Yoga Vasistha · Chapter 6.202

dvyadhikadviśatatamaḥ sargaḥ

śrīvālmīkiruvāca /
etacchrutvā vasiṣṭhasya vacaḥ saṃsadi pārthivāḥ /
siktā ivāmṛtāpūrairantaḥśītalatāṃ yayuḥ

rāmaḥ kamalapatrākṣo rarāja vadanendunā /
kṣīroda iva saṃpūrṇaḥ sudhāpūreṇa cāruṇā

vāmadevādayaḥ sarve tattvajñānaviśāradāḥ /
aho bhagavatā jñānamuktamityūcurādarāt

śāntāntaḥkaraṇo rājā mudā daśaratho babhau /
tuṣṭyaiva saṃprahṛṣṭāṅgo navāṃ dyutimupāgataḥ

jñātajñeyeṣu bahuṣu sādhuvādakathāsvatha /
uvāca galitājñāno rāmo vākyamidaṃ punaḥ

śrīrāma uvāca /
bhagavanbhūtabhavyeśa tvayāsmākamalaṃ malam /
saṃpramṛṣṭamidaṃ hemnaḥ śyāmatvamiva vahninā

abhūma vayamātmīyakāyamātradṛśaḥ purā /
prabho saṃprati saṃpannā viṣvagviśvāvalokinaḥ

sthito'smi sarvasaṃpūrṇaḥ saṃpanno'smi nirāmayaḥ /
jāto'smi vigatāśaṅko budho jāgarmi saṃprati

ānandito'smyakhedāya sukhitosmi cirāya ca /
sthito'nastamayāyaiva śāśvatārthodayo mama

aho bata pavitreṇa śītena jñānavāriṇā /
tvayā siktosmi hṛṣyāmi padmavaddhṛdaye svayam

iyamadya mayā labdhā padavī tvatprasādataḥ /
yasyāṃ sthitasya me sarvamamṛtatvaṃ gataṃ jagat

antaḥprasannamatirastasamastaśokaḥ
śobhāṃ gato'hamamalāśaya eva śāntyā /
ānandamātmani gataḥ svayamātmanaiva
nairmalyamabhyupagato'smi namostu mahyam

ityārṣe śrīvāsiṣṭhamahārāmāyaṇe vālmīkīye de० mo० ni० uttarārdhe ātmaviśrāmāṅgīkaraṇaṃ nāma dvyadhikadviśatatamaḥ sargaḥ