yadā kilehāhamiti tadā nātrāhamityapi /
bhātītyudeti nānā khe svātmaiva dvaitamakramam

vyomātmikānāmetāsāṃ sattānāmabhidhānadhīḥ /
bhaviṣyatyuttaraṃ kālaṃ tadā tvākāśameva tat

etasminparisaṃpanne dikkālakalanātmani /
ahaṃbhāve nirākāre vyoma tanmātravedini

idamābhāti bhārūpaṃ vedanaṃ dṛśyanāma yat /
bhūtvā brahmaiva nirbādhamabrahmeva virājate

brahmaiva śāntamajamekamanādimadhyaṃ
vyomaiva jīvakalanāmiva bhāvayitvā /
vyomnyeva paśyati nirāvaraṇe visāri
dṛśyaṃ svarūpamapi cānyadivā''tmavittvāt

ityārṣe śrīvāsiṣṭhamahārāmāyaṇe vā० de० mo० ni० u० paramārthanirūpaṇaṃ nāma dvādaśādhikadviśatatamaḥ sargaḥ