Yoga Vasistha · Chapter 6.207

saptādhikadviśatatamaḥ sargaḥ

śrīvasiṣṭha uvāca /
śrṛṇu rājanyathā spaṣṭametatte kathayāmyaham /
yena te sarvasaṃdehā yāsyantyalamamūlatām

sarve tāvajjagadbhāvā asadrūpāḥ sadaiva hi /
sadrūpāśca sadaiveme yathāsavedanaṃ sthiteḥ

idamitthamiti protā yatra saṃvittadeva tat /
bhavatyavaśyaṃ tattvaṅga sadevāstvasadeva vā

īdṛksvabhāvā saṃvittistayā deho vibhāvyate /
eka eva svarūpeṇa tasyāste na ca tadvidā

vidameva vidurdehaṃ svapnādāvitaretarā /
saṃvitkācitsaṃbhavati na cānyāsti śarīratā

āśritasvapnasaṃdarśastathedaṃ bhāsate jagat /
samastakāraṇābhāvātsargādāvanyatātra kā

evaṃ yadeva vimalaṃ vedanaṃ brahmasaṃjñitam /
tadevedaṃ jagadbhāti tatkeva jagato'nyatā

evaṃ pūrvāparaṃ śuddhamavikāryajagatsthiteḥ /
lokavedamahāśāstrairanubhūtamudāhṛtam

apalāpyaiva ye mūḍhā andhakūpakamekavat /
samastabhūtasaṃvittau rūḍhapūrṇaṃ mahātmabhiḥ

vartamānānubhavanamātramohapramāṇakāḥ /
śarīrakāraṇā saṃviditi mohamupāgatāḥ

unmattā eva te'jñāste yogyā nāsmatkathāsu te /
akṣībakṣībayormūḍhabuddhayoḥ kaiva saṃkathā

yayā vipaścitkathayā sarvasaṃśayasaṃkṣayaḥ /
na bhavetrtriṣu lokeṣu jñeyā mūrkhakathaiva sā

pratyakṣamātraniṣṭho'sau mūḍhāstha iti vakti yat /
tena niryuktinoktena śilāsadṛśavṛttinā

proktaḥ sarvaviruddhena so'jñaḥ kūpāndhadarduraḥ /
pūrvāparadhiyaṃ tyaktvā vartamāne matisthitaḥ

vedā lokādayaścaite pṛṣṭāḥ svānubhavānvitām /
vadantīmāṃ dṛśaṃ sarve yathā naśyanti saṃśayāḥ

saṃvideva śarīraṃ cecchavaṃ kasmānna cetati /
iti yasya matistasmai mūḍhāyedamihocyate

brahmaṇo brahmarūpasya saṃkalpanagaraṃ tatam /
idaṃ tāvajjagadbhānaṃ tava svapnapuraṃ yathā

tatsamastaṃ sadaivedaṃ cinmātrātma nirantaram /
bhavatyatra na te bhrāntiḥ sve svapnanagare yathā

tatra tāvaddiśaḥ śailāḥ pṛthvyādi nagarādi ca /
sarvaṃ cinmayamākāśamiti te svānubhūtimat

saṃvidvyoma ghanaṃ brahma tatsakalpapuraṃ virāṭ /
śuddhasaṃvinmayo brahmā tadidaṃ jagaducyate

brāhme saṃkalpanagare yadyatsaṃkalpitaṃ yathā /
tathānubhūyate tattattvatsaṃkalpapure yathā

saṃkalpanagare yadyadyathā saṃkalpyate tathā /
tattathāstyeva ca tadā tvatsaṃkalpapure yathā

tasmāddehasya niyatau yathetau brahmaṇā citā /
spandāspandau kalpitau dvau sa tathaivānubhūtavān

mahāpralayaparyante punaḥ sargaḥ pravartate /
samastakāraṇābhāvāddravyaṃ tāvanna vidyate

vimuktatvātprajeśasyana ca saṃbhavati smṛtiḥ /
brahmaiveyamato dīptirjagadityeva bhāsate

tasmādādyātmanā bhātaṃ svameva brahmaṇā svataḥ /
jagatsaṃkalpanagaramiti buddhaṃ ca khena kham

yathā saṃkalpanagaraṃ cinmātraṃ bhāti kevalam /
tathaivākāraṇaṃ bhāti cinmātronmeṣaṇaṃ jagat

śarīramastu vā māstu yatra yatrāsti cinnabhaḥ /
vettyātmānaṃ tatra tatra dvaitādvaitamayaṃ jagat

tasmādyathā svapnapuraṃ yathā saṃkalpapattanam /
tathā paśyati cidvyoma maraṇānantaraṃ jagat

apṛthvyādimayaṃ bhāti pṛthvyādimayavajjagat /
yathedamā''prathamato mṛtasyāpyakhilaṃ tathā

deśakālau na sargeṇa prabuddhasyeva tau yathā /
aṇumātramapi vyāptau tathaiva paralokinaḥ

idaṃ prabuddhaviṣaye svānubhūtamapi sphuṭam /
jaganna vidyate kiṃcitkāraṇaṃ gagane yathā

aprabuddhasyāsadeva yathedaṃ bhāti bhāsuram /
tathaiva sargavadbhāti vyomaiva paralokinaḥ

śudharādriyamādyāḍhyaṃ khameva paralokinaḥ /
abhūtapūrvamābhāti bhūtapūrvavadātatam

mṛto'yaṃ punarutpanno yamaloke śubhāśubham /
bhuñje'hamityatighanaṃ mṛto bhrāntiṃ prapaśyati

mokṣopāyānādariṇāmeṣa moho na śāmyati /
bodhādavāsanatvena moha eṣa praśāmyati

aprabuddhasya yā saṃvitsā dharmādharmavāsanā /
kha eva khātmikā bhāti yattadeva jagatsthitam

na śūnyarūpaṃ na ca satsvarūpaṃ
brahmābhidhaṃ bhāti jagatsvarūpam /
taccāparijñānavaśādanartha-
bhūtaṃ parijñātavataḥ śivātma

ityārṣe śrīvāsiṣṭhamahārāmāyaṇe vā० de० mo० ni० u० mahāpraśnottaraṃ nāma saptādhikadviśatatamaḥ sargaḥ