યોગવાસિષ્ઠ · અધ્યાય 6.141

એકચત્વારિંશદધિકશતતમઃ સર્ગઃ ૧૪૧
મુનિરુવાચ ।
તત્ર દંદહ્યમાનોઽપિ નાભવં દુઃખભાગહમ્ ।
સ્વપ્ને સ્વપ્નોઽયમિત્યેષ જાનન્નગ્નાવપિ ચ્યુતઃ ॥ ૧
જ્વાલાજાલનવોડ્ડીતિમણ્ડલૈરખિલૈર્નભઃ ।
અલાતચક્રવચ્ચારુ કેવલં ભ્રાન્તવાનહમ્ ॥ ૨
તં દવાગ્નિમહં યાવત્તત્ત્વવિત્ત્યાદખિન્નધીઃ ।
વિચારયામ્યખિન્નાત્મા મારુતસ્તાવદાયયૌ ॥ ૩
સીત્કારમતિગમ્ભીરં દધન્મેઘરવોપમમ્ ।
જગત્પદાર્થૈરાવૃત્તૈરુહ્યમાનૈઃ પરાવૃતઃ ॥ ૪
બૃહદ્ભિર્ઘુંઘુમાવેગૈર્વને દ્વિગુણિતામ્બુદઃ ।
સૂર્યૈરાવૃત્તિભિર્વ્યૂઢૈર્વિમિશ્રાલાતચક્રકઃ ॥ ૫
જ્વાલાસંધ્યાભ્રનિવહૈર્વૃહદગ્નિનદીશતઃ ।
શૈલદ્વિગુણભૂખણ્ડદાનવામરપત્તનઃ ॥ ૬
ભૂતૈર્દ્વિગુણપાત્રૌઘો ભ્રાન્તૈરમ્બરકુક્ષિષુ ।
દગ્ધાદગ્ધાભિરપ્યર્ધદગ્ધાભિરિતરેતરમ્ ॥ ૭
પતન્તીભિઃ સુરસ્ત્રીભિર્દ્વિગુણાગ્નિશિખાલવઃ ।
પતદઙ્ગારધારૌઘકણસીકરદન્તુરઃ ॥ ૮
અલાતવિદ્યુતો ધુન્વન્પૂતાઙ્ગારોગ્રમણ્ડલીઃ ।
ધૂમાન્ધકારૈઃ સ્થગયન્મ્લાનમૂર્ધ્વદિશોમુખમ્ ॥ ૯
ભૂમેર્વ્યોમ્નો દિઙ્મુખેભ્યઃ સમન્તા-
જ્જ્વાલાસંધ્યાવારિદા નિર્ગતાસ્તે ।
યૈસ્તૈર્જ્વાલાશૈલસંપિણ્ડમાત્રં
સવ્યોમૌકાઃ સંસ્થિતા સપ્તલોકી ॥ ૧૦
ક્વાપિ પ્રોત્ફાલકીર્ણાનલકણકપિલપ્રોલ્લસન્મૂર્ધ-
જાલિઃ
ક્વાપિ પ્રોડ્ડીનકુડ્યઃ કટુરટનપટુર્ભસ્મસંપિણ્ડપાણ્ડુઃ ।
ક્વાપિ જ્વાલાપટાલીં પરિદધદભિતઃ સંપતન્તીં
ગૃહીતાં
રૌદ્રઃ કર્તું પ્રવૃત્તો હર ઇવ સ તદા મારુતો
નૃત્યલીલાઃ

ઇત્યાર્ષે શ્રીવાસિ૦ વાલ્મી૦ દે૦ મો૦ નિ૦ ઉ૦ અ૦ વિ૦ શ૦ કલ્પાન્તવર્ણનં નામૈકચત્વારિશદધિકશતતમઃ સર્ગઃ