Yoga Vasistha · Chapter 6.147

saptacatvāriṃśadadhikaśatatamaḥ sargaḥ

muniruvāca /
anantaraṃ mahābāho suṣuptānnirgatasya me /
svapne jagaddṛśyamidaṃ sāgarādiva nirgatam

ākāśāṅgādivotkīrṇamutkīrṇamavaneriva /
utkīrṇamiva vā cittādutkīrṇamiva vā dṛśaḥ

praphullamiva vṛkṣebhyaḥ sargaḥ pūrvamivotthitaḥ /
taraṅgajālaṃ rodho'bdheriva vā kacanaṃ dṛśām

nabhastalādivāyātaṃ kakubbhya iva cāgatam /
parvatebhya ivotkīrṇaṃ bhūmeriva samutthitam

hṛdayādiva niṣkrāntaṃ saṃpraviṣṭamivāmbudaiḥ /
prasūtamiva vṛkṣebhyo jātaṃ vā sasyavadbhuvaḥ

aṅgebhya iva niryātaṃ samutkīrṇamivendriyaiḥ /
paṭādiva prakaṭitaṃ mandirādiva nirgatam

kuto'pyāgatya patitamuḍḍīya gaganādiva /
upāyanaṃ pare loke gṛhītamiva vā bhuvaḥ

prasūnaṃ brahmavṛkṣasya taraṅgamiva vāmbudheḥ /
anutkīrṇaprakaṭanāccitstambhe cāruputrikā

ākāśamṛnmayānantakuḍyamākāśapattanam /
mano matto gajamayo mithyā jīvasya jīvitam

abhittikamaraṅgaṃ ca vicitraṃ citramambare /
śambareśasya sarvasvamavidyākhyasya kasyacit

mahārambhaṃ sthiramapi deśakālavivarjitam /
nānāḍhyamapi cādvaitaṃ nānātmāpi na kiṃcana

gandharvapuradṛṣṭāntasyāpyavastutayā samam /
jāgarāyāṃ hi kila tadbhrāntamapyupalabhyate

cidbhāmātramanārabdhamapyārabdhamiva sthitam /
deśakālakriyādravyasargasaṃhārasaṃyutam

surāsuranarādhāragarbhagarbhamanoharam /
pṛthakkoṣṭhasthabījaughasaṃpūrṇamiva dāḍimam

nadīśailavanādisthavyomatārābhrasaṃkulam /
gītābdhiraṇapāṭhāḍhyapavanārāvaghargharam

tato vilokitaṃ tatra tanmayā dṛśyamaṇḍalam /
yāvattameva paśyāmi grāmaṃ prāktanamāspadam

tāneva sakalānbandhūṃstathāsaṃsthānasaṃsthitān /
tānputrāṃstāṃ mahelāṃ ca tadeva ca tadā gṛham

tāṃ dṛṣṭvā prāktanīṃ grāmyāmāharadvāsanāṃ balāt /
taṭasthaṃ muhyamānāṅgamiva vīcirmahārṇave

athāhamabhavaṃ tatra tadāliṅgananirvṛtaḥ /
gṛhītavāsano nūnaṃ vismṛtaprāktanasmṛtiḥ

bimbaṃ tattadupādatte yadyadagre'vatiṣṭhati /
yathādarśaścidādarśastathaivāyaṃ svabhāvataḥ

yastu cinmātragaganaṃ sarvamityeva bodhavān /
dvaitena bodhyate neha so'ṅga tiṣṭhati kevalaḥ

na naśyati smṛtiryasya vimalā bodhaśālinī /
ayaṃ dvaitapiśācastaṃ manāgapi na bādhate

yeṣāmabhyāsayogena sādhusacchāstrasaṃgamaiḥ /
udeti bodhadhīrbhūyo yā vismarati nodayam

aprauḍhā me tadā sāsīdbodhadhīryā tayā hatā /
adya śaknoti me buddhiṃ hantuṃ ka iva durgrahaḥ

tavāpi vyādha viddhīdaṃ buddhiḥ satsaṅgavarjitā /
dvaitabodhena kaṣṭena kṛcchrācchāntimupaiṣyati

vyādha uvāca /
evametanmune satyaṃ pāvanaistvadvibodhanaiḥ /
īdṛśairapi me buddhirna viśrāmyati satpade

syādīdṛśamatho na syāditi saṃdehajālikā /
naitasminsvānubhūte'pi vastunyadyāpi śāmyati

aho bata duranteyamabhyāsasudṛḍhīkṛtā /
avidyā vidyamānaiva yā śāntaiva na śāmyati

satsaṅgataiḥ padapadārthavibuddhabuddheḥ
sacchāstrasatkramavicāramanoharāṅgaiḥ /
abhyāsataḥ praśamameti jagadbhramo'yaṃ
nānyena kenacidapīti viniścitirme

ityārṣe śrīvā० vālmī० de० mo० ni० u० a० vi० śavopākhyāne svapnopalambhanaṃ nāma saptacatvāriṃśadadhikaśatatamaḥ sargaḥ