Yoga Vasistha · Chapter 6.208

aṣṭādhikadviśatatamaḥ sargaḥ

śrīvasiṣṭha uvāca /
śubhāśubhaṃ yathodeti prajānāṃ gṛhasaṃgame /
asaṃbaddhairapratighairdūrasthaistadidaṃ śrṛṇu

brahmasaṃkalpanagaraṃ jagattāvadidaṃ sthitam /
yaddṛśyaṃ dṛśyabodhena brahmaiva brahmabodhataḥ

yadyatsaṃkalpanagare yadā saṃkalpyate yathā /
tathānubhūyate tattattādṛgviracanaṃ tadā

evamasmingṛhe yāte saṃpannaivamiyaṃ prajā /
evaṃ saṃkalpasaṃpanne jagatyevaṃ bhavatyalam

etatsvasaṃkalpapure yādṛśaṃ te tathā sthitam /
yathā saṃkalpayasi yattattathā kila paśyasi

yathaiva varaśāpābhyāṃ śuddhasaṃvidavāpyate /
saṃvittathaiva bhavati brāhmameveti kalpanam

prajāvidhiniṣedhābhyāmekayā''sthāvyavasthayā /
tathaiva phalamāpnoti brāhmameveti kalpanam

dehino ye jagatyasmiṃstānpratyanupalambhataḥ /
asadāsījjagatpūrvaṃ satyamityupalabhyate

cidrūpabrahmasaṃkalpavaśādevaitadaṅga sat /
cidunmeṣanimeṣau yau tāvetau pralayodayau

rājovāca /
kiṃ nopalabhyate pūrvaṃ kiṃ paścādupalabhyate /
jagaccaladvapuridaṃ susthirārambhabhāsvaram

śrīvasiṣṭha uvāca /
asmiṃścidvyomasaṃkalpapurasthe bhāva īdṛśaḥ /
yadbhūtvā na bhavatyeva punarbhavati ca kṣaṇāt

bālasaṃkalpapuravadvyomakeśoṇḍrakādivat /
kilaite sadasadrūpā bhānti sargāścidātmani

tvaṃ saṃkalpapuraṃ kṛtvā vināśayasi tatkṣaṇāt /
svato'nyasaṃvidvaśataḥ svasvabhāvaḥ sa te yathā

cidvyomakalpanapure yadunmajjanamajjanam /
svabhāvakacanaṃ tasya tadviddhi vimalaṃ tathā

saṃviddhanastvanādyantavyomaiva trijagannabhaḥ /
tenāsāvadya yannāma karotyapi ca cetati

tadanāvaraṇasyāsya yojanānāṃ śateṣvapi /
yugairapi svapna iva kāryakṛdvartamānavat

kila deśāntare nityamatha lokāntare'pi ca /
nirāvṛto ya ekātmā sa kiṃ nāma na cetati

yathā maṇau prakacati pronmajjananimajjane /
parāvartaḥ svabhāsāsya cinmaṇau jagatāṃ tathā

vidhīnāṃ pratiṣedhānāṃ lokasaṃsthāprayojanam /
saiva saṃvidi rūḍhatvātpretyāpi phaladā sthitā

na kadācana yātyastamudeti na kadācana /
brahma brahmacidābhānaṃ sarvadātmanyavasthitam

yathā tu draṣṭṛdṛśyatvātkalpanā kalpanāpuram /
svayaṃ jagadivābhāti jātamityucyate tathā

yadā svabhāvātkacanaṃ saṃhṛtyātmani tiṣṭhati /
brahmacidgaganaikātmā śānta ityucyate tathā

kacanākacane yasya svabhāvo nirmalo'kṣayaḥ /
yathaitāvātmano nānyau spandāspandau nabhasvataḥ

jarāmaraṇahantṛṇi kṣaṇānyatra pṛthakpṛthak /
bhavantviti yathaitāni santi tvatkalpanāpure

brahmasaṃkalpanagare svabhāvā uditāstathā /
oṣadhīnāṃ padārthānāṃ sarveṣāṃ ca jagattraye

na saṃkalpayitā rājansaṃkalpanagare svayam /
tṛṇaṃ tṛṇaṃ kalpayati bālaḥ krīḍanakāniva

svayaṃ svabhāva evaiṣa ciddhanasyāsya susphuṭam /
yadyatsaṃkalpayatyāśu tatra te'vayavā api

cidātmakatayā bhānti nānātmakatayātmanā /
apyekasārāstiṣṭhanti nānākārasvabhāvagāḥ

pratyekaṃ kila tatrāsti brahmacinmātratātmani /
sarvātmikā sā yatrāste yathāntarbhāti tattathā

anādimadhyāntamanantavīryaṃ
kiṃcinna kiṃcicca sadapyasatyam /
sthitaṃ yathā yatra tadātma tatra
sarvātmabhūrbhūtatṛṇādijātau

ityārṣe śrīvāsiṣṭhamahārāmāyaṇe vālmīkīye de० mo० ni० u० mahāpraśnamokṣaṇo nāmāṣṭottaradviśatatamaḥ sargaḥ