Yoga Vasistha · Verses 6.119-2

ekonaviṃśādhikaśatatamaḥ sargaḥ

manuruvāca /
sargātmabhirvibhuḥ spandaiḥ krīḍate bālavatsvayam /
saṃhārātmakaśaktyātha saṃhṛtyātmani tiṣṭhati

svayamasya tathā śaktirudetyābadhyate yayā /
svayamasya tathā śaktirudetyunmucyate yayā

candrārkavahnitaptāyoratnādīnāṃ yathārciṣaḥ /
yathā patrādi vṛkṣāṇāṃ nirjharāṇāṃ yathā kaṇāḥ

tathedaṃ brahmaṇi sphāre jagadbuddhyādi kalpitam /
duḥkhapradamatajjñānāṃ tadevātadiva sthitam

aho nu citrā māyeyaṃ tāta viśvavimohinī /
sarvāṅgaprotamapyātmā yadātmānaṃ na paśyati

cidādarśamayaṃ sarvaṃ jagadityeva bhāvayan /
yastiṣṭhatyupaśāntecchaṃ sa brahmakavacaḥ sukhī

ahamarthavimuktena bhāvenābhāvarūpiṇā /
sarvaṃ śūnyaṃ nirālambaṃ cidrūpamiti bhāvayet

idaṃ ramyamidaṃ neti bījaṃ te duḥkhasaṃtateḥ /
tasminsāmyāgninā dagdhe duḥkhasyāvasaraḥ kutaḥ

rājannabhāvanāstreṇa ramyāramyavibhāgitā /
pauruṣātiśayenāśu svenaivāntarvilūyatām

abhāvanena bhāvanaṃ vilūya karmakānanam /
paraṃ sametya tānavaṃ viśoka eva tiṣṭha bhoḥ

bharitabhuvanābhogo bhūtvā vibhāgabahiṣkṛto
galitakalanābhāsollāso vivekavilāsavān /
adhigataparānandaspandaścirāya nirāmayaḥ /
śamasamasitasvacchābhogo bhavābhayacidvapuḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣu nirvāṇaprakaraṇe pū० ikṣvākumanusaṃvāde ekonaviṃśādhikaśatatamaḥ sargaḥ