Yoga Vasistha · Chapter 6.137

saptatriṃśadadhikaśatatamaḥ sargaḥ

vyādha uvāca /
evaṃ cettanmune brūhi kīdṛgduḥkhaparikṣaye /
na karkaśo na ca mṛdurvyavahārakramo bhavet

muniruvāca /
idānīmeva saṃtyajya dhanuṣā saha sāyakān /
maunamācāramāśritya śāntaduḥkhamihoṣyatām

śrīvasiṣṭha uvāca /
iti saṃbodhitastena parityajya dhanuḥśarān /
āsīnmunisamācārastatraivāyācitāśanaḥ

viveśa manasā maunī tataḥ śāstravivekitām /
dinaireva yathā puṣpamāmodena narāśayam

apṛcchanmuniśārdūlaṃ kadācittamarindama /
bhagavandṛśyate svapnaḥ kathamantarbahiḥ sthitaḥ

muniruvāca / /
mamāpi sādho prathamameṣa eva vivekinaḥ / /
purā citte vitarko'bhūtkuto'pyabhramivāmbare

tata etaddidṛkṣārthamahamabhyastadhāraṇaḥ /
baddhapadmāsanastasyāṃ saṃvidyevābhavaṃ sthiraḥ

tatrastho dūravikṣiptaṃ tayaivāhṛtavānaham /
cetaḥ svahṛdayaṃ sāyaṃ ruceva ravirātapam

vedaneraṇayā prāṇastataścittānvito mayā /
śarīrādrecito bāhye saurabhaṃ kusumādiva

vyomasthacittavalitaḥ sa prāṇapavano mayā /
agrasthasya mukhāgrasthe jantoḥ prāṇe niyojitaḥ

yaḥ prāṇavalitaḥ prāṇastena nīto hṛdantaram /
svehayā svaṃ svakaḥ sarpaḥ karabheṇeva hiṃsitaḥ

tato'haṃ hṛdayaṃ tasya praviṣṭaḥ prāṇavājinā /
saṃkaṭasthaḥ svayā buddhyā tāvebānusarontaram

caradrasābhirbahvībhirnāḍībhirabhito vṛtam /
kulyābhiḥ sthūlatanvībhirbāhyadeśamivākhilam

parśukāpañjaraplīhayakṛdraktādiḍimbakaiḥ /
saṃkaṭaṃ jīvasadanaṃ bhāṇḍopaskaraṇairiva

sarvaiḥ śalaśalāyadbhiruṣṇairavayavairvṛtam /
nidāghatāpasaṃtaptairūrmijālairivārṇavam

navaṃ navaṃ bahiḥśaityaṃ nāsāgrāccetanātmakam /
jīvanāyāniśaṃ ceto vātonnītamanāratam

raktakuṭṭarasaśleṣmavasāniḥsrāvapicchilam /
ghanāndhakāramuṣṇaṃ ca saṃkaṭaṃ narakopamam

udayāvayavāśleṣaspaṣṭāspaṣṭamarudrataiḥ /
sthityantānāṃ tu vaiṣamyādāgāmigadasūcakam

daratsarabhasacchidrāvātavātena śabditam /
padmanālapraṇālāntarjvaladarṇavavāḍavam

milatpadārthanīrandhraṃ sitamacchaṃ savāyubhiḥ /
kvacitsaumyaṃ kvacitkṣubdhaṃ corairiva puraṃ niśi

rasanādaparairnāḍīmārgavidyādharādhvagaiḥ /
saṃcaradbhirvṛtaṃ vātairākārārdhārdhagītibhiḥ

tadahaṃ hṛdayaṃ jantorāviśaṃ viṣamāntaram /
naro'vayavasaṃbādhaṃ naravṛndamivādhikaḥ

anantaramahaṃ prāptastejodhātuṃ hṛdantare /
dūrasthamiva yatnena rātrāvindumivārkaruk

yasmāttribhuvanādarśo dīpastrailokyavastuṣu /
sattā sarvapadārthānāṃ jīvastatrāvatiṣṭhate

kāye sarvagato jīvaḥ svāmodaḥ kusume yathā /
tathāpyojasi kiñjalkairmukhe śaityaṃ vivasvatā

tajjīvādhāramojastu praviṣṭo'hamalakṣitam /
rakṣitaṃ paritaḥ prāṇairvātaiḥ pracchādanaṃ yathā

tato'ñjaḥ saṃpraviṣṭo'hamāmoda iva mārutam /
uṣṇāṃśuriva śītāṃśuṃ mṛtpātramiva vā payaḥ

dvitīyendvaṃśusaṃkāśe śuklābhralavapelave /
navanītaguḍaprakhye kṣīrabudbudasundare

tatra paśyāmyahaṃ tiṣṭhanpraveśavyagrayojjhitaḥ /
svaujasīva vasansvapna iva viśvamakhaṇḍitam

sārkaṃ saparvataṃ sābdhi sasurāsuramānavam /
sapattanavanābhogaṃ salokāntaradiṅmukham

sadvīpasāgarāmbhodhi sakālakaraṇakramam /
sakalpakṣaṇasarvartu sahasthāvarajaṃgamam

