Yoga Vasistha · Chapter 6.158

aṣṭapañcāśadadhikaśatatamaḥ sargaḥ

muniruvāca /
etatte kathitaṃ sarvaṃ bhaviṣyadbhūtavattava /
yathecchasi tathedānīṃ vyādha sādhu vidhīyatām

agniruvāca /
iti tasya vacaḥ śrutvā vismayākulacetanaḥ /
kṣīṇaṃ sthitvā jagāmāśu snātuṃ vyādhastathā muniḥ

iti tau ceratustatra tapaḥ śāstravicāraṇaiḥ /
akāraṇasuhṛdbhūtāvubhau vyādhamahāmunī

athālpenaiva kālena munirnirvāṇamāyayau /
dehaṃ tyaktvā'padeśānte pare pariṇatiṃ gataḥ

kālena bahunānyena tato yugaśatātmanā /
vyādhasya kāmanāṃ dātuṃ padmajanmā samāyayau

vyādhaḥ svavāsanāveśaṃ nivārayitumakṣamaḥ /
jānannapi varaṃ pūrvaṃ varṇitaṃ samayācata

brahmaivamastviti procya yayāvabhimatāṃ diśam /
vyādhastapaḥphalaṃ bhoktuṃ khagavadvyoma pupluve

vardhamānena dehena jagatpāre mahānabhaḥ /
vegādagaṇitaṃ kālaṃ pūrayāmāsa śailavat

mahāgaruḍavegena tiryagūrdhvamadhastathā /
vyoma pūrayatastasya kālo bahutaro yayau

atha dīrgheṇa kālena yadā vidyābhramasya saḥ /
antaṃ na samavāpnoti tatrodvegamupāyayau

udvegādatha baddhvāsau prāṇarecanadhāraṇām /
prāṇāṃstatyāja nabhasi śavībhūtamadhovapuḥ

cittaṃ prāṇānvitaṃ vyomni yayau tatraiva sindhutām /
vidūrathārirūpāṃ tāmakhilāvanipālinīm

deho meruśatākāramahāśava ivābhavat /
dvitīyorvīnibho vyomnaḥ papātāśanivajravat

pidhānamiva kasyorvīvīthī kasmiṃścidambare /
keśoṇḍrakavadābhāte kasmiṃścijjāgate bhrame

ākārapūritāśeṣavasudhācalamaṇḍalaḥ /
vipaścicchreṣṭha kathitametatte tanmahāśavam

yasmiñchavaṃ saṃpatitaṃ jagatyavanimaṇḍale / /
tadidaṃ jagadābhātamasmākaṃ svapnapūryathā

tadetacchavamāsvādya śuṣkā pūrṇā mahodarī /
saṃpannā caṇḍikā devī raktā raktāntrapūritā

medinī medinī jātā śavasyaitasya medasā /
pūritā'pūrvarūpeṇa himavadgirirūpiṇā

tadaivaitanmahāmedo mṛddhātutvamupāgatam /
kālena vasudhā bhūyo bhūtvā mṛnmayatāṃ gatā

bhūyaḥ prajātāni vanāni bhūmau
grāmāḥ kṛtāḥ pattanasaṃyutāśca /
pātālataḥ sādhusamutthitāste
śailāḥ pravṛttā vyavahāralakṣmīḥ

ityārṣe śrīvāsiṣṭhamahārāmāyaṇe vā० de० mo० ni० u० avi० viya० ? śavanirṇayo nāmāṣṭapañcāśadadhikaśatatamaḥ sargaḥ