Yoga Vasistha · Chapter 6.159

ekonaṣaṣṭayadhikaśatatamaḥ sargaḥ

agniruvāca /
vipaścicchreṣṭha bho sādho tvaṃ gacchābhimatāṃ diśam /
sthiraṃ bhūmaṇḍalaṃ bhūyaḥ prakṛtavyavahāravat

yajñaṃ yaṣṭuṃ prajaughasya śakraḥ śatatamaṃ divi /
tatrāhūto'smi mantreṇa gacchāmi gatikovida

bhāsa uvāca /
ityuktvā bhagavānagnistatraivāntaradhīyata /
gagane nirmale yāti analo vaidyuto yathā

tathāhamapi cittena prāktanāṃśca svayaṃ vahan /
punaḥ svakarma nirṇetuṃ bhramanavyomani saṃsthitaḥ

bhūyo'pi dṛṣṭavānasmi jagantyagaṇitāni khe /
nānācāravicārāṇi nānāsaṃsthānavanti ca

kvacicchatramayāṅgāni ekībhūtāni bhūpate /
bhānti cetanti copanti hṛdayāni haranti ca

kvacinmṛnmayadehāni sarvabhūtāni rāghava /
bhānti cetanti copanti parvatapratimāni ca

kvaciddārumayāṅgāni bhānti bhūtāni kutracit /
kvacitpāṣāṇadehāni santi bhūtāni bhūriśaḥ

kvacidājīvamekatra sthitānyupaladehavat /
vāṃgmātravyavahārāṇi bhūtānyālokitāni khe

ityahaṃ suciraṃ kālaṃ paśyannaśyanmanastayā /
avidyāntamapaśyaṃśca tatrodvigno'bhavaṃ dṛśām

tapaḥ kartuṃ samudyuktaḥ kasmiṃścinmokṣasiddhaye /
prāhendro mama caivedaṃ mṛgayonyantaraṃ hi khe

pravṛttaḥ svargasaṃmohe pūrvābhyāsavaśīkṛtaḥ /
mandārakānane tatra bhramato vai mamāmbare

tenetyukte mayā proktaṃ deva khinno'smi saṃsṛteḥ /
mucyeyaṃ śīghramityuktaṃ śrutvovāca tato mama

viśuddhātmā tvarūpo'hamiti caiva hutāśanāt /
varaṃ gṛhāṇetyukte sa tato'nyaṃ yācito mayā

indra uvāca /
taveyaṃ mṛgayonyantaściraṃ saṃsarate citiḥ /
avaśyaṃ bhavitavyo'rtha iti dṛṣṭo mayā tava

mṛgo bhūtvā mahāpuṇyāṃ tāṃ sabhāṃ samavāptavān /
yasyāṃ tadahataṃ jñānaṃ maduktaṃ bodhameṣyati

tadevaṃ tatra hariṇo bhavārtastvaṃ bhavāvanau /
ātmodantamidaṃ vandhyaṃ sakalaṃ saṃsmariṣyasi

svapnabhramamivāśeṣasaṃkalparacitopamam /
paralokānubhūtārthakathāyātārthasaṃnibham

yadā tu mṛgatonmuktaḥ puruṣastvaṃ bhaviṣyasi /
jñānāgnidagdhadehānte tadā hṛtsthaṃ sphuriṣyati

tena tāṃ tvamavidyākhyāṃ bhrāntiṃ tyaktvā ciraṃ sthitām /
bhaviṣyasi vinirvāṇo gataspanda ivānilaḥ

ityukte tena devena tadaiva pratibhodabhūt /
mamāyaṃ hariṇo'smīti vane'sminniti niścitā

tataḥ prabhṛti saṃpannastatraivāntarakoṇake /
hariṇo'haṃ girivare tṛṇadūrvāṅkurāśanaḥ

tataḥ sīmāntasāmantamāgataṃ mṛgayārthinam /
dṛṣṭvāhamekadā bhītaḥ palāyanaparo'bhavam

