Yoga Vasistha · Chapter 6.12

dvādaśaḥ sargaḥ

bhuśuṇḍa uvāca /
kha eva vyoma saṃpannamiti saṃkalpanaṃ yathā /
bhrāntimātramasadrūpaṃ tathāhaṃbhāvabhāvanam

khe khaṃ jātamiti bhrānterahaṃ kalpayitā yathā /
tathā nirvyapadeśyātma sadastyasadivātatam

khe khātmaivāsti cidrūpaṃ tatsvakaṃ budhyate vapuḥ /
bhāsate yadidantvena nāhamasmi na cānaham

tataścidrūpamastīdṛgyatra sthūlaṃ khamapyalam /
aṇāviva mahāmerustatsaṃvittirhi khāditā

ghanastato'cidābhāsaḥ khādapyatitarāmaṇuḥ /
jānāti yatsvabhāvaṃ tadetatsargatayā sthitam

ahantākhāditādyātmavidaḥ prasaraṇaṃ jagat /
ambhodravaprasaraṇaṃ yathāvartādiveṣṭanam

acitprasaraṇaṃ śāntamaspandīva jaladravaḥ /
niḥspandapavanākāramākāśahṛdayopamam

na deśakālādijagatprasareṣu ca yujyate /
ghanācchūnyānnirābhāsāccinmātravisarādṛte

cinmātre prasṛte kāle vyomni nāvi jale sthale /
nidrāyāṃ jāgrati svapne bhavejjagadivoditam

prasaraṇāprasaraṇe na ca saṃbhavato vidaḥ /
khādapyatyantasvacchatvādakṣobhādeḥ sadaiva hi

jñaścetati na bhogādi na caivātmanyasāvaham /
dravatvamambhasīvāntaradvitīyaḥ pare sthitaḥ

dhīrhrīḥ śrīrbhīḥ smṛtiḥ kīrtiḥ kāntirityādikaṃgaṇaṃ /
na paśyati visaṃkalpastamasīva padānyaheḥ

brahmendubimbasphuritacijjyotsnāṃśāmṛtadravaḥ /
dikkālāsaṃbhavātsargo neśvarādatiricyate

ādhimānyaḥ sphuratyevaṃ pare sphurati bhāsuram /
jagadādyātmakaṃ cittaṃ cakraughatvamivāmbhasi

majjanonmajjanārāvairvivartāvartaveṣṭanaiḥ /
acchinnānupadaṃ kṣīṇā bhāti sargasaricciram

yathāvartaiḥ payo bhāti dhūmo bhāti yathā ghanaḥ /
tathā jaḍātmakatayā tṛtīyaḥ sarga etayoḥ

dāruṇi krakacacchede yathāvartādikaṃ tathā /
adigādau pare sargastadatadrūpavānayam

saṃsārakadalīstambhādvinā saṃkalpapallavam /
mṛduno'pi dṛṣatkrūrānna kiṃcillabhate'ntaram

sahasrakhuramūrdhākṣikaravaktrahitohitam /
nānādritanudigdeśasaritprādeśamātrakam

antaḥśūnyamasārātma bahurāgoparañjitam /
sphuradvirāgavihitamārjanāmātratarjanam

sasurāsuragandharvavidyādharamahoragam /
jaḍātmapavanaspandi paracetanacetitam

paṭe citramahārājyamiva bhāsurasundaram /
parāmarśāsahaṃ cāru vikalpasphūrjitaṃ jagat

spandātmani vikalpāṃśe patitā'satyarūpiṇi /
saṃvitprasarati bhrāntau tailabindurivāmbhasi

hṛllekhājālavisaraiḥ sarvāvartavivartanaiḥ /
visaratsnehasaṃmiśrajaḍānudayacarvaṇaiḥ

ahamityādicidrūpe vikalpenonmukhī satī /
na parādvyatiriktaiṣā jalatvādiva toyatā

cidādityaḥ sva ātmaiva sarga ityabhidhīyate /
bhūtvāhamiti tenānyo na sargo'sti na sarjakaḥ

spandātmikāyāṃ sattāyāṃ yathā spando jaladravaḥ /
tathā cidātmā vyomatvenavyomatvādi vetti hi

deśakālādinirmāṇapūrvakaṃ vedanaṃ vidaḥ /
sargātmakatvāttenāmbudravasāmyaṃ na dūragam

manohaṃbhāvabuddhyādi yatkiṃcinnāma vedanam /
avidyāṃ viddhi yatnena pauruṣeṇāśu naśyati

ardhaṃ mithaḥsaṃkathayā bhāgaḥ śāstravicāraṇaiḥ /
ātmapratyayataḥ śiṣṭamavidyāyā nivartate

caturbhāgātmani kṛte ityavidyākṣaye kramāt /
samakālācca yacchiṣṭaṃ tadanāmārthasanmayam

śrīrāma uvāca /
ardhaṃ mithaḥsaṃkathayā bhāgaḥ śāstravicāraṇaiḥ /
ātmapratyayato bhāgaḥ kathaṃ tasyā nivartate

samakāle kramācceti muninātha kimucyate /
tadanāmārthasacceti saccāsacceti kiṃ vada

śrīvasiṣṭha uvāca /
sujanena viraktena saṃsārottaraṇārthinā /
saha cāpyātmaviduṣāṃ saṃsṛtiṃ pravicārayet

yataḥ kutaścidanviṣya savirāgamamatsaram /
janaṃ sajjanamātmajñaṃ yatnenārādhayedbudhaḥ

saṃpanne saṃgame sādhoravidyārdhaṃ kṣayaṃ gatam /
viddhi vedyavidāṃ śreṣṭha jyeṣṭhaśreṣṭhadaśodayāt

ardhaṃ sajjanasaṃparkādavidyāyā vinaśyati /
caturbhāgastu śāstrārthaiścaturbhāgaṃ svayatnataḥ

eko'bhilāṣa utpanno bhogebhyaśca nivāryate /
tatkṣaye yātyavidyāyāścaturthāṃśaḥ svayatnataḥ

sādhusaṅgamaśāstrārthasvayatnaiḥ kṣīyate malam /
ekaikenātha sarvaiśca tulyakālaṃ kramādapi

yadavidyākṣayaikātma na kiṃcitkiṃcideva ca /
śiṣyate tatparaṃ prāhuranāmārthamasacca sat

brahmedaṃ ghanamajarādyanantamekaṃ
saṃkalpasphuraṇamavidyamānameva /
buddhvaivaṃ vyapagatamānameyamoho
nirvāṇaṃ pariviharanviśokamāssva

ityārṣe śrīvāsiṣṭhamahārāmāyaṇe vālmī० de० mo० nirvāṇaprakaraṇe u० vi० saṃkalpasargayoraikyapratipattirnāma dvādaśaḥ sargaḥ