Yoga Vasistha · Chapter 6.135

pañcatriṃśadadhikaśatatamaḥ sargaḥ

śrīvasiṣṭha uvāca /
mattena bhūtavṛndena kiṃciccheṣīkṛte śave /
idamūcuḥ punardikṣu girau devāḥ savāsavāḥ

vidyādharāmaravihāravimānabhūmā-
vapyāstṛtānyaśiśirīkaraṇāya bhūtaiḥ /
medomayāni pavanaprasṛtāmalābhra-
khaṇḍāñcitāmbarasamānyurujālakāni

dvīpeṣu saptasvapi paśya medo-
jalāni bhūtaiḥ pravisāritāni /
bhuktaṃ ca māṃsaṃ rudhiraṃ ca pītaṃ
kiṃcidgatā saṃprati dṛśyatāṃ bhūḥ

medaḥpaṭairāvalitākhilāṅgī
kaṣṭaṃ sthitā saṃprati modanā bhūḥ /
medomayaiḥ śāradameghajālaiḥ
sakambalānīva vanāni bhānti

pañcaitāni tadasthīni saṃpannāni mahādrayaḥ /
himādriśikharāṇīva sthitānyāvārya diktaṭam

śrīvasiṣṭha uvāca /
deveṣu kathayatsvevaṃ kṛtvemāṃ medinīṃ dharām /
medojālaiḥ sa bhūtaugho matto vyomni nanarta ha

nṛtyatsu bhūtavṛndeṣu śiṣṭaṃ raktaṃ surairbhuvaḥ /
ekapravāheṇaikasminnikṣiptaṃ makarālaye

surārṇavaṃ tamevainaṃ saṃkalpaṃ vidadhuḥ surāḥ /
tataḥprabhṛti so'dyāpi saṃpanno madirārṇavaḥ

bhūtāni nṛttamākāśe tāni kṛtvā pibanti tām /
madirāṃ punarākāśe nṛtyantyānandamandire

pibantyadyāpi tānīva madirāṃ madirārṇavāt /
khe nṛtyanti ca bhūtāni saha yogeśvarīgaṇaiḥ

teṣāṃ tānyatha bhūtānāṃ medojālāni bhūtale /
vistṛtānyavaśuṣkāṇi sthitāto medinī mahī

iti kramācchāntimupāgate śave
punaḥ pravṛtte dinayāminīkrame /
prajāḥ sasarjātha navāḥ prajāpatiḥ
punaḥ sa sargo'bhavadatra pūrvavat

ityārṣe śrīvāsi० vālmīkīye de० mo० nirvā० u० a० vipa० śavo० śavopaśamo nāma pañcatriṃśadadhikaśatatamaḥ sargaḥ