tatastena samākramya gṛhaṃ nītvā dinatrayam /
saṃsthāpya tava līlārthamihānīto raghūdvaha

eṣa te kathitaḥ sarvaṃ ātmodanto mayānagha /
saṃsāramāyāpratimo nānāścaryarasānvitaḥ

avidyaivamananteyaṃ śākhāprasaraśālinī /
ātmajñānādṛte naiva kenacinnāma śāmyati

śrīvālmīkiruvāca /
yadā vipaścidityuktvā tatra tūṣṇīṃ sthitaḥ kṣaṇāt /
samavocattadā rāmastamanindyamatistvidam

śrīrāma uvāca /
evaṃ paśyatyasaṃkalpo yo'nyasaṃkalpa ātmani /
mṛgaśceddṛśyatāṃ yātaḥ kathaṃ sarge vada prabho

vipaściduvāca /
mahāśavaṃ yatpatitaṃ yasmiñjagati bhūtale /
tāṃ bhuvaṃ pūrvamindreṇa yajñagarveṇa gacchatā

pādenābhihato vyomni durvāsā dhyānasaṃsthitaḥ /
gatāsurityavijñānāttenāsau kupito'śapat

śakra śakrāvanitalaṃ brahmāṇḍapratimaṃ śavam /
acireṇa mahāghoraṃ tava cūrṇīkariṣyati

māmimaṃ śavabuddhyā tvaṃ yadatikrāntavānataḥ /
śāpena mamatāṃ pṛthvīṃ śīghramāsādayiṣyasi

mṛgārthaṃ tena muninā tathā deveti sadyathā /
tattayā kathayā''yātaṃ sadaiva viṣayaṃ dṛśām

vastutastu na caikaṃ sanna dvitīyaṃ na cāpyasat /
sā tathā pratibhodeti kiṃ satkimathavāpyasat

anyacca rāghave māṃ tāṃ yuktiṃ tvamaparāṃ śrṛṇu /
etasminnayasaṃdarbhe susphuṭapratipattaye

yasminsarvaṃ yataḥ sarvaṃ yatsarvaṃ sarvataśca yat /
brahma tasminmahābhāga kiṃ na saṃbhavatīha hi

saṃkalpajātaṃ nānyonyaṃ milatītyupapadyate /
saṃkalpajātamanyonyaṃ milatītyupapadyate

saṃkalpajātamanyonyaṃ milatītyavagamyate /
sarvātmani hi yatraiva cchāyā tatraiva cātapaḥ

na saṃbhavati cettattatkathaṃ sarvātmatāmiyāt /
kasmātsaṃkalpanagaraṃ na mithaḥ śliṣyatīti sat

mithaśca śliṣyatītyevamapi satsarvarūpiṇi /
na tadasti na yatsatyaṃ na tadasti na yanmṛṣā

sarvatra sarvathā sarvaṃ sarvadā sarvarūpiṇi /
aho nu viṣamā māyā manomohavidhāyinī

vidhayaḥ pratiṣedhāśca yadekatra sthitiṃ gatāḥ /
īdṛśī brahmasattaiṣā yadevātmānamātmanā

tayā anādiḥ sādiścetyavidyetyanubhūyate /
na jñaptimātrakacanaṃ yadi syādbhuvanatrayam

tanmahākalpanaṣṭānāṃ sṛṣṭiḥ syātkathamañjasā /
kathamagneḥ kathaṃ vāyoḥ sattā bhūmeḥ kathaṃ bhavet

tasmātsvabhāvakacanamātrānnānyadṛte jagat /
śāstrāṇyanubhavo lokā āmahākalpavādinām

yeṣāṃ pramāṇaṃ no sarvaṃ praśastaistairalaṃ satām /
jñaptidṛṣṭyānayā sarvaṃ pramāṇībhavati kṣaṇāt

nānyayā tanu tenaivameva sāra vidurbudhāḥ /
śuddhā jñaptirbrahmasattā tvavidyāsmīti cetanāt

