Yoga Vasistha · Verses 6.12-2

dvādaśaḥ sargaḥ

śrīvasiṣṭha uvāca /
iti niścayavantaste mahānto vigatainasaḥ /
satyāḥ satye pade śānte same sukhamavasthitāḥ

iti pūrṇadhiyo dhīrāḥ samanīrāgacetasaḥ /
na nindanti na nandanti jīvitaṃ maraṇaṃ tathā

ityalakṣyacamatkārā nārāyaṇabhujā iva /
ṛjavaḥ skhalitākārā aparā iva meravaḥ

remire vanakhaṇḍeṣu dvīpeṣu nagareṣu ca /
devopavanamālāsu svargeṣu ca surā iva

bhremuḥ kusumapūrṇāsu dolāndolacalāsu ca /
vicitravanalekhāsu meruśrṛṅgaśikhāsu ca

cakrurvijitaśatrūṇi cāmaracchatravanti ca /
vicitrārthāni rājyāni citrācāramayāni ca

anujagmurimānsarvānnānācāraviceṣṭitān /
śrutismṛtyuditārambhāmitikartavyatāmiti

īdṛśīramaṇīyeṣu lalanāhāsyahāriṣu /
vihārāhāraramyeṣu bhogābhogeṣu bhūṣitāḥ

viviśuścārucūtāsu mandāravalitāsu ca /
apsarogītapūrṇāsu nandanodyānabhūmiṣu

sacarācarabhūteṣu viśrāntākhilajantuṣu /
yajñakriyākalāpeṣu gārhasthyeṣu yathākramam

terurhatagajendrāsu bhrāntabhūriśivāsu ca /
bherībhāṃkārabhīmāsu saṃgrāmārṇavavīthiṣu

tasthuḥ paruṣacittāsu hṛtavittoddhatāsu ca /
saṃrambhakṣobharaudrīṣu sarvāsu dvandvarītiṣu

manasteṣāṃ tu nīrāgamanupādhi gatabhramam /
asaktaṃ muktamāśāntaṃ paraṃ satvapadaṃ gatam

na mamajjuḥ kvacidapi saṃkaṭeṣu mahatsvapi /
mahadapyupayāteṣu kulaśalāḥ sarassviva

nollalāsa vilāsinyā śriyā paramakāntayā /
paripūrṇendulakṣmyeva jalarāśī raghūdvaha

na mamlau duḥkhaśokena grīṣmeṇeva vanasthalam /
jaharṣa ca na bhogaughairavaśyāyairivauṣadhīḥ

te hi kevalamavyagrāḥ kurvantaḥ kāmamañjarīḥ /
iṣṭāniṣṭaphalaṃ rāma nābhileṣurna tatyajuḥ

nodaguḥ kāryasaṃpattāvākrāntā nāstamāyayuḥ /
jahṛṣurna sukhaprāptau mamlurnaiva ca saṃkaṭe

mumuhurna vimoheṣu na mamajjurvipatkramaiḥ /
na jaharṣuḥ śubhaiḥ śokai rurudurna bhavāniva

prākṛtācārasaṃprāpte kurvantaḥ karma kevalam /
sthitā vigatasaṃrambhamaparā iva meravaḥ

tāṃ tvaṃ dṛṣṭimavaṣṭabhya rāghavā'ghavināśinīm /
anahaṃkṛtyahaṃkāro viharasva yathākramam

yathābhūtāmimāmeva paśyatsargaparamparām /
merusthito'bdhigambhīraḥ samamāssva gatabhramaḥ

cinmātraṃ sarvamevedamitthamābhāsatāṃ gatam /
neha satyamasatyaṃ vā kvacidasti na kiṃcana

mahattāmalamālambya tyaktvedamavahelayā /
asaktabuddhiḥ sarvatra bhava bhavya bhavakṣayī

kiṃ rodiṣi ghanodvegaṃ mūḍhavaccānuśocasi /
bhramasyudbhāntacittaśca saumyāvarte tṛṇaṃ yathā

śrīrāma uvāca //
aho na bhagavannūnaṃ samyagjātamalakṣayaḥ /
tvatprasādātprabuddho'smi sūryasaṅgādivāmbujam

bhrāntirastaṃ gatā nūnaṃ mihikā śaradīva me /
saṃśāntākhilasaṃdehaḥ kariṣye vacanaṃ tava

vyapagatamadamoho mānamātsaryamukta
ścirataramuditātmā śāntaśokaścireṇa /
punarasukhamagacchansvacchayaikāntabuddhyā
yadiha vadasi sādho tatkariṣye'viśaṅkaṃ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pūrvārdhe jīvanmuktasaṃśayanirūpaṇaṃ nāma dvādaśaḥ sargaḥ