Yoga Vasistha · Verses 6.17-2

saptadaśaḥ sargaḥ

śrīvasiṣṭha uvāca /
atha rāma bhuśuṇḍo'sau na prahṛṣṭo na vakradhīḥ /
sarvāṅgasundaraḥ śyāmaḥ prāvṛṣīva payodharaḥ

snigdhagambhīravacanaḥ smitapūrvābhibhāṣaṇaḥ /
karasthabilvaphalavatpratolitajagattrayaḥ

tṛṇavaddṛṣṭasakalaḥ prameyīkṛtasaṃsṛtiḥ /
lokājavaṃ javībhāve dṛṣṭajñānaparāvaraḥ

dhīrasthiramahākāro viśrānti gatamandaraḥ /
paripūrṇamanāḥ śuddhaḥ kṣīrārṇava ivāgataḥ

pariviśrāntadhīḥ śāntaḥ paramānandaghūrṇitaḥ /
āvirbhāvatirobhāvatajjñaḥ saṃsārajanmanām

sarabhasavadanābhirāmarūpaḥ priyamadhurocitagānahṛdyavākyaḥ /
svayamiva navamāśritaḥ śarīraṃ sakalabhayāpaharaṃ praharṣayuktaḥ

idamamalagirā samāha śuddhamamṛtamanujjhitasaṃbhramakrameṇa /
kathayitumakhilaṃ nijaṃ svarūpaṃ madhupamiva stanitena mugdhameghaḥ

ityārṣe śrīvāsiṣṭhamahārāmāyaṇe vā० de० mo०nirvāṇaprakaraṇe pū० bhuśuṇḍopākhyāne bhuśuṇḍasvarūpavarṇanaṃ nāma saptadaśaḥ sargaḥ