Yoga Vasistha · Chapter 6.182

dvyaśītyadhikaśatatamaḥ sargaḥ

vṛddhatāpasa uvāca /
tasminneva kadambe'sminvarṣāṇi svecchayā daśa /
sthitvā gaurī jagāmātha haravāmārdhamandiram

tatsparśāmṛtasikto'yaṃ kadambataruputrakaḥ /
utsaṅga iva cāsīno na yātyeva purāṇatām

tato gauryā prayātāyāṃ tadvanaṃ tādṛśaṃ mahat /
sāmānyavanatāṃ yātaṃ janavṛndopajīvitam

mālavo nāma deśo'sti tatrāhaṃ pṛthivīpatiḥ /
kadācittyaktarājyaśrīrmunīnāmāśramānbhraman

imaṃ deśamanuprāpta iha cāśramavāsimiḥ /
pūjito'sya kadambasya dhyānaniṣṭhastale sthitaḥ

kenacittvatha kālena bhrātṛbhiḥ saptabhiḥ saha /
bhavānabhyāgataḥ pūrvaṃ taporthamimamāśramam

tapasvino'ṣṭāviha te tathā nāma tadā'vasan /
yathā tapasvino'nye te teṣāṃ mānyāstapasvinaḥ

kālenānantaramasāvekaḥ śrīparvataṃ gataḥ /
svāminaṃ kārtikeyaṃ ca dvitīyastapase gataḥ

vārāṇasīṃ tṛtīyastu caturtho'gāddhimācalam /
ihaiva te pare dhīrāścatvāro'nye paraṃ tapan

sarveṣāmeva caiteṣāṃ pratyekaṃ tvetadīpsitam /
yathā samastadvīpāyā bhuvo'syāḥ syāṃ mahīpatiḥ

atha saṃpāditaṃ teṣāṃ sarveṣāmetadīpsitam /
tapastuṣṭābhiriṣṭābhirdevatābhirvararvaraiḥ

tapataste tato yātā bhrātaraḥ sadanaṃ nijam /
bhūmau dharmayugaṃ bhuktvā vedhā brahmapurīmiva

tairbhavadbhrātṛbhirbhavya varadānavidhau tadā /
idaṃ varodyatā yatnātprārthitāḥ sveṣṭadevatāḥ

devyasmākamime sarve saptadvīpeśvarasthitau /
satyāḥ prakṛtayaḥ santu sarva āśramavāsinaḥ

tamiṣṭadevatāsārthamurarīkṛtya sādaram /
teṣāmastvevamityuktvā jagāmāntarddhimīśvarī

te tataḥ sadanaṃ yātāsteṣāmāśramavāsinaḥ /
sarva eva gatāḥ paścādeka evāsmi no gataḥ

ahaṃ kevalamekānte dhyānaikagatamānasaḥ /
vāgīśvarīkadambasya tale tiṣṭhāmi śailavat

atha kāle vahatyasminnṛtusaṃvatsarātmani /
idaṃ sarvaṃ vanaṃ chinnaṃ janaiḥ paryantavāsibhiḥ

idaṃ kadambamamlānaṃ janatāḥ pūjayantyalam /
vāgīśvarīgṛhamiti māṃ caivaikasamādhigam

athainaṃ deśamāyātau bhavantau dīrghatāpasau /
etattatkathitaṃ sarvaṃ dhyānadṛṣṭaṃ mayākhilam

tasmādutthāya he sādhū gacchataṃ gṛhamāgatau /
tatra te bhrātaraḥ sarve saṃgatā dārabandhubhiḥ

aṣṭānāṃ bhavatāṃ bhavyaṃ sadane sve bhaviṣyati /
mahātmanāṃ brahmaloke vasūnāmiva saṃgamaḥ

ityukte tena sa mayā pṛṣṭaḥ paramatāpasaḥ /
saṃdehādidamāścaryamāryāstadvarṇayāmyaham

ekaiva saptadvīpāsti bhagavanbhūriyaṃ kila /
tulyakālaṃ bhavantyaṣṭau saptadvīpeśvarāḥ katham

kadambatāpasa uvāca /
asamañjasametāvadeva no yāvaducyate /
idamanyadasaṃbaddhataraṃ saṃśrūyatāṃ mama

ete'ṣṭau bhrātarastatra tāpasā dehasaṃkṣaye /
saptadvīpeśvarāḥ sarve bhaviṣyanti gṛhodare

aṣṭau hyete mahīpīṭheṣveteṣveteṣu sadmasu /
saptadvīpeśvarā bhūpā bhaviṣyantīha me śṛṇu

