Scripture Library

Yoga Vasistha · Chapter 6.127

6.127.127

saptaviṃśādhikaśatatamaḥ sargaḥ

6.127.1

śrīrāma uvāca /
bhagavankathayaitanme kathaṃ bhūgolakaṃ sthitam /
kathamṛkṣagaṇo yāti lokālokaḥ kathaṃ giriḥ

6.127.2

śrīvasiṣṭha uvāca /
yathā saṃkalparacitā śiśorvyomani tiṣṭhati /
vīṭā cinmātrabālena kalpito bhūstathāmbare

6.127.3

yathā timirikākṣāṇāṃ keśacandrādidarśanam /
cidākāśasya sargādau tathā pṛthvyādidarśanam

6.127.4

yathā saṃkalpanagaraṃ dhāryamāṇaṃ na dṛśyate /
dhāryate dhāryate mā ca tathorvyanubhavaściteḥ

6.127.5

yadyathā yāvadābhāti citi cittvātsvabhāvataḥ /
tattathā tāvadābhāti tatra tatra tadātmakam

6.127.6

timirākrāntanetrasya keśoṇḍrakamivāmbare /
cinmātrasya mahīgolo yo bhātaḥ sa tathā sthitaḥ

6.127.7

ūrdhvaṃ vahantyaḥ saritastadadhastādhutāśanaḥ /
citi cetsvapnavadbhāti tattathā tatsthitaṃ bhavet

6.127.8

tasmātpatantī bhūrbhātā patatyevāniśaṃ jagat /
utpatantī tu cidbhātā tathā nānātmikā bhavet

6.127.9

stabdhabhātā sthitā stabdhā sālokā tu prakāśinī /
nirālokā nirālokalokānāmātmani sthitā

6.127.10

cidbhānaikānusāreṇa tārācakraṃ tathā mahī /
asadeva sadaivedaṃ bhātīdamavikhaṇḍitam

6.127.11

ālokālokamevātha nabhaḥkhātaṃ tato mahat /
tama ekārṇavākāraṃ sthitaṃ tatra kvacitkvacit

6.127.12

dūratvādṛkṣacakrasya karālatvānmahāgireḥ /
kvacittamaḥ kvacittejastatraivācatvare'pi ca

6.127.13

lokālokagireḥ pāre sthitādākāśamaṇḍalāt /
daśadikkaṃ sudūreṇa ṛkṣacakraṃ vivartate

6.127.14

āpātāladivo naddhamṛkṣacakraṃ tadambare /
daśadikkaṃ prasarati patadūrdhvādṛte'bhitaḥ

6.127.15

bhūlokameva pātālayutaṃ nakṣatramaṇḍalam /
paryeti lokālokānte nānyaccitkalpanācca tat

6.127.16

salokālokabhūlokadviguṇātkhādanantaram /
pakvākṣoṭasya bhisseva sthitaṃ nakṣatramaṇḍalam

6.127.17

dviguṇā nabhasastasmādṛkṣacakrasya puṣṭatā /
daśadikkaṃ visarato bilvatvaksadṛśasthiteḥ

6.127.18

saṃviddhanasya kacanaṃ yādṛśaṃ kalpanātmakam /
yaditthaṃ saṃniveśena nanviyaṃ jāgatī sthitiḥ

6.127.19

nakṣatracakrāddviguṇaṃ tato'nyadvidyate nabhaḥ /
tacca kvacitprakāśāḍhyaṃ kvacitsāndratamomayam

6.127.20

paryante tasya nabhasaḥ sthitaṃ brahmāṇḍakharparam /
ekamūrdhve paramadho gaganaṃ madhyametayoḥ

6.127.21

yojanānāṃ koṭiśataṃ puṣṭaṃ vajradṛḍhaṃ ca tat /
sthitaṃ saṃvedanamayaṃ vyomni vyomamayātmakam

6.127.22

sarvadikkaṃ mahāgole nabhasi svarkatārakam /
kimatrordhvamadhaḥ kiṃ syātsarvamūrdhvamadhaśca vā

6.127.23

patanamutpatanaṃ gamanaṃ sthitaṃ
cita iti sphuritaṃ na tu vastu tat /
patanamasti na cotpatanaṃ na vā
gamanamāgamanaṃ sthitamityapi

6.127.127

ityārṣe śrīvāsiṣṭhamahārāmāyaṇe vā० de० mo० ni० u० a० vi० bhūgolanirṇayo nāma saptaviṃśādhikaśatatamaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0