Yoga Vasistha · Chapter 6.198

aṣṭanavatyadhikaśatatamaḥ sargaḥ

śrīvasiṣṭha uvāca /
bhūyo nipuṇabodhāya śrṛṇu kiṃcidraghūdvaha /
punaḥpunaryatkathitaṃ tadajñe'pyavatiṣṭhate

rāghava prathamaṃ proktaṃ sthitiprakaraṇaṃ mayā /
yenedamitthamutpannamiti vijñāyate jagat

tato jagati jātena paropaśamaśālinā /
bhavitavyamiti proktaṃ mayopaśamayuktibhiḥ

upaśāntiprakaraṇe proktairupaśamakramaiḥ /
paramopaśamaṃ gatvā vastavyamiha vijvaram

prāptaprāpyena tajjñena yathā saṃsāradṛṣṭiṣu /
vihartavyaṃ hi naḥ kiṃcitsvalpaṃ śrotavyamasti te

janma saṃprāpya jagati bālya eva jagatsthitim /
yathābhūtāmimāṃ buddhvā vastavyamiha vijvaram

sarvasauhārdajananīṃ sarvasyāśvāsakāriṇīm /
samatāmalamāśritya vihartavyamihānagha

sarvasaṃpattisubhagaṃ sarvasaubhāgyavardhanam /
samatāsulatāyāstu phalaṃ bhavati pāvanam

samatāsubhagehānāṃ kurvatāṃ prakṛtaṃ kramam /
sarvaiveyaṃ jagallakṣmīrbhṛtyatāmeti rāghava

na tadāsādyate rājyānna kāntājanasaṃgamāt /
anapāyi sukhaṃ sāraṃ samatvādyadavāpyate

dvandvopaśamasīmāntaṃ saṃrambhajvaranāśanam /
sarvaduḥkhātapāmbhodaṃ samatvaṃ viddhi rāghava

mitrībhūtākhilaripuryathābhūtārthadarśanaḥ /
durlabho jagatāṃ madhye sāmyāmṛtamayo janaḥ

prabuddhasya svacittendorniṣyandamamṛtādhikam /
sāmyamāsvādya jīvanti sarve vai janakādayaḥ

sāmyamabhyasyato jantoḥ svadoṣo'pi guṇāyate /
duḥkhaṃ sukhāyate nityaṃ maraṇaṃ jīvitāyate

sāmyasaundaryasubhagaṃ vanitā muditādikāḥ /
āliṅganti mahātmānaṃ nityaṃ vyasanitā iva

samaḥ samudito nityaṃ samo'nuditadhīḥ sadā /
na kāścidiha tāḥ santi yāḥ samasya hi nardhayaḥ

sarvakāryasamaṃ sādhuṃ prakṛtavyavahāriṇam /
cintāmaṇimivodāraṃ pravāñchanti narāmarāḥ

samyakkāriṇamuddāmamuditaṃ samacetasam /
na dahantyagnayo rāma nāpaḥ siñcanti mānavam

yadyathā tattathā yena kriyate dṛśyate tathā /
ānandodvegamuktena kastaṃ tolayituṃ kṣamaḥ

mitrāṇi bandhuripavo rājāno vyavahāriṇaḥ /
samyakkāriṇi tattvajñe viśvasanti mahādhiyaḥ

nāniṣṭātprapalāyante neṣṭādāyānti tuṣṭatām /
prakṛtakramasaṃprāptāstattvajñāḥ samadarśinaḥ

tyaktvā sarvānupādeyānrāma bhāvānaninditān /
samatāyāmaduḥkhāyāṃ dadhānā vṛttimuttamām

vihasanti jagajjālaṃ jīvayanti nirāmayāḥ /
pūjyante vibudhaiḥ sarvaiḥ samatāmuditāśayāḥ

prakṛtakramasaṃprāptaṃ mukhendau kopameva yaḥ /
samāśayo dhārayati syātsaumyāmṛtavajjanaḥ

yatkaroti yadaśnāti yadākrāmati nindati /
samadṛṣṭistadasyeyaṃ stauti nityaṃ janāvaliḥ

yacchubhaṃ vāśubhaṃ yacca yaccireṇa yadadya vā /
samadṛṣṭikṛtaṃ samyagabhinandati tajjanaḥ

sukhaduḥkheṣu bhīmeṣu saṃtateṣu mahatsvapi /
manāgapi na vairasyaṃ prayānti samadṛṣṭayaḥ

śibirbhūpaḥ kapotāya māṃsamaṅgavikartanam /
dadau muditayā buddhyā samadṛṣṭitayānayā

prāṇebhyo'pi priyatamāṃ kāntāmagre vikālitām /
dṛṣṭvāpyaṅga mahīpālo na mumoha samāśayaḥ

manorathaśataprāptaṃ tanayaṃ samayā dhiyā /
rākṣasāya trigarteśo dadau svapaṇahāritam

nagaryāṃ dahyamānāyāṃ bhūṣitāyāṃ tathotsave /
sama eva mahīpālo janako bhūbhṛtāṃ vara

nyāyataḥ parivikrītaṃ sālvarāṭ samadarśanaḥ /
svameva vicakartāśu śiraḥ padmadalaṃ yathā

kundaprakaranirbhāsaṃ yajñe pāṇḍumivācalam /
jahau jarattṛṇamiva sauvīraḥ samayā dhiyā

samayaiva dhiyā nityaṃ nijamabhyāharankramam /
mātaṅgaḥ kuṇḍapo nāma prāpa vaimānikasthitim

sarvabhūtakṣayakarīṃ sāmyābhyāsena bhūriṇā /
tatyāja rākṣasīṃ vṛttiṃ kadambavanarākṣasaḥ

bālacandrābhijāto'pi samabuddhitayā jaḍaḥ /
guḍamodakavannyāyaprāptamagnimabhakṣayat

samabuddhitayā krūravyavahāraparo'pi san /
dharmavyādhastanuṃ tyaktvā jagāma paramaṃ padam

nandanodyānasaṃstho'pi puruṣo'pi kapardanaḥ /
lulubhe na surastrīṣu nūnaṃ praṇayinīṣvapi

samacittatayā'spandaḥ karañjagahaneṣvapi /
vindhyakāntārakaccheṣu rājyaṃ tyaktvāvasacciram

ṛṣayo munayaścaiva ye siddhāḥ surapūjitāḥ /
samadṛṣṭitayodvignā na te tāsu vratarddhiṣu

rājānaḥ prākṛtāścaiva dharmavyādhādayo'pare /
samadṛṣṭipadābhyāsānmahatāṃ pūjyatāṃ gatāḥ

ihāmutra ca siddhyarthe puruṣārthapravṛttaye /
samadṛṣṭitayā nityaṃ vicaranti subuddhayaḥ

abhivāñchenna maraṇamabhivāñchenna jīvitam /
yathāprāptasamācāro vicaredavihiṃsakaḥ

samakalitaguṇāguṇaikabhāvaḥ
samasukhaduḥkhaparāvaro vilāsī /
pravicarati samāvamānamānaḥ
prakṛtavaravyavahārapūtamūrtiḥ

ityārṣe śrīvāsiṣṭhamahārāmāyaṇe vālmīkīye de० mo० ni० u० samadṛṣṭipraśaṃsā nāmāṣṭanavatyadhikaśatatamaḥ sargaḥ