astyeteṣāṃ kilāṣṭānāṃ bhāryāṣṭakamaninditam /
digantarāṇāṃ niyataṃ tārāṣṭakamivojjvalam

tadbhāryāṣṭakameteṣu yāteṣu tapase ciram /
babhūva duḥkhitaṃ strīṇāṃ yadviyogo'hiduḥsahaḥ

duḥkhitāḥ pratyaye teṣāṃ cakrustā dāruṇaṃ tapaḥ /
śatacāndrāyaṇaṃ tāsāṃ tuṣṭābhūttena pārvatī

adṛśyovāca sā tāsāṃ vaco'ntaḥpuramandire /
devī saparyāvasare pratyekaṃ pṛthagīśvarī

devyuvāca /
bhartrarthamatha cātmārthe gṛhyatāṃ bālike varaḥ /
ciraṃ kliṣṭāsi tapasā nidāgheneva mañjarī

ityākarṇya vaco devyā dattapuṣpā ciraṃṭikā /
svavāsanānusāreṇa kurvāṇaiveśvarīstavam

ānandamantharovāca vacanaṃ mṛdubhāṣiṇī /
ākāśasaṃsthitāṃ devīṃ mayūrīvābhramālikām

ciraṃṭikovāca /
devi devādhidevena yathā te prema śaṃbhunā /
bhartrā mama tathā prema sa bhartāstu mamāmaraḥ

devyuvāca /
āsṛṣṭerniyaterdārḍhyādamaratvaṃ na labhyate /
tapodānairato'nyaṃ tvaṃ varaṃ varaya suvrate

ciraṃṭikovāca /
alabhyametanme devi tanmadbharturgṛhāntarāt /
mṛtasya mā viniryātu jīvo bāhyamapi kṣaṇāt

dehapātaśca me bharturyadā syādātmamandire /
tadetadastviti varo dīyatāmambike mama

devyuvāca /
evamastu sute tvaṃ ca patyau lokāntarāsthite /
bhaviṣyasi priyā bhāryā dehānte nātra saṃśayaḥ

ityuktvā virarāmāsau gauryā gīrgaganodare /
meghamālādhvaniriva niravadyasamudyatā

devyāṃ gatāyāṃ bhartārastāsāṃ kālena kenacit /
te kakubbhyaḥ samājagmuḥ sarve prāptamahāvarāḥ

adyāyamapi saṃyātu bhāryāyā nikaṭaṃ patiḥ /
bhrātṝṇāṃ bāndhavānāṃ ca bhavatvanyonyasaṃgamaḥ

idamanyadatheteṣāmasamañjasamākulam /
śṛṇu kiṃvṛttamāścaryamāryakāryoparodhakam

tapyatāṃ tapa eteṣāṃ pitarau tau vadhūyutau /
tīrthamunyāśramaśreṇīṃ draṣṭuṃ duḥkhānvitau gatau

śarīranairapekṣyeṇa putrāṇāṃ hitakāmyayā /
gantuṃ kalāpagrāmaṃ taṃ yatnavantau babhūvatuḥ

tau prayātau munigrāma mārge dadṛśatuḥ sitam /
puruṣaṃ kapilaṃ hrasvaṃ bhasmāṅgaṃ cordhvamūrdhajam

dhūlīlavamanādṛtya taṃ jaratpānthaśaṅkayā /
yadā tau jagmatustena sa uvācānvitaḥ krudhā

savadhūka mahāmūrkha tīrthārthī dārasaṃyutaḥ /
māṃ durvāsasamullaṅghya gacchasyavihitānatiḥ

vadhūnāṃ te sutānāṃ ca gacchatastapasārjitāḥ /
viparītā bhaviṣyanti labdhā api mahāvarāḥ

ityuktavantaṃ taṃ yāvatsadāro'tha vadhūyutaḥ /
sanmānaṃ kurute tāvanmunirantardhimāyayo

atha tau pitarau teṣāṃ savadhūkau suduḥkhitau /
kṛśībhūtau dīnamukhau nirāśau gṛhamāgatau

ato vadāmyahaṃ teṣāṃ naikaṃ nāmāsamañjasam /
asamañjasalakṣāṇi gaṇḍe sphoṭāḥ sphuṭā iva

cidvyomasaṃkalpamahāpure'smi-
nnitthaṃ vicitrāṇyasamañjasāni /
niḥśūnyarūpe'pi hi saṃbhavanti
dṛśye yathā vyomani dṛśyajṛmbhāḥ

iti śrī० vā० de० mo० ni० u० bra० tāpasopākhyānāntargata saptadvīpeśvaropā० saptadvīpeśvaravarṇanaṃ nāma dvyaśītyadhikaśatatamaḥ sargaḥ