Yoga Vasistha · Chapter 6.141

ekacatvāriṃśadadhikaśatatamaḥ sargaḥ १४१
muniruvāca /
tatra daṃdahyamāno'pi nābhavaṃ duḥkhabhāgaham /
svapne svapno'yamityeṣa jānannagnāvapi cyutaḥ // १
jvālājālanavoḍḍītimaṇḍalairakhilairnabhaḥ /
alātacakravaccāru kevalaṃ bhrāntavānaham // २
taṃ davāgnimahaṃ yāvattattvavittyādakhinnadhīḥ /
vicārayāmyakhinnātmā mārutastāvadāyayau // ३
sītkāramatigambhīraṃ dadhanmegharavopamam /
jagatpadārthairāvṛttairuhyamānaiḥ parāvṛtaḥ // ४
bṛhadbhirghuṃghumāvegairvane dviguṇitāmbudaḥ /
sūryairāvṛttibhirvyūḍhairvimiśrālātacakrakaḥ // ५
jvālāsaṃdhyābhranivahairvṛhadagninadīśataḥ /
śailadviguṇabhūkhaṇḍadānavāmarapattanaḥ // ६
bhūtairdviguṇapātraugho bhrāntairambarakukṣiṣu /
dagdhādagdhābhirapyardhadagdhābhiritaretaram // ७
patantībhiḥ surastrībhirdviguṇāgniśikhālavaḥ /
patadaṅgāradhāraughakaṇasīkaradanturaḥ // ८
alātavidyuto dhunvanpūtāṅgārogramaṇḍalīḥ /
dhūmāndhakāraiḥ sthagayanmlānamūrdhvadiśomukham // ९
bhūmervyomno diṅmukhebhyaḥ samantā-
jjvālāsaṃdhyāvāridā nirgatāste /
yaistairjvālāśailasaṃpiṇḍamātraṃ
savyomaukāḥ saṃsthitā saptalokī // १०
kvāpi protphālakīrṇānalakaṇakapilaprollasanmūrdha-
jāliḥ
kvāpi proḍḍīnakuḍyaḥ kaṭuraṭanapaṭurbhasmasaṃpiṇḍapāṇḍuḥ /
kvāpi jvālāpaṭālīṃ paridadhadabhitaḥ saṃpatantīṃ
gṛhītāṃ
raudraḥ kartuṃ pravṛtto hara iva sa tadā māruto
nṛtyalīlāḥ

ityārṣe śrīvāsi० vālmī० de० mo० ni० u० a० vi० śa० kalpāntavarṇanaṃ nāmaikacatvāriśadadhikaśatatamaḥ sargaḥ