યોગવાસિષ્ઠ · અધ્યાય 6.135

પઞ્ચત્રિંશદધિકશતતમઃ સર્ગઃ

શ્રીવસિષ્ઠ ઉવાચ ।
મત્તેન ભૂતવૃન્દેન કિંચિચ્છેષીકૃતે શવે ।
ઇદમૂચુઃ પુનર્દિક્ષુ ગિરૌ દેવાઃ સવાસવાઃ

વિદ્યાધરામરવિહારવિમાનભૂમા-
વપ્યાસ્તૃતાન્યશિશિરીકરણાય ભૂતૈઃ ।
મેદોમયાનિ પવનપ્રસૃતામલાભ્ર-
ખણ્ડાઞ્ચિતામ્બરસમાન્યુરુજાલકાનિ

દ્વીપેષુ સપ્તસ્વપિ પશ્ય મેદો-
જલાનિ ભૂતૈઃ પ્રવિસારિતાનિ ।
ભુક્તં ચ માંસં રુધિરં ચ પીતં
કિંચિદ્ગતા સંપ્રતિ દૃશ્યતાં ભૂઃ

મેદઃપટૈરાવલિતાખિલાઙ્ગી
કષ્ટં સ્થિતા સંપ્રતિ મોદના ભૂઃ ।
મેદોમયૈઃ શારદમેઘજાલૈઃ
સકમ્બલાનીવ વનાનિ ભાન્તિ

પઞ્ચૈતાનિ તદસ્થીનિ સંપન્નાનિ મહાદ્રયઃ ।
હિમાદ્રિશિખરાણીવ સ્થિતાન્યાવાર્ય દિક્તટમ્

શ્રીવસિષ્ઠ ઉવાચ ।
દેવેષુ કથયત્સ્વેવં કૃત્વેમાં મેદિનીં ધરામ્ ।
મેદોજાલૈઃ સ ભૂતૌઘો મત્તો વ્યોમ્નિ નનર્ત હ

નૃત્યત્સુ ભૂતવૃન્દેષુ શિષ્ટં રક્તં સુરૈર્ભુવઃ ।
એકપ્રવાહેણૈકસ્મિન્નિક્ષિપ્તં મકરાલયે

સુરાર્ણવં તમેવૈનં સંકલ્પં વિદધુઃ સુરાઃ ।
તતઃપ્રભૃતિ સોઽદ્યાપિ સંપન્નો મદિરાર્ણવઃ

ભૂતાનિ નૃત્તમાકાશે તાનિ કૃત્વા પિબન્તિ તામ્ ।
મદિરાં પુનરાકાશે નૃત્યન્ત્યાનન્દમન્દિરે

પિબન્ત્યદ્યાપિ તાનીવ મદિરાં મદિરાર્ણવાત્ ।
ખે નૃત્યન્તિ ચ ભૂતાનિ સહ યોગેશ્વરીગણૈઃ

તેષાં તાન્યથ ભૂતાનાં મેદોજાલાનિ ભૂતલે ।
વિસ્તૃતાન્યવશુષ્કાણિ સ્થિતાતો મેદિની મહી

ઇતિ ક્રમાચ્છાન્તિમુપાગતે શવે
પુનઃ પ્રવૃત્તે દિનયામિનીક્રમે ।
પ્રજાઃ સસર્જાથ નવાઃ પ્રજાપતિઃ
પુનઃ સ સર્ગોઽભવદત્ર પૂર્વવત્

ઇત્યાર્ષે શ્રીવાસિ૦ વાલ્મીકીયે દે૦ મો૦ નિર્વા૦ ઉ૦ અ૦ વિપ૦ શવો૦ શવોપશમો નામ પઞ્ચત્રિંશદધિકશતતમઃ સર્ગઃ