Yoga Vasistha · Chapter 6.210

daśādhikadviśatatamaḥ sargaḥ

śrīvasiṣṭha uvāca /
phale kṣayendubhārūpe prāpte dhyātṛśatairnabhaḥ /
yathā na śatapūrṇendu tathedaṃ kathanaṃ śrṛṇu

candrabimbasya dhyātāraḥ prāptāḥ prāptavyasusthitāḥ /
nedaṃ nabhastalaṃ prāptā na cemaṃ śaśinaṃ śritāḥ

kvevānyasaṃkalpapuramanyaḥ prāpnoti kathyatām /
saṃkalpapuryāmarthāptistajjantāveva nāpare

pṛthakpṛthaksvasaṃkalpasargakheṣveva te sthitāḥ /
candrāstapanti tatraiva kalākṣayavivarjitāḥ

viśeyamasminnevendāvini dhyātā niśākare /
asminneva viśatyantarātmabuddhisukhojjhitaḥ

ahaminduṃ praviṣṭaḥ syāmindubimbasukhānvitaḥ /
dhyāteti tādṛksukhabhāgbhavatīti viniścayaḥ

yathāyamanusaṃdhatte svabhāvaṃ saṃvidavyayā /
taṃ tathaivānubhavati bhavecceddṛḍhaniścayaḥ

yathendutvaṃ svasaṃkalpātsarvadhyātuḥ pṛthakpṛthak /
bhātyevameva vanitālābhaḥ kālpanikaḥ svataḥ

yā dhyāne dhyātṛlakṣāṇāṃ sādhvī bhāryātvamāgatā /
tatkalpanānubhavanaṃ teṣāṃ sattvātmani sthitam

gṛhādanirgato jīvaḥ saptadvīpaparaḥ sthitaḥ /
tasyāpi tatkālpanikaṃ rājyaṃ vyomni svamandire

samastaṃ kalpanāmātramidamādyajñajanmanaḥ /
śūnyamapratighaṃ śāntaṃ teṣvapi syātkimanyathā

dānaurdhvadehikatapojapādīnāṃ paratra yat /
amūrtānāṃ phalaṃ mūrtaṃ tadidaṃ kathyate śrṛṇu

dānādicihnitadhiyaḥ paratra svapnavatphalam /
paśyantyamūrtāmūrtābhamajaṃ cinmūrtikalpanāt

vedanāvedanākārā spandāspandātma vai punaḥ /
cinmātrasyāsya tadbhrāntiśāntau śāntātma nirmalam

cinmātrābhamito dānādamutrāttamavāpnuyāt /
saṃkalpātmeti kavayaḥ kathaṃ tannopalabhyate

kalpanātmani saṃsāre saṃkalpo'kṛtrimaṃ phalam /
cinmātramabhito'dānāddānādvā'stu yathoditaḥ

etatte kathitaṃ sarvaṃ yathāpṛṣṭaṃ mahīpate /
jagadapratighaṃ sarvamidaṃ cinmātrakalpanam

rājovāca /
sargādau bhagavandehamidaṃ cinmātrakalpanam /
kathaṃ bhāti kathaṃ kuḍyaṃ vinā dīpaḥ prakāśate

śrīvasiṣṭha uvāca /
tvayārtho dehaśabdasya yo buddhaḥ sa mahāmate /
tattvajñaṃ prati nāstyeva śilānṛttamivāmbare

ya eva brahmaśabdārtho dehaśabdārtha eva saḥ /
nārthayoranayorbhedo vidyate'mbvambhasoriva

yadeva brahmadeho'sau svapnābhaḥ svapna eṣa tu /
tvadvodhāyocyate yuktirna tu tatsvapna eva tu

svapnastavānubhūtārthastenātastvaṃ prabodhyase /
na tu sarge cidābhāte sādṛśyaṃ svapnabhasmanā

kastatra nāma deho'yaṃ kasyaite svapnadhīḥ kva vā /
svapnena jñāvabuddhena bhrameṇājño'vabodhyate

tatra jāgranna ca svapno na suṣuptaṃ na cetarat /
kimapītthamidaṃ bhānaṃ khamātraṃ maunamomalam

abhātameva bhātīva yadadyetthamidaṃ tu tat /
prāgvibhātaṃ tathātyacchaṃ jāgratsvapnādi no yathā

deśāddeśāntaraprāptau yanmadhye saṃvido vapuḥ /
tanmayaṃ sarvamevedaṃ dvaitamadvaitameva ca

anyatra cinmayaṃ svapnaṃ dvaitādvaitaṃ śubhāśubham /
nirāvaraṇacinmātranabhasaivopamīyate

śūnyamarthopalambhaśca bhānaṃ cābhānameva ca /
dvaitamaikyamasatsacca sarvaṃ cidgaganaṃ param

pūrṇātpūrṇaṃ prasarati pūrṇameva sthitaṃ jagat /
na ca bhātaṃ na cābhātaṃ śilābaddhodaropamam

yato jagaccidunmeṣo vyomātmāpratighaṃ tataḥ /
cinmātraṃ yatra yatrāsti tatra tatrocitaṃ jagat

cidvyoma cāsti sarvatra sarvaṃ caitajjaganmayam /
sarvaṃ brahmamayaṃ śāntaṃ jagadityapi śabditam

yathāsthitamidaṃ viśvaṃ tathāsaṃsthamanāmayam /
brahmaiva niravadyātma citsaṃkalpapurākṛti

asaṃbhavādanyayukteryuktireṣaiva śobhanā /
ayuktyanubhavaṃ tūktaṃ nārthināmiha śobhate

loke śāstre'tha vedādau yatsiddhaṃ siddhameva tat /
sadastvasadvātmani taddhātuṃ śakyaṃ na vā kvacit

tadevetthaṃ parijñātaṃ brahmatāmupagacchati /
yadā tena samaṃ viśvaṃ sthitameva vilīyate

nyāyenaitadihoktena lokavedādi sidhyati /
sarvaṃ sa jīvanmuktatvameṣa evocitastataḥ

parijñātaṃ cidākāśamaparijñātapādape /
so'haṃ trijagadityeva bandhamokṣavinirṇayaḥ

yathāsthitamidaṃ dṛśyaṃ parijñānādvilīyate /
tajjñasyāstaṃgatasyaiva śilāmaunaṃ tu śiṣyate

loke śāstre ca vede ca yatsiddhaṃ siddhameva tat /
saṃvedyate tadevātastadevaṃ phalati sphuṭam

sakalārthanirāsena yadyatsaṃvedyate ciram /
tadeva prāpyate'vaśyaṃ sarvatraivānyabhāvitam

yathānubhūtaṃ yattattattathā nāmānubhūyate /
tatsatyamastvasatyaṃ vā yāvallābhaṃ tathā nu tat

itthaṃ mahāpraśnavicāraṇaṃ te
mayedamuktaṃ matimanmahātman /
anena gacchāśu pathā nirādhi-
rnirāmayo nirvyasano bhavoccaiḥ

ityārṣe śrīvā० vā० de० mo ni० ४० dvaitaikyopalambhanirāsena mahāpraśnottaravākyasamāptirnāma daśādhikadviśatatamaḥ sargaḥ