Yoga Vasistha · Chapter 6.201

ekādhikadviśatatamaḥ sargaḥ

śrīvālmīkiruvāca /
athārvāksādhuvādeṣu praśānteṣu śanaiḥśanaiḥ /
jñānopadeśamāsādya prollasatsviva rājasu

praśāntasaṃsṛtibhrāntau jane caritamātmanaḥ /
svayaṃ hasati cittena satyaṃ samanudhāvatā

valaccittakalaṃ jñānasamāsvādanatatpare /
vivekini sabhāloke śānte dhyānamivāsthite

baddhapadmāsane rāme sabhrātari guroḥ puraḥ /
sthite kṛtāñjalau dīptaguruvakragatekṣaṇe

pārthive kimapi dhyānamivāsvādayati sthitim /
jīvanmuktātmikāmantarādimadhyāntapāvanīm

grahītumarcāṃ bhaktānāṃ mānitārthajano muniḥ /
tūṣṇīṃ kṣaṇamiva sthitvā provācānākulākṣaram

svakulākāśaśītāṃśo rāma rājīvalocana /
kimanyadicchasi śrotuṃ kathayāmimatecchayā

sthitiṃ ca kīdṛśīmenāmadyānubhavasi svayam /
kiṃrūpamidamābhāsaṃ jāgataṃ vada paśyasi

ityukte muninā tena prāha rājakumārakaḥ /
avihvalaṃ mṛdu spaṣṭaṃ gurorālokayanmukham

śrīrāma uvāca /
tvatprasādena yāto'smi parāṃ nirmalatāṃ prabho /
śāntāśeṣakalaṅkāṅkaṃ śaradīva nabhastalam

sarvā evopaśāntā me bhrāntayo bhavabhaṅgadāḥ /
svarūpeṇāvadātena tiṣṭhāmyacchamivāmbaram

sthito'haṃ galitagranthiḥ śāntāśeṣaviśeṣaṇaḥ /
sphaṭikālayamadhyasthasphaṭikāmaladhīraham

anyacchrotumathāhartuṃ śāntaṃ necchati me manaḥ /
parāṃ tṛptimupāyāntaṃ suṣuptamiva saṃsthitam

śāntāśeṣaparāmarśaṃ vigatāśeṣakautukam /
saṃtyaktāśeṣasaṃkalpaṃ śāntaṃ mama mune manaḥ

parinirvāmi śāmyāmi jāgradeva jagatsthitau /
asvapnamapunarbodhaṃ svapimīva nirāmayam

āśāvidhuritāmātmasaṃsthitiṃ prāktanīṃ tanau /
pravihasya sphuratsūktaiḥ svasthastiṣṭhāmyasaṃśayam

nopadeśena nārthena na śāstrairna ca bandhubhiḥ /
tyāgena ca na caiteṣāmadhunā mama kāraṇam

sāmrājyasyāthavā vyomni yā sthitiḥ kṣobhavarjitā /
tāmevānubhavāmyatra maccittāmanapāyinīm

khādapyatitarāmacchaṃ cidākāśāṃśamātrakam /
jagadityeva paśyāmi locanādyaṅgatāṃ gataḥ

ākāśamātramevedaṃ jagadityekaniścayaḥ /
dṛśyanāmni nabhasyasminkṣaye jāgarmi cākṣayaḥ

yathākāmaṃ yathāprāptaṃ yathāsthitamiva sthitam /
yadvakti tadavighnena karomyapagataiṣaṇam

na tuṣyāmi na hṛṣyāmi na puṣyāmi na rodimi /
kāryaṃ kāryaṃ karomyeko bhrāntirdūraṃ gatā mama

anyatāmetu sargo'yaṃ vātu vā pralayānilaḥ /
saumyo bhavatu vā deśaḥ svastho'haṃ svātmani sthitaḥ

viśrāntosmi vilakṣyosmi durlakṣyosmi nirāmayaḥ /
nāśābhirbandhamāpnomi mune khamiva muṣṭibhiḥ

yathā tarugatātpuṣpādgandhaḥ prāpya nabhaḥpadam /
tiṣṭhatyevamahaṃ dehādatītaḥ saṃsthitaḥ samaḥ

yathaiva sarve rājāno viharanti yathāsukham /
aprabuddhāḥ prabuddhāśca rājyeṣu bahukarmasu

śāntaharṣaviṣādāśaḥ sthiraikasamadarśanaḥ /
sthita ātmani niḥśaṅkaṃ tathaiva viharāmyaham

sarvasyoparyapi sukhī sukhaṃ nehāmi me prabho /
janasāmyena tiṣṭhāmi yathecchaṃ māṃ niyojaya

bālo līlāmiva tyaktaśaṅkaṃ saṃsārasaṃsthitim /
yāvaddehamimāṃ sādho pālayāmyamalaikadṛk

bhuñje pibāmi tiṣṭhāmi pālayāmi nijakriyām /
jāto'haṃ vigatāśaṅkastvatprasādānmunīśvara

śrīrāma uvāca /
aho bata mahāpuṇyaṃ padamāsāditaṃ tvayā /
anādimadhyaparyantamidaṃ yatra na śocyate

samyaksamasamābhoge śītale svātmani svayam /
nabhasīva nabhaḥ śānte viśrāntimasi labdhavān

diṣṭayā jāto viśokastvaṃ diṣṭyā samyagavasthitaḥ /
diṣṭayā lokadvaye'narthaśaṅkā te śamamāgatā

diṣṭayā raghūṇāṃ tanaya saṃjñaḥ pāvitavānasi /
bhūtabhavyabhaviṣyasthāṃ bodhena kulasaṃtatim

adhunā munināthasya viśvāmitrasya rāghava /
pūrayitvārthitāṃ bhuktvā pitrā saha mahīmimām

tvayānvitāḥ satanayabhṛtyabāndhavāḥ
padātayaḥ sarathaṃgajāśvamaṇḍalāḥ /
nirāmayā vigatabhayāḥ sthiraśriyaḥ
sadodayāḥ subhaga bhavantu rāghavāḥ

ityārṣe śrīvāsiṣṭhamahārāmāyaṇe vā० de० mo० nirvāṇaprakaraṇe uttarārdhe viśrāntiprakaṭīkaraṇaṃ nāmaikādhikadviśatatamaḥ sargaḥ