યોગવાસિષ્ઠ · અધ્યાય 6.202

દ્વ્યધિકદ્વિશતતમઃ સર્ગઃ

શ્રીવાલ્મીકિરુવાચ ।
એતચ્છ્રુત્વા વસિષ્ઠસ્ય વચઃ સંસદિ પાર્થિવાઃ ।
સિક્તા ઇવામૃતાપૂરૈરન્તઃશીતલતાં યયુઃ

રામઃ કમલપત્રાક્ષો રરાજ વદનેન્દુના ।
ક્ષીરોદ ઇવ સંપૂર્ણઃ સુધાપૂરેણ ચારુણા

વામદેવાદયઃ સર્વે તત્ત્વજ્ઞાનવિશારદાઃ ।
અહો ભગવતા જ્ઞાનમુક્તમિત્યૂચુરાદરાત્

શાન્તાન્તઃકરણો રાજા મુદા દશરથો બભૌ ।
તુષ્ટ્યૈવ સંપ્રહૃષ્ટાઙ્ગો નવાં દ્યુતિમુપાગતઃ

જ્ઞાતજ્ઞેયેષુ બહુષુ સાધુવાદકથાસ્વથ ।
ઉવાચ ગલિતાજ્ઞાનો રામો વાક્યમિદં પુનઃ

શ્રીરામ ઉવાચ ।
ભગવન્ભૂતભવ્યેશ ત્વયાસ્માકમલં મલમ્ ।
સંપ્રમૃષ્ટમિદં હેમ્નઃ શ્યામત્વમિવ વહ્નિના

અભૂમ વયમાત્મીયકાયમાત્રદૃશઃ પુરા ।
પ્રભો સંપ્રતિ સંપન્ના વિષ્વગ્વિશ્વાવલોકિનઃ

સ્થિતોઽસ્મિ સર્વસંપૂર્ણઃ સંપન્નોઽસ્મિ નિરામયઃ ।
જાતોઽસ્મિ વિગતાશઙ્કો બુધો જાગર્મિ સંપ્રતિ

આનન્દિતોઽસ્મ્યખેદાય સુખિતોસ્મિ ચિરાય ચ ।
સ્થિતોઽનસ્તમયાયૈવ શાશ્વતાર્થોદયો મમ

અહો બત પવિત્રેણ શીતેન જ્ઞાનવારિણા ।
ત્વયા સિક્તોસ્મિ હૃષ્યામિ પદ્મવદ્ધૃદયે સ્વયમ્

ઇયમદ્ય મયા લબ્ધા પદવી ત્વત્પ્રસાદતઃ ।
યસ્યાં સ્થિતસ્ય મે સર્વમમૃતત્વં ગતં જગત્

અન્તઃપ્રસન્નમતિરસ્તસમસ્તશોકઃ
શોભાં ગતોઽહમમલાશય એવ શાન્ત્યા ।
આનન્દમાત્મનિ ગતઃ સ્વયમાત્મનૈવ
નૈર્મલ્યમભ્યુપગતોઽસ્મિ નમોસ્તુ મહ્યમ્

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ નિ૦ ઉત્તરાર્ધે આત્મવિશ્રામાઙ્ગીકરણં નામ દ્વ્યધિકદ્વિશતતમઃ સર્ગઃ