Yoga Vasistha · Verses 6.18-2

aṣṭādaśaḥ sargaḥ

bhuśuṇḍa uvāca /
astyasmiñjagati śreṣṭhaḥ sarvanākanivāsinām /
devadevo haro nāma devadevābhivanditaḥ

ṣaṭpadaśreṇinayanā yasyoccastabakastanī /
vilāsinī śarīrārdhe latā cūtataroriva

himahārasitā yasya laharīstabakombhitā / /
āveṣṭitajaṭālūṭā gaṅgākusumamālikā

kṣīrasāgarasaṃbhūtaḥ prasṛtāmṛtanirjharaḥ /
pratibimbakaraḥ śrīmānyasya cūḍāmaṇiḥ śaśī

anārataśiraścandraprasraveṇāmṛtīkṛtaḥ /
yasyendranīlavatkālakūṭaḥ kaṇṭhe vibhūṣaṇam

dhūlilekhāmahāvartaṃ svacchapāvakasaṃbhavam /
paramāṇumayaṃ bhasma yasya jñānajalaṃ sitam

nirmalāni jitendūni sṛṣṭāni ghaṭitāni ca /
yasyāsthīnyeva ratnāni dehakāntamayāni ca

sudhākarasudhādhītaṃ nīlanīradapallavam /
tārakābinduśabalaṃ yasya cāmvaramambaram

bhramacchivāṅganāpakvamahāmāṃsaudanākulam /
bahirbhūtaṃ gṛhaṃ yasya śmaśānaṃ himapāṇḍuram

kapālamālābharaṇāḥ pītaraktavasāsavāḥ /
āntrasragdāmavalitā bandhavo yasya mātaraḥ

prasphuranmūrdhamaṇayaścaranto masṛṇāṅgakāḥ /
bhujagā valayā yasya prakacatkanakatviṣaḥ

dṛkpātadagdhaśailendraṃ jagatkavalalālasam /
bhairavācaritaṃ yasya līlāsaṃtrāsitāsuram

svasthīkṛtajagajjātasvavyāpārasthacetasaḥ /
yadṛcchayā karaspando yasyāsurapurakṣayaḥ

ekāgramūrtayaḥ sneharāgadveṣavivarjitāḥ /
svaśanā yasya te śailāḥ sarasā api nīrasāḥ

śiraḥkhurāḥ khurakarāḥ karadantamukhodarāḥ /
ṛkṣoṣṭrājāhivaktrāśca pramathā yasya lālakāḥ

tasya netratrayodbhāsivadanasyāmalaprabhāḥ /
yathā gaṇāstathaivānyāḥ parivāro hi mātaraḥ

nṛtyanti mātarastasya puro bhūtagaṇānatāḥ /
caturdaśavidhānantabhūtajātaikabhojanāḥ

kharoṣṭrākāravadanā raktamedovasāsavāḥ /
digantaravihāriṇyaḥ śarīrāvayavasrajaḥ

vasantagirikūṭeṣu vyomni lokāntareṣu ca /
avaṭeṣu śmaśāneṣu śarīreṣu ca dehinām

jayā ca vijayā caiva jayantī cāparājitā /
siddhā raktālambusā ca utpalā ceti devatāḥ

sarvāsāmeva mātṝṇāmaṣṭāvetāstu nāyikāḥ /
āsāmanugatāstvanyāstāsāmanugatāḥ parāḥ

tāsāṃ madhye mahārhāṇāṃ mātṝṇāṃ munināyaka /
alambuseti vikhyātā mātā mānada vidyate

vajrāsthituṇḍaścaṇḍākhya indranīlācalopamaḥ /
tasyāstu vāhanaṃ kāko vaiṣṇavyā garuḍo yathā

ityaṣṭaiśvaryayuktāstā mātaro raudraceṣṭitāḥ /
kadācinmilitā vyomni sarvāḥ kenāpi hetunā

utsavaṃ paramaṃ cakruḥ paramārthaprakāśakam /
vāmasrotogatā etāstumburuṃ rudramāśritāḥ

pūjayitvā jagatpūjyau devau tumburubhairavau /
vicitrārthāḥ kathāścakrurmadirāmadatoṣitāḥ

atheyamāyayau tāsāṃ kathāvasarataḥ kathā /
asmānumāpatirdevaḥ kiṃ paśyatyavahelayā

prabhāvaṃ darśayāmo'sya punarnāsmāṃstvasau yathā /
dṛṣṭamātramahāśaktiḥ kariṣyatyavadhīraṇam

iti niścitya tā devyo vivarṇavadanāṅgikām /
umāmeva vaśīkṛtya prokṣayāmāsurādṛtāḥ

māyayāpahṛtāṃ bharturaṅgādraṅgamupāgatām /
tāmālolakacāṃ devyaḥ śepurodanatāṃ gatām

pārvatīprokṣaṇadine tasmiṃstatra mahotsavaḥ /
babhūva tāsāṃ sarvāsāṃ nṛtyageyamanoharaḥ

atyānandamanuddāmaravamevāmbaraṃ babhau /
dīrghāvayavavikṣepavikāsijaghanodarāḥ

anyā jahasuruddāmatālakṣveḍāghanāravam /
lasadaṅgavikāraṃ ca dhvanatsagirikānanāḥ

anyā jagurdhvanacchailagrahamāpānatoṣitāḥ /
vārīva ravavadrañjajjaganmaṇḍalakoṭare

anyāḥ pānaṃ papuḥ puṣṭacarcitāṅgaśiraḥkhuram /
līlāghuraghurārāvaraṇadākāśakoṭare

papurudagurathoccaiḥ satvarā jagmurūcu-
rjahasurapurahauṣuḥ peturuccairvavalguḥ /
nanṛturaniśamāduḥ svādu māṃsaṃ ca devya-
stribhuvanamapavṛttaṃ cakrarunmattavṛttāḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० bhu० mātṛvyavahāravarṇanaṃ nāmāṣṭādaśaḥ sargaḥ