sphuratīyaṃ jagadrūpā vātaśrīḥ spandanādiva /
na kaścaneha mriyate jāyate na ca kaścana

mṛto'hamidamastīti pratibhaiva cidātmikā /
mṛtiratyantanāśaścettatsā nidrā sukhopamā

punardṛśyopalambhaścennanu jīvitameva tat /
tasmānnehāsti maraṇaṃ tannaivehāsti jīvitam

kasmiṃścinmātrakacane dvayaṃ vāpyasti naiva vā /
cetitaṃ dvayamapyasti nāsti dvayamacetitam

cetitaṃ caikamevāsti svastyanantamataścitaḥ /
cinmātravyatirekeṇa kiṃ nāma vada jīvanam

aduḥkhamakṣayatvāttadato duḥkhaṃ kva kasyacit /
vācyaṃ savācakaṃ sarvaṃ yatra cidvyomamātrakam

tadanyattadananyacca ke te tatraikatādvite /
āvartādi yathā toye śarīrādi tathā pare

tatsattāsaṃniveśātma kāraṇānanyakhātma ca /
cidbhānamātramavyagraṃ khamevāpratighaṃ jagat

āścaryaṃ sughanaṃ vyagraṃ dravyaṃ sapratighaṃ sthitam /
tathete bhūtibhūrnāsti vartamānānubhūtibhūḥ

tatra bhrāntyā piśāco'yaṃ bhāti khātmeti budhyatām /
yathaitatkhaṃ tathaitatkhametatkhamiti khaṃ sthitam

tatheto bhūrito bhūtamito'nyaditi khaṃ param /
yaiva cidbhā jagatsaiva naikatātra na ca dvitā

na ca pratighatā kācinna cāpratigharūpatā /
sarvamapratighaṃ dṛśyaṃ yathā bhūtārthadarśinaḥ

tajjñatātajjñate ceha na satī nāpyasatsthitī /
satye sadasatī caikaṃ kāṣṭhamaunamato'khilam

yaddṛśyaṃ brahmatānantaṃ tadeva paramaṃ padam /
ida sarvaṃ paraṃ brahmamātramityeva saṃsthitam

evaṃ nāmaiṣa ciddhātuḥ kacatyevaṃ yadātmani /
yasyedaṃ kacanaṃ vyomno rūpamapratighaṃ jagat

sargādyā mṛtajīvānāṃ sarvatraivāṅguleṅgule /
asaṃkhyāḥ santyasaṃkhyānāmadṛśyāpratighāmithaḥ

anyonyaṃ siddhalokāste svaṃ yatra prāpya saṃgatāḥ /
parasparaṃ na paśyanti mithaḥ protā api sthitāḥ

bhavatyākāśa evaiṣā dṛśyaśrīrgaganātmikā /
ananyadṛṣṭā cidrūpā svapnavatsvātmadraṣṭṛkā

eṣā hi saṃparijñātā tiṣṭhatyapi yathāsthitam /
bhāmātrarūpanirvāṇā niśāntā'pratibhākṛtiḥ

śāntāśeṣaviśeṣātma yathāsthitamavasthitam /
sadasadvā jagajjālaṃ parijñānena śāmyati

yathābdhijalabindūnāṃ kṣaṇaviśleṣasaṃgamam /
cidaṇūnāṃ tathā brahma vāridhau sphuratāṃ mithaḥ

svapnavadbhāti sargaśrīḥ sargādau cinnabhomayī /
ataḥ sarvamidaṃ brahma śāntamityupapadyate

dṛṣṭānyanantavibhavāni mayā jaganti
bhuktāni kāryapariṇāmavijṛmbhitāni /
bhrāntā diśo daśa bahūni yugāni yāva-
jjñānādṛte kṣayamupaiti na dṛśyadoṣaḥ

i० vā० mahārāmāyaṇe vā० de० mo० ni० u० avi० viśa śa० vipaścitsaṃsārabhramavarṇanaṃ nāmaikonaṣaṣṭyadhikaśatatamaḥ sargaḥ