tatsvapnadarśanaṃ tatra sthirameva samaṃ sthitam /
vasāmyatyeva nidrānte nidrā'nte nāgatā yataḥ

anidra eva kiṃ svapnaṃ paśyāmīti mayā tataḥ /
paricintayatā jñātamidaṃ vyādha vibodhinā //
nanu nāmāsya ciddhātoḥ svarūpamidamaiśvaram /
svaṃ yadvyapadiśatyeṣa jagannāmnāmbarātmakam

ciddhāturyatra yatrāste tatra tatra nijaṃ vapuḥ /
paśyatyeṣa jagadrūpaṃ vyomatāmeva cātyajat

aho tvadyedamājñātaṃ yaditthaṃ dṛśyate jagat /
tatkathyate svapna iti svacitkacanamātrakam

ciddhātoryatsvakacanaṃ tatkiṃcitsvapna ucyate /
kiṃcicca jāgradityuktaṃ jāgratsvapnau tu na dvidhā

svapnaḥ svapno jāgarāyāmeṣa svapne tu jāgarā /
svapnastu jāgaraiveti jāgaraiva sthitā dvidhā

cetanaṃ nāma puruṣaḥ sa mṛteṣu śateṣvapi /
śarīreṣu mahābuddhe kathaṃ kasya kadā mṛtaḥ

taccetanaṃ khamevāsti sthitaṃ taddehavatkacat /
anantamavibhāgātma pratighāpratighātmakam

svabhāvasyāpratighasya nityānantoditātmanaḥ /
paramāṇościdākhyasya majjā jagaditi smṛtaḥ

cidvyomna udare bhānti samastānubhavāṇavaḥ /
tathā yathāvayavino vicitrāvayavāṇavaḥ

nivṛtto bāhyato jīvo jīvādhāre hṛdi sthitaḥ /
rūpaṃ svaṃ svapnasargo'yamiti vetti cidākacān

bāhyonmukhaṃ bahirjāgracchabditaṃ kacitaṃ svakam /
rūpaṃ paśyati jīvo'yamantasthaṃ svapna ityapi

dyauḥ kṣamā vāyurākāśaṃ parvatāḥ sarito diśaḥ /
prasṛto jīva ityantarbahiścaikātmakaḥ sthitaḥ

arko'rkabimbasaṃstho'pi yathehāpi sthitastviṣā /
tathā jīvo jagadrūpo bahirantaśca saṃsthitaḥ

antaḥsvapno bahirjāgradahameveti vetti cet /
cidātmako yathābhūtaṃ mucyate tadavāsanaḥ

acchedyo'yamadāhyo'yamapi jīvo'nyathā vadan /
dvaitasaṃkalpayakṣeṇa muhyatyeva śiśuryathā

antarmukho'ntarātmānaṃ bahiḥ paśyanbahirmukhaḥ /
āste jīvo jagadrūpaṃ yatsvante svapnajāgratī

iti cintayataḥ kiṃ syātsuṣuptamiti me matiḥ /
jātā tena suṣuptāṃśamanveṣṭumahamudyataḥ

yāvatkiṃ dṛśyadṛṣṭyāntastūṣṇīṃ tiṣṭhāmyahaṃ ciram /
niścitta iti saṃvittiḥ śamā nānyatsuṣuptakam

nakhakeśādi dehe'sminviditāviditaṃ yathā /
na jaḍaṃ ca jaḍaṃ caiva suṣuptaṃ cetanātmani

saṃvittyā kiṃ śramārto'smi śāntamāsevi mānasam /
ityekapariṇāmatvānnānyadasti suṣuptakam

etannidrāghanaṃ jāgratyapi saṃbhavati svataḥ /
na kiṃciccintayāmyāse śānta ityekarūpakam

eṣāvasthā yadā yāti ghanatā mucyate tadā /
nidrāśabdena tanvī tu svaśabdena kathyate

suṣuptamiti niścitya turīyānveṣaṇāmaham /
pravṛttaḥ kartumudyukto yuktaḥ paramayā dhiyā

yāvadrūpaṃ turīyasya kiṃcanāpi na labhyate /
samyagbodhādṛte śuddhātprakāśastamaso yathā

yathāsthitamidaṃ viśvaṃ samyagbodhādvilīyate /
yathāsthitaṃ ca bhavati na ca kiṃcidvilīyate

ataḥ svapno jāgarā ca suṣuptaṃ ca turīyake /
sayathāsthitamastīdaṃ nūnaṃ nāsti ca kiṃcana

kāraṇājjagadutpannaṃ na brahmetthamavasthitam /
jagattayā śāntamajaṃ bodha ityeva turyatā

asaṃbhavātsaṃbhavakāraṇānāṃ
na jāyate kiṃcana nāma sargaḥ /
ciccetanenaiva hi sargasaṃvit
svayaṃ gṛhītā dravatāmbuneva

ityārṣe śrīvā० vā० de० mo० nirvā० u० avi० vi० jāgratsvapnasuṣuptaturīyavarṇanaṃ nāma saptatriṃśadadhikaśatatamaḥ sargaḥ